💫💜 قصة_المحلل 💜💫 #الجزء 50 : 💥💕 ناض حميد خرج من القهوة مشا ركب مع سعيد وداه تال قدام دار صفاء هبط وبدا يدق بجهد ويصوني حتى حل عليه ...عبد الغفور(بالغوات):ياااك لباس ا بااااغي غتهرررس علييييناااا الباب وااااش كتقلب تمشي للقبر وتسيفط الولد للحبس ...حميد:لالا ا عمي انا جيت على دكشي لي كنا متافقين عليه ...عبد الغفور:اينا شي علاياش كتهضر ...حميد:وااا على رجوووع مرتي ا عمي صافي البارح كملات عدتها وانا كيف واعدتكم لقيت #المحلل وهو معارف والو ونتا غت ...صفاء(خرجات عندو لابسة حجابها ومخنزرة فيه):تا انا باقة عند وعدي مدام لقيتيه جيبو للدار باش نهضرو ونتافقو على كلشي ...عبد الغفور:اش كتقولي نتي اش هاد التخربيق(شاف فيه)ياااك طلقتيها وتفارقتو اوا كلها يشد طريقو ولا قسما بالله(شنق عليه)حتى انا لي غنمشي عليك للحبس هاد المرة ...صفاء(جرات باها وخافت عليه حيت مريض وماشي قد المزافطة جراتو حداها وهمسات ليه):بابا الله يخليك الا مدرناش هاكا مغنتهناوش(شافت فحميد)دير مع السيد وقت وقولو يجي باش يهضر مع بابا وهيثم هو معارف والو ياك ...حميد(دار اشارة براسو):والو هو اصلا حاس براسو مزيانة فيه شمتة بحال هادي(تفكر كيفاش تعامل معاه فالقهوة وبدا يقاد فحويجو)واش مناسبكم يجي غدا ...صفاء(شافت فباها وشافت فيه):اهاه علاش لا مرحبا بيه ...حميد:صافي انا غنعلمو ياك عارفة شنو غديري ياك بلا منعاود نوصيك ...صفاء(باستهزاء):لالا متحتاجش كون هاني غير توكل على الله ...جرات باها ودخلات سدات عليه الباب حيدات زيفها وتبعات باها لي معصب ...عبد الغفور:انا معرفتش علااااش مصرة تلعبي معاااه هاد اللعب ابنتي علاااش ياك صافي تفارقتو راه ميمكنش يرجعك بزز واش كاينة السيبة واش خايفة منو ...صفاء(مشات جراتو من يدو وجلساتو):ماشي قضية خوف ا بابا ولكن بغيت نرجعلو دقتو ونشمتو كيف شمتنا هو ومو بهاد الخصايل ...عبد الغفور:ومن امتى كنتي كتشدي فقلبك ...صفاء:مشاداش فقلبي ا بابا ولكن فيا حرقة مغتبردش لي داروه فينا ماشي ساهل حنا كنا معاهم مزيانين وغاديين بنيتنا ولكن هوما دارو حويج ميتقبلهمش العقل اذاونا بزاااف ياك الشياطين كيتربطو فالشهر الكريم واش شفتي فعايلهم فعايل الشياطين والشيطان ا بابا كيترجم وكيتحرق وانا بهدشي لي غندير غنكون ارحم...كيف هو استاغل وضع هيثم وخلاني نواعدو ونمشي معاه فكلاخو انا غنقلب كلشي لصالحي يعني مغندير حتى حاجة غيجي السيد وغنقولو كلشي وراك شفتي الطريقة كيفاش هضر عليه يعني راه ماشي شي واحد قريب ليه ولا معرفة خاصة(بتنهيدة)لآخر مرة سايرني ا بابا ووقف بجنبي عافاك(باست يدو) ...عبد الغفور:ابنتي انا ديما معاك فين عمري جيت ضدك ولكن راه هدا بانليا مريض وماشي طبيعي هاكا غنزيدو ندخلو معاه فمشاكيل ...صفاء:مغيكون غير الخير ان شاء الله ...عبد الغفور:خوك مغيعجبوش الحال ...صفاء:غنخليه عليك ا بابا هضر معاه ضروري غدا تكونو معايا ملي نهضر مع السيد ...عبد الغفور:ان شاء الله يجي ونهضر معاه الله يخرج هدشي على خير يا رب ...زهور(دخلات عندهم من بعد ما سمعات كلامهم):الله يجيب لفتيحة وولادها فاش يتلاهاو ينساونا عليهم الله ياخد فيهم الحق ...ناضت صفاء خلاتهم بجوج وطلعات لبيتها بقات جالسة وكتفكر كيفاش غيكون هاد السيد وكيفاش غيتقبل هاد الموضوع وكيفاش اصلا داير فعقليتو واش انسان واعي ولا شي مكلخ ومكبوت حتى هو...داز الوقت وناضت كتجمع فالدار هي و اسماء لي باقة فرحانة بنجاحها ومأجلة موضوع انها تكمل قرايتها مع باها كتسنى الوقت المناسب وحتى تهدى الاوضاع...وصل وقت الغدا جا هيثم تغداو مجموعين ورجع لخدمتو وكل واحد فين شدها حتى طاح الضلام جا هيثم من خدمتو لقا باه كيتسناه عيطلو وقالو شنو كاين كالعادة جهل وبدا يغوت ولكن عبد الغفور قنعو حتى قبل.. نهار جديد هيثم صبح فالدار ممشاش لخدمتو على قبل حميد وهادا لي جاي معاه وصل الوقت لي دارو معاه من بعد صلاة العصر دخل عبد الغفور لدارو وبقا جالس هو وعائلتو كيتسناو اما على برا كان حميد واقف فراس الزنقة مقدرش يقرب ملي شاف طموبيلة هيثم تم بقا غادي جاي عاقد غوباشتو حتى وقف عليه صهيب نزل الزاج وشاف فيه ...صهيب(شاف الدار فين واقف حميد):هي هادي الدار ...حميد:لالا(نعت ليه)راها لهيه هي لي قدامها ديك الطموبيل الكحلة ...صهيب:اممم شنو غتبعني لتم ولا كيفاش ...حميد:لالا انا عندي شي شغل نقضيه غير سير نتا غتلقاهم كيتسناوك وملي تسالي معاهم وتافقو غتلقاني انا واقف هنا ...صهيب:ياك عندك شغل كيفاش غنلقاك هنا ياك دار عمك هديك ...حميد(نفخ صدرو(:بطبيعة الحال ضار عمي وبنتو احم بنت عمي ...صهيب:ببفف ...خلاه وديمارا مخلي وراه العجاج وصل حدا طموبيلة هيثم حطها حداه ونزل بدا كيشوف فين كاين حميد لقاه باقي واقف وكيشوف فيه دار نضاضرو وتقدم للباب صونا وبقا واقف ضور وجهو لقا حميد طار سمع الباب تحل وضار بزربة كان راجل كبير لابس جلابة رمادية وشعرو بيض شاف فيه وابتاسم ...صهيب:السلام وعليكم ...عبد الغفور:وعليكم السلام اولدي سي صهيب ياك ...صهيب(باحترام باس يدو):ايه هو هدا الحاج ...هرب عبد الغفور يدو بزربة ورحب بيه دخلو حيد صهيب نضاضرو دارهم فقميجتو لي صدايفها لولين محلولين مشا تبع عبد الغفور حتى بانلو دخل للصالة تحنا حيد سباطو ودخل لقا هيثم جالس وعاقد غوباشتو سلم عليه وجلس ...صهيب:احم سمحولي على هاد المجية ...عبد الغفور:ماشي مشكل اولدي مرحبا بيك ...هيثم:ندخلو فالموضوع نيشان غيكون حسن سمع ا ولد الناس ...عبد الغفور(قاطعو):احم هيثم نوض عيط لختك ...صهيب(باستغراب مفهم والو بقا حاضي هيثم حتى خرج وضار عند عبد الغفور):واش كاين شي مشكل كنضن عارفين علاش جيت و ...عبد الغفور:مكاين حتى مشكل اولدي دابا غتفهم كلشي ...بقا صهيب كيشوف باستغراب متعجب ولا كيقول فين دخلت ثواني معدودة حتى سمع صوت انثوي القى السلام وقف احتراما ليها وجاوب بعليكم السلام قبل ميشوف فوجها جلسات حدا باها وبقا كيشوف فيها وفلباسها وكيفاش حادرة راسها حتى دارلو عبد الغفور اشارة باش يجلس ...عبد الغفور:سمع اولدي حنا ناس على قدنا ولي منبغيوه لروسنا منبغيوه لغيرنا نتا جيتي بنية شريفة ولكن راك معارفش شنو كاين ...صهيب(عقد غوباشتو باستغراب):واخا ممكن تفهموني شنو كاين حيت بانليا شي حاجة ماشي تال لهيه ...صفاء هزات عينها فيه باش تهضر والكلام حبس فحلقها وهي تتشوف فيه وفتفاصيل وجهو وملاميحو الرجولية غير قلب وجهو جهتها وهي تحدر عينيها ...عبد الغفور:هضري ابنتي ...صفاء(حنيكاتها تزنكو وقلبها بدا كيضرب هزات عينيها فيه مرة خرا وهاد المرة جات عينها فعينو وتاهو كان كيشوف فيها ومركز معاها):احم المهم(شافت فياها ورجعات شافت فيه)خاصك تعرف بلي السيد لي توسطليك فهاد الزواج مكيجيني والو او بالاصح مكتجمعني بيه حتى صلة او قرابة عائلية ...صهيب(زاد عقد غوباشتو):كيفاش زعما ...هيثم:يعني داك الشماتة استاغلك وجابك هنا باش تكون #محلل تزوج بختي باش هو يقدر يرجعها من بعد ما طلقها بالثلات ...صهيب(وقف):كيفاااااااش ...صفاء(غمضات عينيها وحلاتهم شافت فخوها لي حط كلشي دقة وحدة):هدشي لي قال خويا هو لي كاين وقعو مشاكيل بيناتنا وهو استاغل واحد الوضع وشرط عليا باش نقبل نرجع ليه الا بغيت خويا يخرج من الحبس من بعد ما مو دارت بيه شكاية وهو اصلا هدشي مخاصوش يكون لاحقاش اصلا طلقني تلات طلقات فمجلس واحد يعني فنفس الوقت وقالها شفهيا دفعة وحدة ونتا غتكون عارف بلي هاد الطلاق يعتبر طلقة وحدة يعني ممكن انني نرجع ليه بلا محلل وانا فالعدة ديالي ولكن ...صهيب(جلس مفاهم والو):حبسي الله يرحم باك ممكن تفهموني كلشي من لول باش نعرف شنو كاين ...قبل متجاوب صفاء بدا عبد الغفور كيعاودليه شنو وقع حيت من حقو يعرف مدام دخل فهاد الروينة..كمل كلامو وصهيب علامات الغضب غطات وجهو نطق وهو ضاغط على سنانو ...صهيب:اهاه محلل قلتو ياك ...عبد الغفور:لي علينا اولدي درناه عاودنالك شنو كاين ...صهيب(وقف):قسما بالله الحاج الا مرتاحيتش ليه وكون ما سيرتكم الحسنة لي عاودلي واحد السيد منزعم نجي لدارك كنت غنتراجع ولكن قلت هو غير ولد عمها يعني بعيد ولكن حسابو معايا شكرا بزااف وسمحوليا ...عبد الغفور(وقف):بالعكس اولدي نتا لي سمحلنا دخلناك فهدشي ولكن البنت اصرات انك تعرف من عندنا ...صهيب(شاف فيها):ونعم التربية ا الحاج الثقة هي كلشي كنكرر اعتذاري ليكم ...سلم على عبد الغفور وهيثم لي وصل معاه للباب وودعو اما هو غير خرج دار نضاضرو وشاف فين كان واقف حميد لقاه تم ركب طموبيلتو وديمارا وقف حداه نزل الزاج ...حميد(بلهفة):امضرا شنو درتو ...صهيب(مكيشوفش فيه):طلع طلع الهضرة منافعاش هنا ...مفكرش جوج مرات وركب معاه مشا طاير وهو متجاهل كلامو و اسئلتو حتى وقف على غفلة ضور حميد وجهو وهو يبانلو غير الخلا رجع يشوف فيه لقاه هبط رما نضاضرو فين كان جالس وبدا كيجمع كمامو وضتر جهتو بلا كلمة حل الباب وجرو من قرفادتو وقف قدامو ونزل عليه بدقة طيحو للارض ...صهيب:على اخر ياااااااااامي نوليييييي محلل للشماااااااايت....... #يتبع........♥️🔥 تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM