فاش حس بلي شي حد ذخل حط يديه على وجهو، ماتوقعتش غانلقاه تما وأنا نسيتو فديك الوقت أصلا.. باقي حتى واحد فينا ماستوعب الموت ديال سيف، ماحسيتش براسي إمتا گلست حداه ودرت يدي على وجهو بعدت ليه يديه أول مرة نشوفو فموقف بحال هكا وماعمري ضنيت أساسا شي نهار نشوفو هكا.. اللهم إن نعود بك من قهر الرجال.. دموع الراجل من أصعاب الحوايج لي ممكن يشوفها الواحد، سيف ماكانش مجرد أخ كان خوه الوحيد وصاحبو وعشيرو وكلشي... ماعمري ننسا الضعف لي شفت فعينيه فاش جات فعينيا ماقدرتش ما نعنقوش ونقوليه الله يصبرك كلنا فقدناه كلنا تصدمنا ونا يالله غا عامين باش عرفتو خلي هو لي 20 عام وهو عايش معاه ومن دمو، قلت ليه بلي كان فخور بيه وماكاينش شي مجلس نهظرو فيه ومايجبدوش فالهضرة، ويشكرو والفرحة كتبان فوجهو والفخر...
من بعد هاد الهضرة حتى واحد فينا ماهضر مزال...
ذخلات جداه وبنت عمو للبيت وشعلات الضو ولقاتنا فديك الوضعية ونضت بعدت عليه بالزربة وهما طبعا فهمونا غلط بديت كنتأتأ عليها حشمت بزاف مايمكنش الدم برد ليا فالركابي قلت ليها خالتي راه غير كنت قالت سكتي يا قليلة العفة ستاغليتي طيبة ناس هاد الدار وذخلتي تقطعي وسط ولادهم ذفلات عليا وقالت الله يمسخك، ناض أنور كايمسح وجهو وقاليها جدة راك مرا كبيرة وواعية أش هاد الأسلوب كتهضري بيه بقا كلمة منو كلمة منها قالت ليه شنو كنتي متوقع مني ندير نزغرت ليك نت وهاد قليلة الحياء والتربية ومن حقك ماتربايش ونتي باك تخلا عليكم ونتي صغيرة شكون غايربيك، هزات الهضرة لي قالت ليهم ندى داك النهار ورجعاتها ليا، دارت بيا الدنيا كون مكانتش مرا كبيرة والعزا ماكان حد غايحيدها من يدي، خليتو كايتناقش معاها وخرجت من البيت و تبعاتني بنت عمو كتستفسر حتى هي قلت ليها أنور فموقف لا يحسد عليه ماداز على موت خوه والو وباقي ما مستوعبش ومامتقبلش... كون ذخلتي عليه ولقيتيه فديك الحالة مكنتيش غاتحاولي تواسيه...
مكنتش باغا نخلي مامات أيوب ولكن عيينا بزاف والطاقة ديالنا تقادات توادعنا معاها وهي غير معنقة مها وكتبكي وخرجنا نمشيو أنا ومنير وندى... كانت البلاصة فين كان مبلاصي سيف طوموبيلتو أول مرة مبلاصية فيها طوموبيلة أخرى... بقينا واقفين كنشوفو ونبكيو قربنا منير ليه وعنقنا بجوج وشدينا طاكسي رجعنا للدار طمن علينا منير وبقينا حتى حنا حتى طمنا بلي وصل بخير للدار...
ولينا كنخافو على بعضياتنا بزاف وكثر من أي وقت... حتى واحد فينا مانعس ديك لليلة كلنا كنا مخربقين.. رجعت كنقرا مساجاتي مع سيف وضحكنا فالگروب.. كنتفكر اهتمامو وعلاقتنا كيف كانت.. وكنتفكر فاش قاليا غاتندمي إلى ماخرجتيش معايا.. كون غا خرجت معاه كون كتاب ومتنا بجوج على الأقل.. هادشي لي كان كيضور فراسي وقتها... تفكرت آخر هضرتو وكيفاش كان كيوصي بحال إلى كان حاس..
رجعنا لافاك من بعد ما غيبنا مدة غادا الأسبوع.. ماكانش عندنا الجهد لا للمحاضرات ولا الإمتحانات.. سيف مكاينش معانا ماقديناش نتقبلوها كتائبنا كل بلاصة وكل قنت وكل حاجة كتفكرنا فيه... بقد ما مكناش قادرين نتجمعو مزال بقد ما كنا كنحاولو نبقاو مجموعين ونطمنو على بعضياتنا حيث كنا خايفين بزاف من الفقدان..
منير ولا مهتم لينا كثر وراد البال وحاس بالمسؤولية من جيهتنا...
ماقطعناش التواصل مع مامات سيف ديما كانصيفطو ليها ونهضرو معاها ونبكيو معاها كانت مصرة نجيو عندها ولكن داكشي لي وقع نهار العزا ماخلانيش نتجرأ ونمشي بسهولة...
الأيام ولات مملة والجو مكتئب ماكنضنش بلي طول ديك المدة طرات شي حاجة لي خلاتنا نضحكو ولا غي نبتاسمو على الأقل..
رجعت من لافاك ولقيت النمرة ديال سيف مصيفطا ليا وقالي نتلاقاو فالجردة ديال لافاك..
خرجت من الدار بلا عقل حتى من السوارت ماهزيتهمش وبقيت كنجري بلا عقل..
#يتبع..
ليست هناك تعليقات:
إرسال تعليق