كملت كنسوس راسي من الدقيق ومشيت نحل الباب ولقيت سيف واقف وهاز معاه صاك غير شافني وبدا كايضحك بواحد الطريقة خلاتني نبقى غي نشوف فيه وحسيت بالفراشات... قاليا واش طحتي فشي برميل ديال الدقيق شهاد الحالة عاودت ليه شنو وقع لي وهو ماحبسش من الضحك وحتى أنا بحالو.. مد ليا الصاك وقاليا هاشي سقاطة دوزي بيها الوقت مدام مابغيتيش تخرجي معايا.. وقال ليا إلى كانت شي حاجة ثقيلة قوليها ليا نهزها ليك قبل ما نمشي.. قلت السطل لي كان ثقيل راني حيدتو وشكرتو وبقينا كنهضرو شوية فالباب وقال ليا ردي البال لندى كنحس بشي حاجة مقلقاها مؤخرا وقاليا فاش تبغي تخرجي تمشاي فالليل قوليها ليا ماتبقايش تخرجي بوحدك.. ونا كان عزيز عليا نتمشى حتى نوصل حدا لاكوط.. فعلا مشا ونا سديت الباب ودرت يدي على قلبي وقلت أية رجوع الله ما قدك أنور تزيدي سيف.. وحرفيا ديك العشية ونا كنخمل الدار كل دقيقة يطيح لي سيف فبالي، ضحكتو وعينيه بحال خوه كيتسدو فاش كيضحك وشحال كان زوين بحال إلى ماعمري ماركزت معاه قبل...
جات ندى فالليل وتعشينا وبقينا كنهضرو على منير وكتقول ليا أنا الحياة لي بغيت هي نكملو هاد القراية ونلقاو شي خدمة مستقرة ونرجع نشوف دارنا ونتزوج بمنير ونتي بسيف هادي هي السعادة.. وبقينا كنضحكو.. أنا ماعمري تخيلت راسي مع سيف عامين ونا كنشوفو كثر من أخ لا هو لا منير....
مشينا نعسو والغد ليه فقنا نمشيو لافاك شهيتنا مسدودة حتى من الفطور ماكليناهش... وصلنا لافاك منير محضرش وحتى سيف كنصيفطو ليهم والو حتى واحد منهم ماجاوب وماموالفاش ليهم يغيبو عمرهم داروها... حتى خرجنا مع العشرة وبقينا نصونيو ونعاودو والو... حتى لجوايه الحداش صيفط منير مساج فالگروب لي كنا دايرينو بربعة بينا قال لينا سيف فالسبيطار أنا وندى بقينا غاكنشوفو فبعضياتنا وقلبنا تقبض كنصونيو على منير بهستيرية ونصيفطو مساج ورا خوه ماعرفنا نتيقوه ولا نكذبوه قالينا راهم فالكلينيك الفلاني وبزز باش وقفنا الطاكسي ووصلنا وحنا كنبكيو... ذخلنا كنقلبو بلوك ورا بلوك حتى لقيناهم كلهم واقفين فالكولوار من أنور لجداه، باه، مو، منير، كلهم كانو فحالة يرثى لها هما لي شافوه كي كان... عاود لينا منير كي وقع وكيفاش وصلاتهم الخبار وكيفاش جابوه من السبيطار للكلينيك وحالتو كيف كان... ماعمري نسى الرجفة ديال داك نهار، ماماه كاطيح وتقول ولدي وباه غير ساكت جداه بقات متكية غا فوق الباياس السكر دار فيها ما بغا أنور شاد فمو لي كلها كترعد ماداقتش النعمة من ليلة البارح... كلنا كاندعيو غا يولي بخير، منير لي شافو فقد الأمل كايقول لينا السيد جابوه جثة مخرشش...
جاو لينا الأطباء لي دوزو ليه العملية وما هي وحدة ماهي جوج قالو لينا الولد كلا الدق حتى إلى بقا حي راه صحتو مشات.. باه كايغوت متقولش ليا هكا على ولدي قاليه ولدك طمعنا فيه يفيق من ورا العملية ولكن راه باقي فغيبوبة ولكن ماتخلعوش كاينين لي ذخلو غيبوبة لسنوات وفاقو والولد باقي يالله ماكمل حتى 24 ساعة، أنور قاليه من هادشي كولو نت كطبيب شنو شفتي فيه، قاليه صحتو مشات، رجليه،صدرو، راسو أكثر بلايص تضررو، ماعليكم غير تسناو يفيق ماكملش حتى جملتو حتى خرجات الفرملية من وراه كتعيط وتغوت وذخل كيجري وسدو الباب علينا.. مكنحملش نتفكر هادشي...
خرج الطبيب تاني وقالينا دارو ليه الصعق الكهربائي ولا ماعرفتش شداكشي وخا صدرو كان تهش ولكن رجعات ستقرات حالتو تاني شوية.. قال الباباه خاصنا نديرو ليه عملية أخرى ضرورية وخاص المريض نفسو لي يوقع عليها ولا شي حد من عائلتو باش يتحملو مسؤولية أي حاجة غاتوقع ليه وسطها... قاليه باه إلى كان ولدي غايخرج من هاد المستعجلات كايتنفس وكيف ما كان أنا مستاعد نوقع على أي حاجة...
ذخلوه العملية من 3 حتى لليل... فاللخر بكل بساطة خرجو لينا وقالو الباركة فراسكم البقاء لله المريض مات فآخر لحضات العملية وماقدرناش ننقذوه هاد المرة لا بالجهاز الكهربائي للصعق ولا والو......
حرفيا من بعد ديك الجملة تدمرنا، كل واحد فين طاح كل واحد فين كايضرب براسو فقنت باه كايغوت ماماه كتغوت مشا ليا ولدي، مشا ليا حبيبي والمرضي ديالي مشا كبيدتي صوتها بوحدو يهرس القلب
بلا مانذخل فالتفاصيل كثر كيفاش شفناه آخر مرة كيفاش تذفن كيفاش كانت الحالة الأزمة ديال واليديه كلنا دخلنا فحالة هيستيرية ديال البكا حتى واحد ما صبر حتى واحد، الحنين ديالنا مشا مول الكلمة الزوينة والقلب الكبير مشا لينا، ضعنا كلنا تما ضعنا..
فگنازتو كنا فدارهم العائلة كلهم تجمعو من الصغير للكبير كثر من ثلث يام والدنيا عامرة يسرى وواليديها حتى هما جاو عزاو وكلشي كلشي أي واحد كان كايعرفو... وصل لليل وماماه كل دقيقة تعنقنا وتقول لمنير أجي نشم فيك ريحة ولدي ندمت على كل ثانية مادوزتهاش معاه... ستغليت الدار لي كانت عامرة وطلعت لبيتو نبكي فيها بوحدي وغير ذخلت سديت الباب وشعلت ضو كايبان ليا أنور جالس فوق نموسية خوه وحوايجو حداه وكل أغراضو، ماعرفش بلي أنا لي ذخلت وحط يديه على وجهو يغطي عليه
#يتبع...
ليست هناك تعليقات:
إرسال تعليق