اححح عليك ابلادي....فين غنلقا نص فيه الطون والحرور بدرهم ...وزلافة ديال البيصارة بجوج دراهم 😂😂 ماعلينا أول حاجة قررنا نديرو هي نبذلو المدينة....مشينا انا ويونس لطنجة تنا فيتن قررنا نستاقرو...حيت تما فاش درنا شي مشاريع بغينا نقابلوهم...المهم شي خمس شهور وحنا خدامين والفلوس اللي فسويسرا بداو كيدخلو شوية بشوية...وبدينا كنستاقرو حيت درنا بزااف ديال الحوايج فحياتنا من غير اننا نكملو قرايتنا ولكن فيها خير....تال هنا كلشي غادي بيخير تال واحد النهار قال ليا هاذ الراس المكلخ نمشي نجيب دويرة فالبلاصة فاش عشت الطفولة ديالي...داكشي اللي درت...مشيت عند يونس قلت ليه قابل الخدمة راه أنا غنغبر واخد السيمانة فآسفي...قال ليا كون هاني....هي هاذيك الغد ليه فالصباح شديت الطريق للبلاصة فاش كبرت....البلاصة فاش قتلت اول روح فحياتي.....باشما كنقرب وقلبي كيضرب....وصلت حدا المدرسة وبقيت غي واقف وكنفكر....تفكرت الأساتذة اللي قراوني....وبالخصوص الأستاذة ديال العربية....وصلت حدا المقبرة وأنا نذخل زرت الواليد وخرجت ركبت فالطموبيل وبقيت كنتمشى حتى وصلت حدا الدار ديال عشيري فالصغر....كندق وهي تخرج واحد البنت صغيرة....قلت ليها واش كين فلان...وهي تبدا كتعيط .....بابا...بابا....شيواحد كيسول فيك....لحمي تبورش فديك اللحضة...ناري الناس دارو ولادهم وأنا باقي لا حنان لا تا لعبة....خرج عندي عشيري....مع شافني فاللول ماعرفتيش...غي قلتليه السمية وهو يتلاح عليا عنقني وبقى كيقول ليا توحشتك....ذخل تشرب شي كاس ديال اتاي....ولكن انا زربان قلت ليه مرة أخرى ان شاء لله خليتو ومشيت قاصد دارنا نيشان....بغيت نقول اللي كانت دارنا..لقيت شي ناسدخرين ساكنين فيها....ولا علاقة بالدار فاش كنا ساكنين حيت مور ما رابت عاودو بناوها....ولكن كيفاش البلان حتى بناو فيها ياك الأرض ديال الوالد الله يرحمو....دقيت عليهم وخرج ليا واحد الراجل شارف....قلت ليه بلي أنا ولد مول الدار الله يرحمو ....بقا كيضحك وقال ليا انا هو مول الدار ....وها انا خدا كندك وندردك.... -مفهمتينيش الحاج... حنا اللي كنا ساكنين هنا قبل منكم الحاج: اه هي نتا خو اللي حسام اللي عاود ليا عليك... -ايييه هو أنا...اجي حسام فيناهو الحاج: والله اولدي منعرف...كان جاه السربيس فشي مدينة مورا ما باع لينا الأرض...مقالش لينا فين غادي...غير جمع ولادو وزاد خلفة... -بلاتي....كيفاش ولادو الحاج: اه راه هو مزوج او عندو زوج ولاد....واش خوك نيت ولا كتفلا عليا... -لا والله تا خويا ...مشفتوش مدة طويييلة هاذي الحاج:اوا اوليدي هاذشي اللي كين...ذخل بعدا تشرب شي كاس ديال أتاي.... -لا الحاج والله مكين منين يدوز... غي بغيت ندير الصواب وصافي اما انا فيا مناكل الحاج مشوي...المهم سلمت عليه وخدا نمرتي الى بان حسام يصوني عليا....ومن عندو ديريكت للمرصة...خديت قرعة ديال الموناضا وشي ربعة د الشوايات غا بوحدي....الله شحال توحشت الشواية....بقيت كناكل حتى حسيت براسي تخنقت....وأنا نركب فالطموبيل...قصدت واحد لوطيل خلصت فيه جوج ليلات اللي معول نريحهم فآسفي...غي حتى نشبع منها بعدا...اااه تفكرت بسمة ولكن غتكون دابا ولدات وليداتها يعني غا نخوي راسي منها....ماعلينا مشيت حطيت حوايجي فلوطيل وقاديت الحالة وهبطت لواحد البواط نااااري نخربها....حتى كيصوني ليا داك الحمار ديال يونس.... يونس: الو علاء... -داخلنا عليك بالله اش باغي عندي...واحدختنى من الصباح وهي كتشوف تا قلت جابها الله ....ونتا تصوني وهي تمشي دعيتك لله. يونس: 😂😂 مصخوووط من امتا ونتا كتحرك للبواط....جمع راسك الساط...فيناهي الصلاة وعلاط اللي كنعرف... صراحة زعزعاتني هضرتو... -واخا بلاتي نخرج ونصوني عليك راه كين الصداع هنايا خرجت وبعدت شوية تال حدا الطموبيل وانا نصوني عليه -دابا قول ليا علاش مصوني اراس الطنغ....ياكما شي زبلة عاوتاني... يونس: تا لا راه عفا عليا الله ....نتا دابا فآسفي -شنو بان ليك يونس: وصافي بلا تريگيل الزمر راه كندوي معاك -اه كين فآسفي علاش يونس: صافي بلا متجي...انا اللي غنجي غدا.. -لا اخويا مقاد على صداع نتا طريقك فيها غا المناتف يونس: يااااك الكلب ... -غا ضاحك معاك...علاش غتجي... يونس: تانجيو ونعاود ليك.... قطعت عليه وركبت فالطموبيل وشديت طريق لوطيل....ماداني النعاس تال شي الجوج ديال الصباح....مع حطيت راسي وأنا نحلم واحد الحلمة....حلمت شي واحد هاز قطيب وكيحطو ليا على وجهي..كنهز راسي باش نشوف شكون مكنقدرش.كنشوف غا رجليها.واحد السروال فايت شايفو ولكن معرفتش فين. وهي تجيني الفيقة...نضت مخلوع وباغي نبول فحوايجي بقوة الخلعة. ناريي مبقاش بغا يديني النعاس الغد ليه بقيت النهار كااامل وأنا كنفكر فين شفت داك السروال ووااالو مبغاش يجي على بالي...حتى كيدق يونس...سلم عليا وتسنينا العشا حتى جا وحنى ندخلو فيه طول وعرض...وهو يقول ليا يونس...واش عارف علاش جيت.. -لا علاش يونس: على المشماش😂😂 -ياااه على حامض...مزال مباغي دير عقلك.. يونس: باغي نخطب الساط... -واااايلي مبرووك اصاحبي... مسولتوش شكون حيت كنت عارفو مزال كيدوي مع دنيا....وهي بنت الناس بقات كتسنى فيه...متخيلوش شحال فرحت..حيت على الأقل غنشوف بسمة واخا هي دابا مرت الراجل ولكن ما بيدي مندير اللهم الشوفة ولا والو...المهم بقينا كنوجدو واحد اليومين...ووجدنا كلشي ومشينا غير انا وياه حيت معندو لا مو لا باه ...المهم مع الدخلة ديال الدار تلقى لينا باها بالترحيب والإبتسامة...والتمر والحليب...ولكن تغيا تبدلو الملامح ديالو ملي عرفتا غنجيو غا بجوج....ماعلينا ذخلنا للصالون ريحنا وبقى باها كيجمع مع يونس وكيسولو ويونس غا طالقها عليه ....انا واحد اللحظة غلباتني الضحكة كنت غادي نضرب ليه كلشي فالزيرو ....جاب الله جمعت راسي...المهم داز كلشي بيخير وعلى خير جات ختنى مدخلى اتاي ومها كتزغرت...طبعا حاطة سبعة كيلو ديال الماكياج...ولكن بيني وبينكم هي فسرى بلى ماكياج...صراحة سعدات يونس دا كلشي الزين والتباتة والأصول والفلوس....المهم تعشينا وقضينا الغرض ولكن بسمة مكيناش....قلت مع راسي صافي راه يمكن كاينة فدار راجلها...هي هاديك تعشينا وقضينا الغرض وقرينا الفاتحة....حتى تمينا خارجين....جريت دنيا بعيد شوية وأنا نقول ليها اش خبار بسمة...قالت ليا من بعد راه قصة طويييلة ضروري تعرفها...اواااه كيفاش قصة طوييلة بقى ضارني راسي...المهم خرجنا ومشينا للوطيل...بقينا سهرانين كنجمعو حتى لواحد الوقت وحنى ننعسو...وأنا نفيق على نفس الحلم ولكن هاذ المرة بان ليا السروال فيه الدم...بقيت كنغوت بالجهد اللي عطاني الله وهو يجي يونس عاودت ليه الحلمة وبقيت كنترعد تال الصباح قال ليا يونس يالاه نمشو نشوفو شي فقيه ولا شي واحد كيدير الرقية....فالطريق ديالنا تلاقيت مع واحد الشيباني حيت غا نسولو وهو يقول ليا....ولدي النصيحة اللي غنعطيك هي الى عندك شي غلط مع الله سير صلحو وغادي تولي بيخير وخود واحد الكتاب سميتو حصن المسلم وبقا تدير الأذكار ديالك وميكون غا الخير...ماعلينا ذاكشي اللي درت رجعت للدار صليت ودوزت نهاري بييخير....ونعست ولكن هاذ المرة شفت الوجة...غزلان...علاش هي بالضبط ياك قتلت قبيلة ديال بناذم....غزلان غي ذفنتها وطرا ليا هاذشي....بدون تردد مشيت قطعت فالباطو حيت كان واحد خارج ديك الساعة وقصدن البلاصة فاش دفناها....بقيت كنحفر ولكن لقيت غا العضام والصاك ديالها....قلت صافي اللي عطا الله عطاه معندي منصلح بغيت نجرها باش نخرجها وهو يتجر ليا معاها الصاك اللي متهز ديما معاها....لقيت فيه شي وراق وواحد التلفون وواحد البرى درتهم فالطموبيل تال الدار ونقراهم....مشيت نبات فواحد لوطيل...هاذ المرة الحلم مختالف على اللول...فيه غزلان نيت ولكن لابسة البيض وكتقول... أمانة...أمانة...مع جابتني الفيقة مشيت ديريكت للطموبيل جبدت دوك الوراق وداك التلفون وذخلت..متخيلوش شنو شفت فالتلفون...لفقيت فيه التصويرة ديال واحد البنت صغيرة...غالبا غتكون بنتها...وواحد المرأة كبيرة...وشي رسائل قدااام ديال الحب معرفتش ديالمن بالضبط...لقيت تما واحد اللعيبة نفعاتني بزااااف...لقيت لاكارط ديالها فاش كانت فالمغرب وفيها العنوان ديالها...الله هاذ اللغز بدا كيتفك... جلست واحد اليومين وأنا نرجع للمغرب ديريكت لفاس...الله شحال ولافة عاذ فاس...تسركلت هو اللول واحد اليومين فالمدينة عاد مشيت كنقلب على العنوان اللي فلاكارط....دغيا تلاقيتو....خرجات عندي نفس المرأة اللي مصورى معاها....سلمت عليها وقالت ليا ذخل...ذاكشي اللي درت حيت داكشي اللي غنقول ليها ماشي ديال الزنقة ريحت عندها فواحد الصالون بلدي على حقو وطريقو...الله عليك يافاس (حاكمة العالم 😂😂) قلتليها خالتي انا خدام مع غزلان....نجيك من اللخر غزلان الله يرحمها...وصاتني الى وقعات ليها شي حاجة انا نتكلف بيك نتي وبنتها....داكشي علاش جيت...كتبت ليها واحد الورقة فيها نمرتي..وواحد الشيك وخرجت خليتها مصدووومة معارفاش شنو واقع....وأنا نشد الطريق لطنجة....مع وصلت مكناس وهو يصوني عليا الحاج...قلت ياكما بانت شي خبار على داك المصخوط ديال يونس....ولكن قال ليا الحاج بلي شي واحد فالجيران هو اللي بغا يشوفني....شي عشير الوالد قديييما....عندو شي خبار بغا يقولها ليا....قلت ليه قولها غا فالتلفون...قال ليا هاذ الهضرة اوليدي ماشي ديال التلفون. غا آجي وتعرف...هي هاذيك عفطت عفطة وحدة تال آسفي مع وصلت تلاقيت خونا كيتسناني...ركب معايا فالطموبيل وبقا كينعت ليا فدارو...قال ليا بلي هاذ العضرة كان باغي يقولها لحسام فاش كان ساكن هنا ولكن ذاك الزمر مفلس مكيعمرش مع بناذم...ماعلينا وصلنا عندو للدار عمر ليا واحد الدكيكة ديال أتاي...بقا كيعاود ليا شوية على راسي شي حوايج أنا معارفهمش...حيت كنت مزااال صغير قبل ما تموت الوالدة...اللي أصلا مماتتش...🤫 نارييي حرقت الأحداث ماعلينا جاب ليا العشا تعشينا وهو يقول ليا....سمعني مزيااان اوليدي وطلق ودنيك...حيت هاذشي اللي غادي نقول بيك غادي يصدمك...ولدي مك باقا حية -كيفاش...عمي المختار خليني معاك مزيان بلى مزاح المختار: اولدي واش انا ديال المزاح...شوف غا الشيبات اللي فراسي -كيفاش...بلاتي بلاتي راه عقلي حبس....ولكن علاش الوالد مقالهاش لينا...كيفاش زيد شرح ليا المختار: اولدي باك ومك كانو سمينة على عسيلة...كانو معيشينكم فوق السلك وراضيين باللي قسم الله....هو كيبغيها وهي كتبغيه وعايشين عيشة مستورة....ولكن الغلط اللي داروه هي فاش كانت شي يامات الوالدة ديالك مريضة ....مشاو جابو واحد الخدامة...بدات كتمسكن حتى تمكنات وفارقاتهم.... شبعاتهم سحور وشعودة حتى فارقاتهم وناض باك جرى على الوالدة ديالك فراحد الليلة وهي معندها لا حنين لا رحيم معرفناها فين صدات وديك ختنى ربي اللي غادي يخلصها.....نارييي هاذشي كاملو مافخباريش....عطاني با المختار واحد التصويرة ديال الوالدة...كتشبه بزاااف لداك الكلب ديال حسام... اول حاجة درت هي مشيت كنقلب عليه...ولكن اللي مخلية ليا الوقت عاد غادين يبداو الأحداث ديال قصتي 😞....يتبع (الإخوان موعدنا غدا مع التسعود جزء جديد التتمة بعد 350 لايك ودوك البلانات ديال اللايكات المغشوشين ممعاناش وشكرا 😊) تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM