الأسود 🖤 الجزء 52 🔥🔥🔥🔥🔥🔥 ( تتمة من بعد 370 لايك ❤️ الى كمل التفاعل نزيد جزء اخر ليلة مع 00:00🔥🔥🔥🔥🔥) سلوى : توجهت عند أم يوسف ومهدي (عدوزتي) وقفت حداها وهي كتشوف فيا بنظرات حقد واحتقار بتاسمت ليها في وجهها مابغيتش نكون من العريسات المسخوطات الواليدة : شنو بغيتي أسلوى شنو خاصك سلوى : وينو هاذ البنت عزيزة عليا بزاف داكشي علاش رجعتها ليك بغيتها تكبر مع ماماها وماتكبرش بلا أم بحالي أنا مولات الفكرة يرجعوها ليك الواليدة : واو شنو كتسناي نجي نعنقك ونفرح بيك كاع هاذا حنان فيك شحال من ولد يتمتوه ياك نتي نيت لي بعدتي عليا ولدي سلوى : نتي حالة خاصة نتي عدوزتي أقل حاجة نديرها معاك اخالتي ، وإلى بغيتي ولدك حتا هو نرجعو ليك مانخسرش ليك مهدي : كنت كنشوف فيها كيفاش كتلعب بحركات ايديها وملامح وجهها كتبان بحال الأفعى السامة كلامها كيقول حاجة وملامحها كيدلو على الغدر علي : شنو بغيتي أسلوى شنو جابك عندنا سلوى : جيث على ود 2 حوايج الأولى هي أنا عرسي من دابا شوية العريسات في هاذ لحظة كيكونو كيتقادو عند الكوافورة وانا مع فيا الصواب بغيت ندي أم راجلي تحضر عرس ولدها ، غادي تمشي معايا أخالتي الواليدة : أنا ولادي معايا دابا ماعنديش شي ولد أخر سلوى : بصراحة أخالتي مابغيتش نكون قبيحة ولكن بغيتك تعرفي أن العراضة اجبارية وماشي لخاطرك ترفضي حيث بغيت نحس بأن راجلي عندو شي حد في العائلة واخا مسكين هو ماعارفش بيلا عندو عائلة من الأساس ولكن انا بغيت نحس بشي حد من عائلتو كاين ويكبر بينا راكي معروضة وأتمشي معانا حتا نتا أعلي باش يحساب ليه بيلا جاية معاك الواليدة : ماعندي ماندير بيك لانتي لاهو مايشرفنيش نحضر عرس مجرمين بحالكم علي : سمعي اخالتي الهدرة سيري بدلي حوايجك .... شنو الحاجة 2 أسلوى سلوى : الحاجة التانية كتخص سناء ، بديت كنشوف فيها وكنبتاسم وكنقلي ليها السم .... الله أكبر تهرستي بقيتي فيا الحبيبة ديالي سمعي اسناء دوك الأحلام لي حلمتي مع أمين أنا غادي نعيشهم معاه بلاصتك نتي خطبك وأنا لي انتزوج بيه كنت من مدة كنشوفكم كيبغي يخرج ليا العقل وباش نكونو صريحين أنا لي قتارحت على أحمد يتزوج بيك باش تبعدي منو وتفارقو وأنا الوحيدة لي كنت عارفة لعبة أمين من البداية وبيلا مبادل الدور معاك امهدي ومع ذالك بقيت ساكتة وكنتفرج ماقلتها لحد حيث كنت كنبغي أمين كتر من القياس تقدرو تقولو عليا الجنية العاشقة لي حاطة العين على حبيبها في كل لحظة ومتبعاه في جميع خطواتو هههههه في الأخير خديتو ليك بطريقة ماكيتقبلهاش العقل اسناء سناء : شنو يحساب ليك غادي تفقصيني و تحطميني بهاذ الهدرة إلى كان اتاخذيه بديك الطريقة غير بصحتك بيه مزال ايخرجو فيكم دعاوي الناس نتي وياه سلوى : تتتتت ماشي هاذشي علاش جيت أنا ماغديش نفقسك بهاذشي جيت ندي بنتك لي هي بنت راجلي خاصها تعيش مع باها ماجيتش و عتقتها داك النهار غير هكاك اريها ليا سناء : لا هاذي بنتي بعدي منها خلي ليا بنتي لاااااااااااااااااااا خديتي أمين خلي ليا البنت شنو بغيتي كثر سلوى : غادي ندي ليك كولشي أندمرك كيف دمرتيني أري ليا البنت صافي مقررة أني غادي نديها معايا بديت كنحاول نحيدها ليها وهي كتغوت وكتقاوم فيا واخا عندها يد وحدة دامي : سلوى خلي البنت لمها عفاك خودي أي حاجة خلي البنت هي لي بقات عندها فايت حرمتوها من حياتها من قبل بقات عندها هاذ البنت ماتحرميهاش منها عفاك ياسمين : نتي معاك أمين وتقدري تولدي ولاد معاه خلي ليها البنت أسلوى حسناء أم سناء: عفاك خوديني أنا وخلي حفيدتي سلوى : شنو غادي ندير بيك نتي أنا غادي ندي تسنيم بنتنا أنا ويوسف بديت كنشوف في الحارس ديالي ... جيب البنت والى قاومات قتل البنت قدام عينيها سناء : لا ماديوش ليا بنتي هي حياتي عفاك أسلوى نولي عبدة عندك غير ماتفرقينيش عليها بنتي مانقدرش نستحمل فراقها عفاككك نبوس ليك رجليك خلي ليا بنتي سلوى : موتي نتي كاع شكون مسوق ليك ... سمير نفذ الأمر ديالي دامي : صافي غير عطيها البنت أسناء صافي خليها ليه دابا سلوى : شد منها سمير البنت بعد مقاومة طويلة من سناء وتوجه بيها لطومبيل وسناء بغات تحماق غير كتغوت سناء : سامي مهدي علي ديرو شيحاجة غادي يديو ليا بنتي عيب عليكم نتوما 3 رجال ماقادرين ديرو والو قدام مرا عيب عليكم الشمايت سلوى : ناضت بغات ضربني شديتها من عنقها قجيتها حتا بغات تخرج روحها مهدي : طلقيها أسلوى اتقتليها الواليدة : مجرمة نتي قلبك قاصح كيف الحجر وباينة نتي هي السبب حتا ولا ولدي هكاك الله يعطيك موصيبة والله ينتاقم منك وربي ماغديش يدوزها ليك وكلت عليكم ربي المجرمين علي : مقدرتش نتدخل كنت هاز هم كبير عارف الى تدخلت ضد سلوى اتسلط عليا الذئاب وانولي خاسر العائلة كاملة ولكن بهاذ التصرفات زادت حقداتني ابلاتي يجي الوقت المناسب انا بطبيعتي ماكندخل حتا نكون في حالة قوة دامي بنبرة صوت قوية : طلقيها أسلوى سلوى : اوامرك اصحبتي دامي ، طلقت سناء طاحت الأرض بدات كترجع النفس الواليدة : نتي ميكروبة ماشي بشر بحالنا سيري عطينا التيساع سلوى :ظلمتيني اخالتي أنا ظريفة نتوما لي كتعاملوني خايب وماكتفهمونيش واش دابا حفيدتك تسنيم غادي نديها لشي حد غريب اخالتي ؟ انديها لباها وخاصك تكوني فرحانة حيث اتعيش مع ولدك نتي حسن من بنت برانية الواليدة : يا المجرمة ماغديش تحسي بإحساس الأم كيفاش قدرتي تبعدي البنت على مها وبعدتو عليا ولادي من قبل ربي غادي ينتاقم منك نتي والمجرمين لي معاك وكيف عاملتينا غادي يوقع ليك نفس الحاجة وعقلي على كلامي والله ماتخرج ليك سليمة سلوى : شحال فيك ديال الهدرة هانتي كعيتيني زعما كبرت بيك تحضري العرس ساعة لهلا خليك هنا وباش نصحح عليك معلوماتك أنا ماشي قبيحة او شريرة بالعكس أنا هو الملاك المنقد ديالكم كاملين فراسكم بيلا أنا لي نقدت أمين من الموت وأنا لي وافقت على مشروع الأسود أما كون مات شحال هاذا ونزيدك رجال المخابرات مالقاوكش بالصدفة ورجعوك عند عائلتك اخالتي ، نرجع بيك فلاش باك قبل ما أمين يولي معانا ، كنت دخلتو غرفة التحكم ديال المقر ديالنا خليتو يشوفك وفي نفس الوقت امرت رجالي يشعلو شاشة الكاميرات باش يشوف مكان تواجدك وأنا عارفاه ذكي ويقدر يضحي براسو على ودكم و ملي غادي يشوف داك البلان ايحاول يختارق النظام ديالنا باش يحررك ولكن كان مزال خاصو كيفاش يوصل لغرفة التحكم حيث مشددين عليه الحراسة ، واحد النهار من الأيام كان خويا في مهمة استغليت الفرصة و نقصت الحراسة بزاف وامرت رجالنا يخليو غرفة التحكم محلولة وهكذا وصل ليها وقدر يسيفط أماكن مقراتنا لرجال المخابرات وهكذا وصلو ليك داكشي علاش خديت ليك البنت قبل ، انزيدكم أنا لي طيحت على الأسود فكرة تعاون علي معانا باش تبقاو عايشين وزدت قلت ليه يرجع أية وكيف شفتو أنا لي عتقت تسنيم من الموت وهادشي كامل درتو على ودكم حيث كنبغيكم وكنبغي ولدك اخالتي حادة ، نتوما عطيتوني السعادة مابغيتش نردها بسوء داكشي علاش نتوما دابا تحت الحماية ديالنا وكنواعدكم حتا حد مايأذيكم يله الله يعاون مهدي : وهي خارجة جريتها من شعرها وشنقت عليها شنو كيحساب ليك راسك كديري اسلوى سمير الحارس الشخصي ديال سلوى : طلقها أو نقتلك سلوى : إيييه سمير نزل سلاحك هاذشي كيوقع بين العائلات .... صحيح بحال خوك تبارك الله سمع ألوسي الحبيب هاذ الزعامة ماتفيدك بوالو معانا حسن ليك متعاودش دير معايا هكذا وحيث وليت جزء من العائلة غادي نسامحك هاذ المرة وياك تعاود معايا القباحة مهدي : وشنو أديري اتقتليني مثلا مخايفش من الموت سلوى : خالتي حادة كتعرفي تولدي الرجال مهدي شجاع بحال خوه تخيلو معايا أسود واحد شنو داير في البشر وكمية الرعب لي مركب فيهم اما إلى ولاو عندنا 2 من الأسود وتوأم من الفوق اتكون ضربة معلم أش بان ليك ... الى عاودتي هكدا نردك بحال خوك وماشي بعيد تولي بحالو في الشر وكتر يله طلق مني ، دفعتو وكملت طريقي مهدي : علاش طلقتو عليه الأسود بالضبط سلوى : حيث لون قلبو أسود يله بسلامة ماسخيتش بيكم ولكن تعطلت على العرس المرة الجاية ندوز معاكم وقت أطول ... خرجت من عندهم وتاجهت سلا بزربة أمرت الحراس ياخدو البنت لعند دار عمتي ويتهلاو فيها وأنا قصدت الكوافورة كنقاد حالتي وكنت معطلة دغيا زربات عليا قاديت حالتي صاوبت شعري والماكياج ديال العريسات وتوجهت لقاعة الأفراح لي فيها عرسي حطني الشيفور عند الباب ديال القاعة وكان المكان محروس مزيان ، توجهت الباب لي كيدي للغرفة ديال تبدال الحوايج تلقات ليا عمتي ونمرود في طريق عمة سلوى : أش هاذ الوقت ابنتي تعطلتي بزاف سلوى : الكوافورة عطلاتني تا دابا مزال الحال ياك مزال ماوصلش يوسف عمة سلوى : مزال ولكن طلقي راسك نمرود : جيتي زوينة جا معاك الماكياج طاح عليك السر اختيتو _ شكرا خويا أول مرة تقول عليا شيحاجة زوينة موهيم نخليك تعطلت نمشي نوجد راسي دخلت لقيت النگافة كتسناني سلمت عليها و بدات كتوجدني لبساتني لباس الحنة الخضرة من بعد داوني المدخل ديال القاعة ومع الدخلة طلعوني فوق العمارية لي كيقولو ليها النصاصية ( مامغطياش من الفوق ) وقدامي 4 النگافات وأنا داخلة بديت كنشوف في الناس لي كانو معروضين وحشمانة وفي نفس الوقت فرحانة والمغني المشهور طاهور والجروب ديالو كيغنيو . ( لالة العروسة حنات زغرتو ليها واهيا البنات لا سلوى حنات زغرتو ليها واهيا البنات ) ... وكيدوروني بالعمارية وأنا كندير ليهم باي باي وكندور عيني كنقلب على بابا مابانش ليا وكنبرگگ في الناس لي حاضرين كنشوف شكون لي حاضر من ناس لي كنعرف ومستمتعة بالموسيقى الشعبية ماكرهتش نوض نشطح ولكن دوماج خاصني نرزن في نهاري بقاو كيدورو بيا تقريبا لمدة 10 دقايق ونزلوني بداو غاديين بيا النگافات لبلاصتي وهوما كيرددو التعشاق والزغاريت ( الصلاة والسلام على رسول الله، إلا جاه سيدنا محمد، الله معا الجاه العالي) جلست قادوني وجات نقاشة كتنقش ليا والناس كيجيو يباركو ليا فاش سلات بديت هازة ايدي وكنتسنا الحنة تنشف مع كرمات حيدوها ليا وبقيت كنسنا حتا بدينا كنسمعو لدقة المراكشية عرفت أنا زماني يوسف جا . _ وجدت راسي ضربت واحد الجبادور في الخضر كنت خديتوو على ود دخلة ديال العرس وخشيت الكومبلي في لون الأسود في كوفر ديال طومبيل وتوجهنا سلا أنا ورجالي ودابا أنا قدام القاعة في إيدي بوكي دالورد ورجالي هازين دهاز سلوى وكنشطحو على إيقاع دقة المراكشية أنا ورجالي ديال الفرقة الخاصة لي عاطيهم نهار كونجي وعارض عليهم كمدعويين وماشي حراس مصطفى: تبارك الله على مولاي السلطان نمرود : مرحبا بيكم عندنا _ شكرا نسيبي نمرود ... رحب بينا نمرود وعماتو وتمينا داخلين متوجهين للمكان لي مريحة في سلوى وصلت لعندها جلست قالت ليا النگافة نحيد ليها الغطا على وجهها ونبوسها في جبهتها درت لي قالت وتصدمت في سلوى طلعات قوقة هاذ النهار خديت زين وجا معاها المكياج التقيل ، وحنا جالسين كنشوفو ناس كيشطحو على الدقة المراكشية هي يجرنا فهد فهد : نوضو تشطحوو _ نضنا كنشطحو مجموعين ونمرود كيشتت الفلوس ترشرش وحنا زاهيين حتا سلاو الغنى ورجعنا جلسنا بلايصنا ورجالي تفرقو على الطابلات ريحو ... هاي هاي على مرتي العزيزة في كنتي مخبية هاذ زين كامل سلوى : حتا حاجة مامخبية كلشي كان قدامك _ ناري ونشدك انفتارسك قولي ليا شكون هاذ الناس ... بدات كتعرفني على الناس لي كتعرف سلوى : هاذيك لي لابسة الغوز في الطبلة 3 ومعاها 2 بنات وولد صغير هاذيك هي مرات البوص وولادو _ شافوني كنشوف فيهم دارت ليا مرتو باي باي تا أنا رديت عليها سلام وكنحيي فيهم بديك الحشمة ديال العرسان النگافة : لا سلوى نوضو خاص تمشي تبدلي _ مشينا معاها سلوى بدلات حوايجها لبسات لبسة الشمالية وتمينا داخلين مشاديين والنگفات تابعينا دارو ليا القوق في راسي وواحد المغنية كتغني أغاني شعبية شمالية مشينا ريحنا وحنا حاطين يد على يد ... فين هو باك تعطل سلوى : ماعرفتش احبيبي ماشتوش قال ليا ماغديش نتعطل ولكن موفاش ماعندو كلمة _ بقينا كنهدرو ومستمتعين بالحظة وكنتصورو حتا نوضونا نگفات باش سلوى تبدل حوايجها تاني وهاذ المرة لبسة الفاسية سلوى حطاتها لبسة الفاسية كانت لابسة قفطان في الأصفر البارد وتاج كبير على راسها بديت مطلعها عليها وكنقول ليها كيلوباترا وماكانتش كتلبس هكذا سلوى : سير طنز على شي حد آخر _ ضربت جبادور في صفر كانت وخداه ليا سلوى احتا لقيتو في البيت لي كنبدلو فيه وقفنا في الدخلة ديال القاعة وطلعونا بجوج فوق العمارية النصاصية ودخلونا بدا الفنان ديالنا طاهور كيغني أغنية فاسية هادئة وكيدورو بينا فرقة العمارية وسط القاعة وأنا كنصفق بشوية وداير فيها حشمان هو يقلبها شعبي نضت وقفت فوق العمارية وبقيت كنشطح ليهم وكلشي كيضحك وفرحان لينا حت نزلونا وشدينا في بعضياتنا وحنا كنشطحو بجوج بينا ، جرات سلوى وحدة من عماتها تشطح معانا من بعد شوية ديال الشطيح مشينا بلايصنا بيما كيبان لينا الرئيس داخل ومعاه واحد الشخص لي الهيئة ديالو جميلة وراقية وداخل واحد الدخلة مهيبة يد في جيب ويد شاد بيها صيگار وكنظن هاذا هو البوص وكان جاي معاهم نمرود وعدد كبير من رجالهم سلوى : نوض أيوسف وقف البوص جاي _ قربو لينا وقفنا احتراما ليهم و كنسلمو عليهم الرئيس : الله يكمل كلشي مبارك ومسعود اوليداتي نعرفكم على البوص البوص : مبروك عليكم اوليداتي فرحت ليكم _ شرف لينا سيادتكم تشرفونا اليوم نهار كبير لينا البوص : خبارك كاملة كتوصلني راك عاجبني ومفتاخر بيك أولدي يوسف _ شكرا سيدي شرف كبير ليا تقول ليا هاذ الكلام وأنا تحت أمرك في أي أمر سيدي البوص : رتاح دابا شي أيام ودوز شهر العسل ديالك على خاطرك من بعد محتاجك في مهمات كتار _ سيدي العمل هو الأول حنا ماغديش ندوزو شهر العسل غادي نبقاو هنا البوص : هاذشي باش كتعجبني كتفضل الخدمة على كلشي والى بقيتي هكذا غادي توصل القمة معايا الرئيس : سي مندر ( البوص ) وصل الوقت باش نكاتبوهم _ دخل العدول مادوا معانا ماوالو قال 2 كلمات سينيو هنا سينينا ليه ومشا وبقينا كنتصورو مع الرئيس لي هو نسيبي والبوص البوص : نخليكم نمشي نريح مع عائلتي الرئيس : كيف جاكم العرس لي وجدت ليكم سلوى : زوين بزاف فرحانة شكرا الرئيس : من واجبي نسعدكم نتوما وليداتي فراسكم موجد ليكم تذاكر للمالديف دوزو شهر العسل تما _ لا أسيدي خلينا هنا المالديف من بعد سلوى : يوسف شنو كتقول واش انبقاو في المغرب _ غادي نبقاو هنا ولا عرفتي شنو يله ندوزو شي أيام في أكادير الرئيس : فكرة مزيانة سيرو أكادير وريحو في الأوطيل ديالي حتا تعياو ورجعو يله هاني نمشي نجلس سلوى : مالك اصحبي حرمتيها علينا المالديف هي أكادير وبازززززز _ ماكتهمش البلاصة موهيم نكونو بجوج احبي البلاصة لي تكوني معايا فيها نتي كنحس بيها أحسن بلاصة على الكرة الأرضية أنور عينيا ... بقيت كنقنع فيها حتا قتانعت و السرباية كيحطو في الحلاوي والعصير وحنا داتنا النگافة البيت لي كنبدلو فيه حوايحنا وجابو لينا حقنا من الماكلة كلينا وبدلنا حوايجنا لبسوها هي تكشيطة بيضة مزوقة بالاصفر وتاج فوق راسها ... ناري طلعات زوينة بديت كنقول ليها زبدة ومنين نبدا مامصدقش واخد هاذ الزين سلوى : غير صدق الحبيب ديالي يله سير بدل خلاص _ لبست الكومبلي ديالي وتمينا غاديين وجلسو سلوى فوق العمارية وطلعوها وكانو 8 لي هازين العمارية وأنا قدامها بين 2 لولين لي هازين العمارية وداخل بكل تقة في النفس وكنتمشا بالنخوة ومع دخلنا بدا الغنا ( ألف هنية وهنية الآلة سلوى فوق العمارية زغرتو ليها ) وحنا داخلين كنديرو ليهم باي باي وكنشوف في رجالي كيشيرو ليا بديهم مشيت وأنا كنرد ليهم التحية ولي هازين العمارية كيديرو حركات بديهم وصلاتني النگافة بلاصتي وبديت كنتفرج في سلوى وهي فوق العمارية وفرحان بيها فاش نزلات جابوها حدايا سلوى : ياسلام أحسن ركبة هي ديال العمارية _ متأكدة أحسن ركبة هي ديال العمارية فهماتها طايرة سلوى : هههههههه كاين ماحسن نسيت _ ناري على المدام عندي شحال كنحماق عليها كتسالي معايا العسيلة ديالي . بقينا كنهدرو وكنبرگگو في ناس كيف أي عرسان بيما بدات كتحط الماكلة نضنا ريحنا في طابلة العرسان جا البوص ومرتو والرئيس و 2 خوتاتو ونمرود بركو معانا وكنتحدثو وكناكلو في لحم الغزال لي بنين دقتو عجبني طحت عليه عما من وراه تحطات بسطيلة بالحوت ثم لحم بالبرقوق ومالذ وطاب من الديسير الخير غير مشتت في العرس سالينا ماكلتنا نضنا بيت تبدال تاني بدلات سلوى لبسات لبسة سوسية ودخلنا دوزنا لبسة السوسية و2 لبسات آخرين وأخيرا وصلنا لأخر لبسة .... 11 الليل دابا وحنا مزال هنا عييت سلوى : مابقا والو هاذي آخر لبسة _ لبسات اللبسة البيضة لي كتكون في آخر العرس ودخلنا مشادين وصلنا بلاصتنا ريحنا جابو النگافات الحليب والخواتم والتمر معمر باللوز كيف جميع العرسان لبسنا بعضنا الخواتم وشربنا بعضياتنا الحليب وكلينا التمر وبدينا كنقطعو في الطورطة كنوكلو في بعضياتنا شوية جاو ناس يتصورو معانا مصطفى: نمرود فهد يله نتصورو ...يوسف سلوى الله يكمل بالخير فهد : نمرود ضحك في هاذ التصويرة بين سنانك نشوفو ضحكتك _ خليوه هاذاك ماكيضحك حتا كيقتل الناس دابا نخليه يضحك نمرود : مبروك عليكم مرة أخرى ايمتا غادي تمشيو سلوى : دابا نيت صافي رآه سالا العرس _ تصورنا مجموعين وهكذا سالا العرس مشات سلوى البيت تبدال وانا عيط ليا البوص باش يتكلم معايا توجهت عندو واحد الركينة خاوية وقفت وقفة عسكرية البوص : سمع انقول ليك واحد الهدرة تبقا بيني وبينك ، بغيتك تبقا على هاذ المنوال ووعد مني غادي نعطيك القوة والسلطة لي عمرك حلمتي بيهم وتولي يدي ليمنا ديالي بشرط ديما تبقا وفي لينا وتنفد جميع الأوامر ديالنا _ أنا تحت أمرك سيدي أمر وانا نفذ البوص : سمعني مزيان عندي فرقة خاصة بالمهمات السرية وتنظيف الوسخ لي كيخلوه الذئاب من وراهم ماكيعرفها حد من غيري انا ونسيبك سميتها فرقة الحشاشين ماكيبانوش في الواجهة ولي خاصك تعرف أنهم محترفين و أقوا من الذئاب بسنوات ضوئية ... يتبع ( ديدكاس ل Hafida norr وشكرا على سمية الفرقة الخاصة ) ( قرا وتفاعل وخلي كليمة زوينة بحالك 🌹 ومتنساش طاكي عشرانك يكمل التفاعل نزيد جزء اخر 🔥) #قصصمغربية #قصصرعب #قصه #قصص #قصصرومانسيىة تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM