قاليا أش كاديري هنا فهاد الوقت، أنا مخلوعة ماقاداش نجاوبو وعلاش غانجاوب أصلا فين كايعرفني باش يسولني هكا كنت حاسة بلي ديجا سمعت داك الصوت ولكن فين وزيد عليه لابس كاسك النبرة ماسموعاش بزاف ، رجليا حسيت بيهم بحالي لصقو مع الأرض، مكاندوي مكنتحرك الخلعة غاتقتلني هبط من الموطور وبقى كايشير يديه باش يوقف شي طاكسي، حتى وحدة ما وقفات الأغلبية كانو عامرين، السيدة كان خاصها تهرب زعما ولكن لا بقيت واقفة فبلاصتي كنتسنى شنو غايطرا ومكوانسية حتى وقفات طاكسي بعيد علينا شوية وشفت ندى ومنير نازلين منها كايدورو بعينيهم ويتلفتو يالله بغاو ينزلو للرملة فاش شفتهم عاد تحركت كنجري عند ندى عنقتها وكنبكي كنت خايفة وهما بجوجهم مصدومين بقات كضرب تعاير وكتبكي حتى هي وكتغوت عليا قالت ليا كنت خايفة بزاف نفقدك حتى نتي ومزال جرح سيف مابرى ولا غايبرى، تفهمت كلشي من ندى وعذرتها كانت خايفة عليا وهي غابنت يتيمة كبرات غا مع جدها وجداتها كتخاف تخسر الناس لي قراب منها... ومنير كايغوت عليا حتى هو علاش ماهزيتيش التليفون عيينا ما نتسناوك ترجعي للدار وخليتي ندى بوحدها مخلوعة عليك... ماجاوبتوش بقيت معنقة ندى وكنبكي حتى قالينا منير باركة البكايات تجمعتو عليا غانتوما.. عيط ليهم مول الطاكسي زيدو واش غانباتو هنا، رد عليه منير برد الشريف قلنا ليك تسنانا وغانخلصوك كورصة...
ركبات ندى ونا تلفت نشوف مول الموطور ومابانش ليا.. فاش سولت منير قاليا أشمن موطور واش صاط ليك البرد فراسك ركبي ركبي..

مشينا للدار عطات ندى شوية من داكشي لي طيبات لمنير باش يتعشا ووصاني مانعاودش داكشي لي درت اليوم...
فاش بقينا بوحدنا قلت لندى على داكشي لي قررت وبقات كتبكي لمن غاتخليني ياك حنا تواعدنا مانتخلاوش على بعضياتنا حتى نشدو الإجازة ديالنا ونخدمو ونبقاو ديما مجموعين...
أنا بصراحة حسيت بلي ديك المدينة على كبرها مابقاتش هزاني بغيت نبدل المحيط لعلي ننسى،
نعسنا فبلاصة وحدة أنا وندى ديك لليل ومن كثرت العيا نعست ونا كنفكر فمول الموطور شكون ولا يقدر يكون مجرد شخص سولني عادي...
دوزنا اليام حاولت نقلل من الهضرة مع مامات سيف ومابقيتش كنسول فيها، كنحاول نسى أنور ونتخطى موت سيف، سالينا امتحانات s4 ومشيت كنطلع ونزل كل نهار مع الإدارة باش ناخذ الدوگ ديالي ونبدل المدينة، علاقتنا ولات متذبذبة شوية أنا وندى حيث مكانتش متقبلة الفكرة ولكن كنت كنحس بلي خاصني نكون أنانية وبديت كنقصح قلبي خصوصا من بعد ما تلاقيت بأنور ولكن حاولت نتجاهل مايمكنش نشوف فيه مزال وخا غير شوفة من بعد داكشي لي قال...
طول الفترة للخرة كنت كنحس بحالي شي حد تابعني بحالي مراقبة وهادشي مكانش محسسني بالراحة...
سولت مزيان على الجامعة لي غانكمل فيها الإجازة ديالي كلشي كان مقاد بقا لي غير الباك ديالي نسحبو من شباك الشعبة.. خالي وقف معايا باش نتحول لديك المدينة ضبر ليا على سمسار لقا ليا گرصونية صغيرة على قدي نسكن فيها بوحدي، قررت ندوز العطلة فدارنا مع ماما وخوتي ومن بعد نمشي ندوز آخر عام ليا... الحاجة الوحيدة لي كانت مشوشاني بزاف هي نفور ندى ومنير مني، كنت كنحاول ندوز معاهم آخر أوقاتي فديك المدينة ولكن كانو كايقابلوني بالتجاهل، مدة طويلة وهما متجاهلينني ونا كنقول ماشي مشكل خاصني نولف بعدهم عليا أصلا..
كنت خارجة من جناح الشعب خديت الباك ديالي من الشعبة وتزدحت مع واحد الدري مفاوتني بالطول بزاف قاليا سمحي ليا ونا كنقول سمعت هاد الصوت فشي بلاصة قبل عليت راسي كنشوف فيه كانو ملامحو زوينين بزاف غزال أقل كلمة تقال فحقو من شعرو لعينيه لي إلى شفتيهم من أول مرة ماتقدريش ترمشي، عينيه بحال البحر ماحدي كنشوف ماحدي كنغرق حسيت بحالي الوقت وقف ماكنسمع ماكنشم ماكنشوف حتى شي حاجة من غير عينيه وقلبي كايضرب بقى ليه شوية ويختارق القفص الصدري ديالي، صافي راه السيدة ماحاضراش وحتى هو حسيت بيه عاجبو الوضع خلاني حتى غرقت مزيان دار واحد الإبتسامة جانبية ومشا وخلاني كنرمش وكنسرط ريقي حلقي نشف، كيتمشى والهيبة وراه تابعاه، لابس كلشي فالكحل وقلبي لقاها من الجنة والناس، تفكرتو هاد الدري نفسو لي كايقرا فالماستر ديك الساعة كان عندو العام الثاني، كان حرس عليا فواحد الإمتحان ديال s3 وصوتو بقا فبالي...
مانقدرش نعقل شحال بقيت واقفة كنشوف فيه حتى
#يتبع..