قصة المزحة #الجزء 130 : سمعات دقان في الباب و قالت يمكن ايكون هو ناضت حاقدة و باغة تحيح عليه, مسحات دموعها و حلات الباب معولة تبدا تغوت حتى كتبان ليها سيدة من خدمة الغرف و هازا في يديها طبسيل عامر بحبات الشكلاط. سيدة: هاذا مسيفطو ليك سيد ارثر. مداتو ليها و مشات و ايلاف رجع بيها زمان ل9 سنين لور بالضبط نهار لي بدات معاه سطاج و كان في بيرو ديال واحد من اوطيلاتهم, و لقات حاطين ليها نفس طبسيل ديال شكلاط. *فلاش باك* ايلاف: يااه ارثر, هاد شكلاط زوييين عندكم, من نهار عطيتيهم لينا فاش كنا مع الجمعية, قلبت عليه و لكن مالقيتوش في مال. ارثر: اه هادو كنوصيو عليه خصوصي لينا, داكشي علاش ماتلقايش في بلاصة اخرى من غير اوطيلاتنا قرب ليها و حط راسو على راسها. ارثر: باش نخليوكم مدمينين علينا. ايلاف: ههه هاكداك, خطة ماسونية هادي. ارثر: و لكن كيعجبونا غير لكليان لي بحالك. ايلاف: و بركة عليك غير انا, اشنو بغيتي بشي وحدين بحالي؟ ارثر عنقها: كافياني, ايوا صافي كل نهار غادي تبقاي تلقاي طبسيل حداك في البيرو فيما تاكليها تفكريني و تفكري شحال كنبغيك. ايلاف: هههههههه حالف عليا, قلباتها دريجة ايلاف: بغيتي تنوض ليا لحناش!!؟ ارثر: شنو !! ايلاف: ههههه لا والو,صافي فينما ناكلها نتفكرك. طلقات طبسيل حتى تشتت , بدات تحرك في راسها باش تنسى هاد الذكرى و مشات لناموسية عالله و عسى تتستسل لنوم, و داكشي لي كان. ___________ ارثر لي كان مسمتع من هاد اللعب لي كيدير معاها, ردة فعلها فاش عرفاتو هو لي تشارك معاه سيد فلوريان, و فاش غارت من ايميلي, و فاش بغات تعرف على الغرفة واش كاسين بزوج, رغم انه عن غير قصد خدا غير كارط ديال بيتها و بيت ايميلي و هو ماخداش كارط ديالو حيتاش غادي يمشي لبيرو الا انه استغل الوضع و يتمنضر في غيرتها, دهل البيرو و وصى باش يديو ليها طبسيل ديال شكلاط عارف بلي كيعجبها, ووقف قريب لغرفة ديالها و قال الا خداتو راه غادي يمشي عندها و الا رفضاتو غادي يرجع لبيرو, شافها فاش قبلاتو و تنشى حتى مشات سيدة لي داتو ليها و وقف قدام بابها و متررد واش يدق عليها و لا لا حتى سمع طبسيل طاح لارض و عرفها غادي يكون رجعات لذكرى لي بيناتهم و انساحب. ___________ كانت ناعسة فوق ناموسية حتى حسات بيدين كيدوزو فوق وجهها و سمعات سميتها. - اييلاف حلات عينيها بشوية حتى كتصدم بيه كالس حداها و كيلعب يديها في وجهها. ايلاف: يوسسف و تلاحت عنقاتو و بدات تبكي. ايلاف: توحشتك بزاااف, علاش مشيتي و خليتي. و اكتفى يوسف بابتسامة و زاد عنقها. يوسف: انا ديما معاك, و ديما غادي نبقى معاك. سمعات تيليفون كيصوني. يوسف: ردي على تيليفون. ايلاف: لا غير خليني معاك,دابا يسكت. يوسف: لا ا ايلاف, ردي على تيليفون. ايلاف: اكي بلاتي غادي غير نجيبو و انا جايا. ضارت تقلب عليه و رجعات ضارت عندو باش تشوفو ياعة مالقاتوش, ناضت كتغوت علييه و بدات تبكيي. - يوووسف, ياك قلتي راه معايا, يوووسف. و تيليفون مابغاش يسكت, حتى فاقت من حلمها و كان تيليفون عيطو ليها 3 مرات و هي كانت عايشة الحلم مع يوسف, فاقت و الدموع في عينيها جاوبات بزز. - موسيو فلوريان و موسيو ارثر كيتسناوك في المطعم. ايلاف: اوكي انا جايا. قلبات ساعة لقات راسها نعسات 5 سوايع, ماحساتش بيها. مسحات دموعها و قادات حويجها و نزلات عندهم. ملي نزلات و هي عقلها ماشي معاها, ماشافتش جيهتو بحال ماكاينش و كانت كتشوف غير في جيهة لي كاين فيها فلوريان و مع ذلك مامتبعاش معاه, حتى حصلوها. فلوريان: انسة ايلاف !!! ايلاف: اه, نعم !؟ فلوريان: واش ماكنتيش متبعة معانا؟ ايلاف: سمح ليا, غير عيانة شوية داكشي علاش. اما ارثر غير حاضيها مانطقش. فلوريان: ماشي مشكل, نهضرو من بعد و لا نخليوها حتى نجي لعندكم في اجتماع اخر, طلعي ترتاحي دابا. ايلاف: اوكي من بعد, و لكن انا خاصني نرجع ليوم, الا ماكانش شي حاجة مهمة نقدر نرجع؟ - لا مايمكنش ليك ترجعي دابا- تقالت هاد الجملة بحزم من طرف ارثر لي عاد نطق. ايلاف: عفوا!!! نقدر نعرف علاش!؟ بدل طريقة ديال الهضرة و هضر بلطف. ارثر: وقت الغروب دابا, اطيح عليك الضلمة في طريق و نني بوحدك, و عيانة من الفوق, طلعي رتاحي و غدا سيري. ايلاف: لا ماشي مشكل, خاصني ضروري نرجع ليوم, على اي شكرا. هنا هضر بغضب مكتوم و بشوية و لكن الغضب باين في هضرتو. ارثر: ايلاف راك بوحدك و طريق بليل و راكي عيانة فين غادي تمشي! بغيتي تمشي ليوم ضروري نرجعو بزوج مانخليكش بوحدك. من مور هاد الجملة فهم فلوريان البلان لي كان باين من لول و هو ان ارثر كيبغي ايلاف و هي كاعية عليه, فقرر انه ينساحب من بيناتهم و يخليهم. فلوريان: عندي اتصال مهم........ #يتبـــــــــع....... تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM