💫💜قصة_المحلل💜💫 #الجزء 26 : 💥💕 غير كمل العدول خرج هيثم زادح موراه الباب هبط لتحت لقا العيالات واقفين حدا الدروج كيوشوشو خنزر فيهم وخرج فحالو...اما الفوق مشات زهور جابت جلابة لفدوى وعطاتها ليها باش تستر راسها داتها لبيتها باش تبدل ومشات معاها حتى فتيحة لي بغات تاكل صفاء بعينيها كلشي خرج وبثا حميد واقف كيشوف فصفاء ...حميد:صفاء هدشي لي وقع مغنخليهش يأتر على زواجنا وانا مغناخدكش بذنب خوك ...صفاء(بصوت مخنوق):خويا مدااار واااالو ختتتك كتكدب ...حميد(عقد غوباشتو):واااش مشفتيش حالتها ا صفاء نتي المفروض تحسي بيها حيت بنت بحالك بحالها ماشي تجي من خوك انا على ودك تحكمت فراسي وقتلو يصلح الخطأ ديالو اما واحد بلاصتي غيجيبلو البوليس ويديوه فين يتربى ...صفاء(جلسات تتمسح دموعها):من الاحسن حنا نحبسو هنا انا مبقيتش باغا هاد الزواج ...حميد(خرج فيها عينو):اش هدشي كتقولي حماقيتي ...صفاء(شافت فيه):بالعكس هدشي لي خاصو يكون شوف غير مك شنو قالت علينا ونتا حاسة بيك فقرارة نفسك عارف بلي هيثم مداير والو ...حميد(مينكرش بلي ختو خفيفة وعارف هيثم كيفاش داير ولكن حالة ختو ميمكنش يسد الموضوع وينشوهو قدام الناس):صفاء سمعيني انا وياك معندنا حتى ذنب فهدشي هدا مكتاب الله علاش حنا ندمرو زواجنا لي يلاه قلنا فيه بسم الله ...كلتوم(دخلات عليهم من بعد ما سمعات كلامهم):سمحوليا سمعت كلامكم بدون قصد(جلسات حدا صفاء وعنقاتها)بنتي راجلك عندو الحق نتوما معندكم حتى دخل فهدشي وكلام الناس ابنتي مكيرحمش نتي يلاه عقدتي وبغيتي طلقي والله الناس ميرحموك ولا يخليوك ترتاحي فحياتك ...صفاء:مكيهمنيش كلام الناس اهىء كيهمني خويا ...كلتوم(شافت فحميد ورجعات شافت فيها):فكري فوالديك ابنتي ماشي من بعد هاد السينين كاملة واحترام الناس ليهم تكوني متي ولا هيثم السبب باش ميقدروش يهزو راسهم فجيران فكري فباك واش غيقدر يمشي للجامع ويأذن وملي يخرج يسلمو عليه الناس ويبوسو يدو الدراري الصغار واش باقي يتيقو فيه الناس يجيو يستاشرو معاه ويسولوه ويديرو بكلامو فكري فهدشي ابنتي حيت ماشي غير اجي وخطي خطوة دابا لي عطا الله عطاه(باست راسها ووقفات)كيفما كان الحال ربي كبير والحق غيبان ربي مكيبغيش الظلم(شافت فحميد)الله يفرجها علينا ...خلاتهم وخرجات هبطات لتحت لقات زهور وبناتها فالكوزينة بداو كيحطو العشا للناس باش يمشيو فحالهم خلاص ويتهناو من اسئلتهم باش يعرفو شنو كان واقع وعلاش كان الغوات واخا كان صوت الطلبة مجهد بحكم انهم دايرين ليباف ولكن التبركيك يخلي بنادم يطرطق ودنيه ويسمع لي بغا....حطو للناس العشا وجاو دراري د الحومة كيخرجو للرجال وحميد معاهم اما عبد الغفور غير جالس وساكت وحداه راجل كلتوم لي عاوداتلو بنتو شنو وقع ...محمد(طبطب على كتفو):ربي كبير ا عبد الغفور وهيثم ولد مربي ونقي ربي بلاه وان شاء الله غيفرجها عليه........ #يتبع.......♥️🔥 تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM