قصة المزحة #الجزء 30 : ارثر: الحل ساهل , ماعليك غير تبعد عليها و تعطيها تيساع واحد المدة و ديك الساعة عاد اتحس بيك و نتا ديما خانقها فينما ضور تلقاك باتريك: داكشي لي غادي ندير. ارثر: احسن حاجة, شوف انا غادي غدا لنوريج على قبل المشروع تما و انكلس شي شهر باش نريح راسي, يالاه حتى نتا معايا لاجتماع و كلس واحد سيمانة منها تبعد عليها باش تحس بيك و منها تونسني. اش قلتي ؟ باتريك: حتى هذا حل, اوكي مشات, نمشي تقطع البيي انا دابا تهلا صافي باتريك خدا قرار باش يبعد على جودي باش تحس بيه شوية و اصلا جودي راسها القاصح داكشي لي تستاهل و كيف كلشي عارف بلي الواحد ماكيحس بالحاجة حتى كيفقدها, قطع باتريك البيي و مشا فحالو باش يوجد الفاليز بعدما خرج هو و ارثر. *عند ايلاف* جودي: و الله الا دارها سيد بصح ايلاف: اشنو دار ؟ جودي عاودات لايلاف اش طرا بينها و بين باتريك الصباح. ايلاف: هههه و الله حتى حمقة و بان ليا سيد طاح فيك طيحة نيت, ايوا مزيان ملي درتي ليه هاكاك اما كن تبعتي هضرتي كن شد فيك شدة العمى في الضلمة ايوا شكون بحالك هانتي تهنيتي جودي: و من هاد الناحية تهنين و لكن جاتني عجب مولف ديما في ليل يصيفط ليا ميساج و لا يعيط و ليوم والو. ايلاف: لي دارها بيديه يفكها بسنيه احبيبة هههه ايوا تحملي عواقب كلامك جودي: ها انا ساكتة صافي نعسي تصبحي على خير. صباح جديد فاقت جودي صلات و فيقات معاها ايلاف الا ان هاذ الاخيرة زارتها خالتنا و مقدرانش تنوض بحكم هاد الحاجة كتجيها مجهدة تشوفوها تحلفو عليها حتى حاملة و كتوحم كتجيها بلوجاع كيقطع و الردان حاشاكم و الدوخة الشيء لي خلاها ما تقدرش تنوض من الفراش سخنات ليها جودي الما و دارتو في الكمادة و عطاتو ليها حطاتها فوق كرشها و صيبات ليها لفطور و القرفة و لكن ماقدراتش تفطر شربات غير القرفة و رجعات نعسات زادت غطاتها و خرجات مشات لخدمتها. ماواصلاش ساعتين عايطات ايلاف لجودي و هي كتبكي ايلاف: عتقيني راه كنحس بكرشي كتقطع جودي: مالكي ؟ صبري صبري انا جايا خرجات جودي كتجري على كتصاطح مع المدير المدير: جودي ياك لاباس مالكي؟ جودي: ايلاف مريضة خاصني نمشي نشوفها مالها. و كملات طريقها كتجري, ديك اللحظة عيط المدير على الاسعاف و تبع جودي. طبعا المانيا ماشي كيف المغرب و حتى ناسهم ماشي بحالنا تما غير يشوفو نقطة دم يعيطو لاسعاف لي كتجي في 5 دقائق و هادشي لي طرا ليهم تما غير هو و كان غي هاد اللحظة بالذات لي جات فيها الاسعاف كان باتريك جاي يقول شي هضرة لجودي حتى كيبان ليه اسعاف و جودي خارجة كتجري و هازين ايلاف في البياص. باتريك بلا هواه تبعهم حتى وصلو لسبيطار, الممرضات لي تما غير شافو اسعاف خرجو كيجريو (هاذ الموقف كينطابق على الكنازة كبيرة و الميت فار ) دخلوها نيشان لمستعجلات و بقات جودي كتسناهم برا و مخلوعة عليها و كتبكي, حتى كيبان ليها باتريك جاي عندها نيشان و بدون سابق انذار عنقها. ب,س: راه و الله الا هادشي بصح و راه تما سبيطارات عندهم ماشي كيف هنا و تما خوافين يطيح ليك غير طونسيو مايطلقوك حتى ديري لي اناليز كاملين داكشي علاش بلاما يجيكم بلي راني زدت فيه باتريك: صافي سكتي, تهدني (بعدها عليه) قولي ليا مالها؟ جودي لي بقات مصدومة بهاد الجيست لي دار و خنونتها مدلية (هجر سمحي ليا ) : ماعرفتش, خليتها فيها لوجاع و نعستها عاد خرجت, حتى عيطات ليا كتبكي زادها لوجاع. في هاد الاثناء وصل علي لي كان كيهضر مع ايلاف حتى بدات تغوت فاش شدها لوجاع و قطعات معاه و من مواراها عاد عيطات على جودي, علي لي فاش قطعات عليه ماعرف راسو باش تبلا خرج بزربة مشا نيشان لمجمع حتى قالو ليه بلي جات اسعاف و داتها لسبيطار لفلاني و لحق عليهم. علي: فين هي ايلاف؟ كيف بقات ؟ جودي: لداخل و حتى انا ماعرفتش كيبقات ماكاملاش 5 دقايق خرج عندهم طبيب لي غير شافتو جودي و مشات نقزات عليه جودي: كيف بقات ؟ مالها ؟ طبيب: غير تهدنو, السيدة لاباس عليها, راه عطيتها مسكن للالام و مهدئ فب نفس الوقت و راها ناعسة دابا غير هاد المرة العادة الشهرية جاتها صعيبة شوية راه واخا شهر 3 هذا الا ان البرد باقي و على مابان ليا ماكتلبش الحويج بزاف و شربات البرد. الدراري لي غير سمعو العادة الشهرية و رجعو لور خلاو طبيب كيهضر مع جودي. جودي: و لكن هي مولفة ديما كتجيها صعيبة غير هي اول مرة تجيها بحال هاكا طبيب:حاجة عادية بحكم انها باقي عذراء و زيادة على هادشي الغشاء عندها قاصح داكشي علاش كيجيها الوجع ديما انا بالنسبة لهاد المرة كيف قلت ليك شربات البرد داكشي علاش جاها مجهد بزاف جودي لي ماكملات الهضرة مع طبيب حتى وجها طرطق بالحمورية حشمات: واش نقدرو نشوفوها ؟......... #يتبـــــــــع....... تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM