قصة المزحة #الجزء 134 : ****يوم جديد و احداث جديدة،**** فاق ارثر فرحان على الامل لي نعس عليه، صلا صلاتو و اتجه لصالة لعب شوية و خدا دوش و توجه الخدمة من بعد ماخدا كاس القهوة من ماكينة، ركب في طوموبيل و عندو وجهة وحدة و باش يطبق قرارو لي خدا لبارح و هو الامل الوحيد لي بقى ليه باش تحسن علاقته مع ايلاف و متفاعل رغم خوفه من فشل الخطة. وصل قبل من الوقت لشركة لي خدامة فيها ايلاف و لي غادي تكون مقر خدمتو من هنا لقدام حتى تحسن علاقتهم و خلا الحمل ديال الخدمة على ادم، غير دخل وقفات عليه السكريتيرة و لي كانت غير هي و ناس قلال السكريتيرة: موسيو ارثر، انسة ايلاف باقي ماجات و هي كان عطاتنا امر باش مانبقاوش نخليوك تجي عندها تبسم ارثر و خلاها و توجه لفوطوي لي في ريسيبشن و كلس ارثر: ماشي مشكل، ماتقدر تقول والو غير سيري شوفي شغالك سكريتيرة: موسيو ارثر، عافاك ماتحطنيش في موقف صعب ارثر: صافي غير سيري شوفي شغالك و كوني هانية، ماتخافيش انا نتحمل كاع المسؤلية حدرات راسها و عرفات بلي ماغادي تصور منو لا حق لا باطل اللهم دير داكشي لي قال ليها و فاش تجي ايلاف منو ليها و يالاه كانت راجعة لبلاصتها عيط ليها ارثر : شنو سميتك بعدا ؟؟! سكرتيرة: سميتي وينجي ارثر: اوكي ا وينجي، تقدري تعاونيني و تشوفي ليا البيرو لي خاوي باش نستقر فيه؟ وينجي: !!!؟؟ بيرو ؟؟ تستقر فييه!!! ارثر: كيبان ليا انلقى معاك مشكل من هنا لقدام داز من حداها و فاتها و هي تبعاتو و مافاهمة والو، وقف حدا لبيرو ديال ايلاف و شير لبيرو لي حداه ارثر:ديالمن هاد البيرو ؟ وينجي: ديال المسؤل الاداري موسيو جيمس و شير لبيرو لي قدام لبيرو ديال ايلاف ارثر: و هذا؟ وينجي: ديال المحاسب موسيو ماكس هضر ارثر بشوية: ضايرين بيها غير رجال وينجي: قلتي شي حاجة ا موسيو ارثر؟ ارثر: لا و شير لبيرو لي حدا البيرو ديالها من الجنب الاخر ارثر: و هاد البيرو ديال اينا موسيو؟ وينجي تبسمات: لا هاداك ديال انسة انجل، المسؤولة على الموارد البشرية ارثر: فين البيرو لي خاوي؟ وينجي: هذاك لي في القنت كاع ارثر: اوكي غير يجي موسيو ماكس يتحول ليه و نلقو البيرو ديالي خاوي. هاكدا قال كلامو ورجع لبلاصتو، خلا وينجي متعجبة ماعرفات مادير ، واش تخلي كلامو و تمشي لخدمتها بحكم ماعندو حتى علاقة مع الشركة و لا دير بهضرتو و طريقة لي هضر بيها خلاعتها فارض شخصيتو و كلامو مايقدرش ينزل لارض، فبقات في صراع مع عقلها و في لاخر قررات تمشي لخدمتها و تسنى بينما جات ايلاف و ماكس. كلسات في بلاصتها كتقيد داكشي لي عندهم ليوم و مرة مرة كتهز راسها تشوفو، كان كالس بجلستو المعهودة، كريزمة و شاد تيلي خدام فيه، مرة كيهز حاجب و مرة ينزلو، بقات حاضياه و مستغربة كيفاش موسيو ارثر بشخصيتو و قوتو و غير هضرتو خلاتها دير بيها بلاما يغوت، هادشي كامل و ايلاف قدرات تغوت عليه و تجري عليه ، لا و تمنعو باش ما يعاودش يجي عندها، القضية فيها ان بما ان ارثر كندجي قدرات ايلاف تغلب عليه اذن ايلاف اقوى من لي كتبان عليه، كانت باقي ساهية في افكارها حتى كتبان ليها هاد الاخيرة داخلة و كتبسم و كانت كتهضر في تيليفون. وينجي هضرات في خاطرها: مزيان ملي فرحانة، ماتقدرش تحيح عليا فاش تشوف ارثر. ارثر غير شافها قلبو فرفر و هضر حتى هو في خاطرو: يكون خير، اندير كل ما في جهدي باش نرجعك ليا " هل اخبروك من قبل ان ابتسامتك فتنة، عيناك فتنة، كلماتك فتنة، حركاتك فتنة، باختصار انكي فاتنة".......... #يتبـــــــــع....... تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM