بديت كنتفكر الذل لي كنت فيه ولي مزال غانبان ليه فيه مدام وصلت حتى لدارهم قلت صافي السيد غايقول هادي حاشة واش تكون إنسان هادي لصقة، سيف كان فرحان بزاف ديك لليلة قطع الحلوة فجو ديال الضحك وبدا كل واحد كايعطيه الكادو لي جاب ليه ونا فكل مرة نحاول نشوف فأنور نلقاه كايشوف فيا ونعاود نحيد عيني بالزربة يدي قربت نفوت فيهم ضفاري من كثرة التوتر لي حسيت غايجيكم هادشي تصطية ولكن راه كان هداك الحب الأول ماغايحس بيا غالي مجربة... أنا شريت لسيف واحد الريحة على قد جهدي، فداك الوقت كانت الريحة هي أكثر هدية ممكن تعطى للواحد، وصلات نوبة باباه وعطاه واحد البواطة فاش حلها لقا سوارت ديال طوموبيل وعنقو وقاليه تستاهل ماحسن أولدي ولكن جالحال فالوقت فاش رحلنا وهادي وشفت سيف زاد شد وزير على باباه ماقدرتش نشد فراسي ومانبكيش فديك اللحظة... مشهد ديال أب والإبن ديالو... حسيت بمشاعر ناذرا فين كنحس بيها وآخر مرة كانت فاش جا عندي خالي...
يسرى بنت عمهم شدات كلينيكس ومداتو ليا طبطبات على كتفي وشفت فأنور وغامازاد بكيت.. هما مافهمو والو فديك اللحضة حتى قالت ليهم ندى قصتي مع بابا ومدات ليا كاس ديال العصير نشربو وتكفح عليا وعليها ، متكرهتش كون ذفلت على راسي فديك الوقيتة بالضبط فاش كان كلشي فرحان جات الأنسة دليلة خسرات ليهم كلشي بالبكا.. طلعات معايا ماماه تعطيني باش نبدل أنا وندى وخا حاولنا نقنعوها بلي خاصنا نمشيو أصلا ولكن حكرو علينا ما نمشيو حتى نتعشاو معاهم وديجا كنا قادينا العشا قبل...

فاش كنا الفوق ندى ضحكات معايا وقالت ليا باينة خو سيف تزعط السيد يدور يدور ونلقاه كايشوف ... انا تصدمت من الملاحظة ديالها... ولكن لي كان فبالي هو أنه كايشوف غير حيث ماعمرة توقع التلميذة ديالو لي كانت ديما خالقا الهايلالة مع الإدارة غير باش تحول الأقسام لي كايشد غايجي اليوم لي غايشوفها فقاع دارو والجريدة لي كتبت كلما تنسد عينيا نتفكر كل حرف منها....
ندى حيدات القميجة لي خسرت ليها وبدلاتها بلي عطاتها الأم ديال أنور وسيف وحتى أنا نفس الشي مع الكسيوة لي كنت لابساها... كان البلاكار ديالها ماشاء الله متنوع وزوين تقول انا لي كنت فالأربعينات ماشي هي... رشات لينا واحد الرويحة وعطاتنا بزوج توينگات مع السلسلة ديالهم وخا حنا مادينا ليها والو مشينا بيدينا خاويين من غير كادو سيف، حسينا بالإحراج، قالت لينا ماتحشموش ويديها على كتافنا بزوج سيف ديما كايشكر ليا فيكم لا نتوما لا منير وفرحانة يكون عندو أصدقاء بحالكم وهو لي عمرو ماجا عاود ليا قبل منكم على الصحاب... كنت كنشوف ماماه وباباه منفتحين بزاف فلو جيت الڤيلاج ديالنا مستحيل نمشي نحضر عيد ميلاد شي حد كنقرا معاه بحجة الصداقة مستحيل....
قالت لينا خليو البواطات هنا حتى نتعشاو وهبطنا نشعلو على الدجاج فالفران..
وبينما حنا فالكوزينة سمعنا جداه كتشكر فيسرى وتقول تبارك الله على بنت ولدي بنت الأصل والمفصل كملات قرايتها وجاية تسطاجي الله يحجب حفيذتي فاش كانت تقرا عمر فاتها المغرب برا الدار إيه اما جيل دابا يبات گاع ما عندو حياء، انا وندى بقينا كانشوفو فبعضياتنا وعارفين الهضرة علينا....
خرجات مامات أنور كتجمع الطبلة وجا أنور عاونها أنا كنت مدورة وجهي كنطل على الفران وقالت ليا ندى دوري شدي البلاطو... حساب لي من عند ماماه ولقيتو هو أنور... العرض ديال داك البلاطو هو الفاصل الوحيد بيناتنا، الفراشات داو خدمتهم وقلبو ليا معدتي حتى فارق الطول بيناتنا كان زوين وبديت كنتخيل راسي فوق العمارية وهذا بلاطو الحليب والتمر وصوت الزغاريت فوذنيا والنگافات... سهيت حتى قالي غا حيدي أنا غانحطو ونا بقيت كنقول ليه ها.... ها... حسيت بيه حابس الضحكة باش ماتمشيش ديك الصورة المهيبة لي طول السنوات لي عرفتو فيها وهو كايرسمها... واخا أقلبي وخا.. كانت هاذيك أول مرة نهضرو فيه خارج إطار الأستاذ وتلميذتو.. كان موقف بسيط ولكن انا مشيت بعيد...
حط البلاطو وخرج وندى دفعاتني وقالت ليا لي شافكم يقول هادو كانو يتعارفو من زمان... من زمان... أحا قلبي زمان وسكتي

ذخل سيف وباباه ومنير من برا من بعد ما شافو الطوموبيل لي شرا ليه باباه لي غاتكون ليها قصة حتى هي

تعشينا وتعرفنا على بعضياتنا كثر فداك العشا

يسرى صدقات عندها 25 عام وشدات الماستر ديالها وجات تسطاجي هنايا واحد المدة...

وأنور شاف فيا وقال لخوه إيوا ماعرفتيناش على ضيافك
#يتبع..