قصة المزحة #الجزء 115 : ايلاف كضحك معاها و دارت فيها كاعية: باغا تجري عليا ا ماما من دار !!!؟ صافي طلعت ليك في راسك زينب: تي ديري عقلك كنهضر معاك بصح, و نتي عارفاني ماغادي طلعي ليا لا فراسي لا والو, راك نتي بنتي كبدتي و مانسخاش بيك, لكن العمر مافيه والو و ماعرفنا شكون سابق و حنى بغينا غير نتهناو من جيهتك ا بنتي. عنقاتها ايلاف: و دابا لاش هاد الهضرة لاش !!! يالاه كنتي زوينة و كتهضري على الزواج اش داك لشي عمر و اووومار خلينا في زوااج الحاجة هههه. زينب: ايوا هي ا بنتي الا تزوجتي. ايلاف: اويييييلييي, ياكما تخالفت ليك مع خويا, و الله حتى بنتك انا, بغيتيني نمشي انا نخطب, واش برت لهاد الدرجة ا ميمتي, نوض نقلب على الرجال. زينب: و هاد المسطية شكون قال ليك قلبي, راه جاو حتال عندك خاصك غير توافقي, عمري قلت ليك شي حاجة و عارفينا حتى ماتبزو عليك والو, و حتى طريقة ديال زواج تقليدي ماعنيناش فيها, كنت كنتسناوك حتى تجي تقولي لينا نتي بلي غادي تزوجي الا كنتي متافقة مع شي واحد و مفاهمة معاه و لكن ملي ماجيتش و شحال و انا نقلقل فيك و والو , ماقدرش نرجع هاد السيد و هو دخل ليا الخاطري غير ملي عاودو ليا علييه. ايلاف غير كتصنط لمها و جمعات ضحكها كامل خلاص فاش قالت ليها " تجي تقولي لينا نتي بلي غادي تزوجي الا كنتي متافقة مع شي واحد و مفاهمة معاه" و لكن فاش كملات الهضرة رجعات لضحكها: هاي هاي هادشي غير عاودو ليك عليك و دخل ليك لخاطر , اما كن تشوفيه اش اديري ههه اجي ا با تشوف مرتك اش كتقول. زينب: اييلاف راه كنهضر معاك بصح, مهم ناس غادي يجيو عندنا غدا باش يشوفوك راه عيطو لينا قبيلة, ها انا وصيتك لا تمشي حتى يجيو و ديري لينا شي موصيبة. ايلاف: اويلي على غدا!! و شكون هاد عريس الغفلة ا مي لي باغين تلوحوني ليه !؟ زينب: كيعرفو خوك و باك, انا كعما عرفتو غير قالو ليا سميتو يوسف و صافي. ايلاف: يوسف!!!؟ فين عرفني هذا !! زينب: على ما قال ليا خوك بلي شافك العام لي فات فاش كنتي كتمشي مع باك لخدمة, و هضر مع خوك و قال ليه بلي بغى يجي يخطب و لكن قال ليه خوك بلي باقي كتقراي و حتى تكملي عاد يقدر يفاتحك في الموضوع, و من تما ماعاودوش جبدو الموضوع و تناساوه حتى كان على بال خوك بلي صافي سيد دار بناقص, و لكن فاش رجع شافك بالصدفة رجعتي هاد العام رجع سول خوك, ايوا عيطو لينا و غذا جايين. ايلاف: اشنوا هادشي سلم عليه زرب عليه!! سيد عام و هو كيتسنى و ماعارفش واش انقبل و لا لا!!؟. زينب: الله يرضي عليك ا بنتي, انا عارفاك بعقلك و غادي ديري لي يصلاح ليك, نوضي صلي صلاة الاستخارة و ربي كبير. و داكشي لي دارت نيت, في هاد اللحظات بالضبط نسات ارثر و نسات هضرتو و نسات ايامها معاه, ربي ما سد عليها باب حتى فتح ليها باب اخر. ~~~~~~~~~~~~~~~~~~~~ *نهار الخطبة* كانت كالسة في بيتها لابسة كًانضورة في بييج و دايرا زيف موالم معاها, ميكاب خفيف ضريف, لعبات على عينيها دارت ليهم الحكل و ايلاينر حتى بانو هوما لي بارزين فيها, دخلات جودي لي كانت جات قالت انها ماغاديش تفلت هاد النهار و شدات طريق من طنجة غير باش تحضر معاها, اما البنات لوخرين حتى وحدة ماكفاها الوقت باش تجي اسيا و تيماء و عفاف و يسرى كانو باقين في المانيا, و لي في المغرب كان صعيب عليهم يجيو و خلاص كلهم برجالتهم. جودي: واش متأكدة من قرارك ا ايلاف!!؟ ايلاف: الله يدير لي فيها الخير, و انا درت صلاة الاستخارة و الله يكمل بالخير, انا ماغاديش نزرب و نوافق من لول و لكن ماغاديش نجري على الرزق, و الا كان مكتاب ليا فماعندي مناش نهرب. عنقاتها جودي: انا بغيت غير مصلاحتك و داكشي علاش كنسول و الله يكمل بالخير, الا كان كيبان ليك هذا هو الحل انا معاك واخا ما راضياش على هاد الزربة لكن كيف قلت ليك ديما معاك و انبقى معاك في اي قرار خديتيه. تبسمات ليها و يالاه اتجواب ساعة دخول مها زينب قطعها. زينب: يالاه زيدو قدامي, راه كيتسناوك. توكلات على الله و دعات في خاطرها, نازلة في دروج و هي كتفكر انها كانت كتخيل ديما هاد اللحظات و لكن معاه بمجرد تفكريها بحال هاكا ضحكات على راسها "كيفاش واحد ماشي مسلم ايجي يطلب يديها من عند باها و بهاد العادات و التقاليد" ساست افكارها كاملين و دخلو الصالة قالت غير السلام عليكم و كلسات على الباب هي و جودي, مابغات تحاك مع حتى واحد, ملي كلسات و هي ساكتة و الناس كيهضرو ما بيناتهم حدها هزات راسها بقات كتشوف فيهم و كتشوف شكون كاين, كان الاب و الام لي هوما باينين و كانت بنت لي عرفات انها خت العريس, و كانو زوج رجال تقريبا قد قد في العمر و في الفورما, و لكن قدرات تميز فين هو العريس غير بالنظرات لي متاجهين ليها بحكم خوك كان ماكيشوف لجيهتها, عينيها بقاو كيدورو بين ناس و كيرجعو لعريس كتأكد فين فايت ليها شايفاه, حتى حصلها كتشوف فيه و ديك ساعة عاد نطق. يوسف: عمي, واخا نقدر نهضر مع ايلاف بوحدنا !!؟ " اويلي على عمي , و نهضرو بوحدنا !!! زعامة خايبة هادي" و لكن لي صدمها هي موافقة باها, فتوجهو بزوجهم لصالة الصغيرة لي كانت خاوية....... يتبـــــــــع....... تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM