إنتقام عشاق الجزء 48 🔥🔥 ( التتمة من بعد 350 لايك طاكيو صحابكم يعاونوكم عليها بغينا نرجعو ليامات العز ♥️ ) تصدمت فاش لقيت راسي مزال عايش اشمن عايش وغير سمية عايش وصافي حيث كيبان ليا راسي كولي فصمات ورجليا ليمنيا معلقة ومشدودة بواحد الفاصمة يمكن تهرست وكنحس بلحمي كيعطيني الصداع دازت واحد 5 الدقايق حتا بدا لحمي كيحرقني بزاف كنحس بواحد الألم رهيب بديت كنبكي و كنغوت بكل ما في جهدي حتا دخلو واحد 2 أطباء دݣو ليا واحد المهدأ داكشي خف شوية ولكن مزال عطيني الصداع الطبيب 1 : صبر أولدي ماكينش شي دوا ولا مهدأ لي يقدر يحيد ليك الألم بخطرة ماعليك غير بالصبر ولكن هاذ المهدأ غادي يخفف عليك _ أنا غير كنبكي من الألم وهوما يخرجو وخلاوني وبقيت صابر وكنفكر في داكشي لي وقع ليا كيفاش الدري لي عتابرتو كتر من خويا قدر يدير فيا هكذا عيب عليه بقيت كنفكر في الموضوع حتا تزاد عليا الحال الألم ديال الحريق بدا تاني وبديت كنغوت حتا دخلو الأطباء و الأب ديالي . عفاك دير ليا شي حل مانقدرش نتحمل هاذ الألم عفاك أبابا عاوني قول ليهم يعطوني شي سم يهنيني من هاذ الألم ماغديش نقدر نتحمل عفاك نبوس ليك ايديك قتلني هنيني من عذابي الواليد : صبر أولدي غادي يفوت هاذشي وغادي يولي بحال المعاودة غير صبر وغادي يكون كولشي بخير _ راه ماشي نتا لي كتحس بهاذ الشعور ايييي أسيدي عاوني راني ماقدرش نصبر راني كنتألم كولي الطبيب 2 : سيدي كاين حل واحد باش نهنيوه من هاذ العذاب وهو نعطوه الإندومورفين ولكن يقدر يولي مدمن عليه يسبب ليه أعراض جانبية الواليد : لا متعطيوهش ليه _ عفاك أدكتور جيبو ليا عفاك متسمعش ليه راه الجسد ديالي أنا ماشي ديالو أنا لي كنتألم غادي نموت غير من الألم الواليد : عطوه المهدأ صافي ولا نعسوه الطبيب 2 : إلى بقينا كنغيبوه على الوعي الجسم ديالو ماغديش يتقوا وداك الألم عمرو يزول غادي نعطيوه غير مهدأ _ دݣ ليا البرا ونقص تاني الألم شوية و بقيت كنحاول نعس حتا داني النعاس وكنفيق على الألم حيث زال المفعول ديال المهدأ وبدا تاني الحريق بقيت كنغوت وكنحاول نوض بقيت كنتألم حتا غيبت الواليد : عطوه الإندومورفين - فيقوني ودݣو ليا الحقنة ديالو من بعد ماعطاوه ليا ديك الساعة بدا كيحيد الألم وحسيت براحة ( أهم حاجة في هاذ الدنيا هي الصحة أي حاجة كتعوض إلا الصحة ) بقيت كنشوف في السقف حتا داني النعاس بلا مانشعر فاش حليت عيني كلقا الأب ديالي وخويا سيف مريحين فوق الفوتيات لي في الغرفة شفت فيهم وبديت كنقول بغيت نشرب جاني العطش . دخل الطبيب بدا كيشربني من الغطاية ديال القرعة عطاني غير شوية واخا مشبعتش قال ليا الما ممزيانش ليك في هاذ الحالة الواليد : يوسف علاش أولدي كطير علاش هربتي علاش _ دابا وقع لي وقع ماتجيش تحاسبني لي فيا يكفيني الواليد : مكنحاسبكش ولكن لي بغيت نوصل ليك و هو الزربة ديالك لي ديما خارجة عليك شنو لي كان مضايقك حتا هربتي من المقر _ كنت محتاج نتاقم في أقرب وقت ونتهنا من هاذ العذاب ساعة ماعندي زهر ولكن على الأقل قدرت نعرف بيلا مراتي وخويا وصاحبي عايشين ولكن لي حطمني ودمرني وهو الشخص لي كنت كنتيق فيه كتر من روحي الواليد : شتي الزربة ديالك شنو دارت ليك دابا صدقتي جايبها في راسك وجهك ونص في لحمك تحرقو ومهرس من رجلك ليسرية وزايدون داكشي لي عرفتي كنت غادي نقولو حيث لقيت واحد الفيديو كيوتق اللحظة لي خرجو فيها ريان ومراتك وصاحبك و لكن نتا تسرعتي وهربتي ومن بعد ماهربتي بحتنا في موضوع أمين وقدرنا نلقاو صور ديالو مع مراتك وعرفنا بيلا هو معاونها ولي خفت منو هو لي وقع قدر يأذيك ولكن كنواعدك غادي ندمهم على هاذشي قول ليا فاش تلاقيتو شنو قلتي ليه _ عاودت ليه كولشي عليكم كيفاش هربتوني وشنو شفت وكيفاش هربت ليكم سيف : ماكتسدش فمك اصحبي دابا خليتيهم ينتابهو لينا و لينا معرضين حتى حنا للخطر _ ماكنتش عارف بيلا أمين يخرج منو داكشي كامل عفاكم عاونو عائلتي الواليد : عائلتك هوما عائلتي غادي ندير ما في جهدي نرجعم بيخير وعلى خير _ بابا قول ليا فين حنا حيث هاذ البلاصة كتبان مختالفة على المقر لي كنت فيه الواليد : اه ماشي المقر ديالنا . هاذا غير واحد الكلينيك في أسفي بقينا كنهدرو حتا دخلات واحد الفرملية بدات كتشربني الحسوة شربتها وأنا نتكا وهكذا دازت شهر من حياتي بلا حتا جديد ولا أثر لعائلتي من غير أني وليت كنتحرك شوية واخا مزال الحرݣة كتحرقني وغير الإندومورفين هو لي كيحيد ليا الألم ولكن بديت نتبلا بيه في لول كنت كندݣ غير حقنة وحدة ولكن دابا مبقات كدير ليا والو وليت كنستعمل 2 الطبيب : سي يوسف جا الوقت باش نبدلو ليك الفاصمة _ دكتور ممكن تجيب المراية بغيت نشوف وجهي هاذي هي المرة 4 لي غادي تبدلها ومزال ماشفت وجهي . بدا كيحيد ليا في الفاصمة ومبغاش ولكن بقيت محكر عليه حتا جابها فاش هزيت المراية و شفت وجهي تحطمت مابقا من وجهي والو كولو محروق بديت كنبكي كيفاش أسيدي ربي غادي نعيش بهاذ الوجه وكيفاش غادي نقدر نواجه الناس هكذا ماكين لي غيبغي يشوف فيا حتا الشوفة أشنو درت في حياتي باش نتعاقب هاذ العقاب . يله بغا الطبيب يعالجني وأنا نوقفو . أشنو غادي تعالج في هاذ الوجه ماكين لاش ضاع ضاع من بعد مارفضت العلاج مشا عيط على خويا سيف وعاود ليه عرفتو فاش دخل وشافني حسيت بيه لحمو تشوك عليه وتخلع . سيف : خويا عارف بيلا هاذشي صعيب عليك ولكن خاصك تعالج وإنشاء الله غير غادي يتشافا وندير ليك عملية جراحية ويرجع وجهك حسن من لول غير تيق بيا _ في لول رفضت ولكن من بعد وافقت وعالجني وتكيت بلاصتي وخاطري كتألمني بديت كنفكر كيفاش غادي تكون نظرة لناس ليا بديت غارق في أفكاري المتشائمة حتا دخل عليا الجوكير لقاني مقلق وساهي الجوكير : مالك أخويا فاقل فين عقلك _ عاودت ليه بقا كيحفز فيا وكيعطيني أمل وبقينا داويين لمدة طويلة حتا بدا يعطيني لحمي واحد الصداع رهيب وبديت كنغوت بغيت الإندومورفين جيب ليا الإندومورفين جابو ليا وحقنتو لراسي عاد رتاحيت وبدا كيديني النعاس حيث هو كيجيب النعاس وأنا نجبد عليها وهكذا دازت 3 الشهور داوني لمقر في فاس رجلي تحسنات تحيد ليا الݣبص وليت كنتمشا عادي والحروق تقريبا براو ولكن الألم هو هو وتزادتني البلية ديال الإندومورفين وليت مبلي بيه ديال بصح لدرجة اني غير كنحقن راسي من بعد ساعتين ولا قل كيحيد المفعول ديالو وكتبدا تشدني الدوخة والألم . ليوم كيما العادة مريح في الشومبر ديالي حتا كيدخل عليا الأب ديالي . شنو درتو لقيتو شيحاجة في داك الديبو لي مشيتو ليه الواليد : ولدي العنوان لي مشاو ليه الدراري مافيه حد خواوه قبل مايوصلو ليهم _ أو بزاف 4 شهور ومزال مالقيتو والو والعنوان لي كتمشو ليه كيسبقوكم ويهربو واشمن مخابرات نتوما ماجيت فين نكمل هدرتي حتا بديت كندوخ وحسيت بالصداع وأنا نجبد من تحت الوسادة واحد الحقنة ديال الإندومورفين يله هزيتها باش نحقنها هو يزرب عليا الواليد خطفها مني الواليد : من ليوم مابقا الإندومورفين راك تبليتي _ نضت من بلاصتي وأنا دايخ كيبانو ليا 2 من الواليد عفاك عطيني الحقنة راني كنتألم عفاك الواليد : لا صافي ماغديش نعطيه ليك ومابقيتيش غادي تستاعملو _ غير قالها وأنا نضربو وتلاحيت عليه وبديت كنحاول نحيدها ليه . عطيني الحقنة عطيني . مع هو صحيح وأنا أصلا دايخ دغيا حكمني وشدني وعيط الحراس داوني الغرفة لي فيها مستشفى صغير وربطو ليا ايدي ورجلي مع الكاتري وأنا كنتركل وكنقول غير الإندومورفين دخل الطبيب عطاني مهدأ . عفاك مابغيتش المهدأ عطيني الإندومورفين هو لي غادي ينقص ليا من الحريق الطبيب : يوسف راه الألم ديال الحروق مبقاش حيث تشافيتي وهاذ الألم ناتج من البلية ديالك على الإندومورفين صبر أيوسف وغادي تجاوز هاذ المرحلة _ كمل كلامو وخلاني أنا كنتركل وكنغوت من الألم وعرفتو دازت عليا واحد 10 يام جحيم عمري دوزت بحالها في حياتي وبالأخص 7 يام لولة كنت كنبقا بلا ماكلة وبلا نعاس غير السيروم لي خلاني مزال عايش ولكن بدا من اليوم 8 الألم كيخف وبديت كنتعايش مع الوضع ودابا الحمد الله كنحس براسي وليت مزيان ومبقاوش كيربطوني . كيف العادة مريح في بلاصتي حتا كيدخل عندي الطبيب الطبيب : كيف بقيتي أيوسف كيف كتحس براسك ليوم _ كنحس براسي بيخير الحمدلله ومابقيتش مدمن على الإندومورفين الطبيب : شوف شنو جايب ليك معايا هاهو الإندومورفين شد _ ستاغربت من كلامو وعلاش زعما بغا يعطيه ليا شديتو بيدي وبقيت كنشوف فيه واحد الراس كيقول ليا حقن راسك واحد الراس كيقول ليا واش بغيتي نرجعو لنقطة الصفر شفت تاعييت ومديتو ليه . مابقيتش بغيتو الطبيب : مزيان نجحتي في الاختبار هاذيك غير حقنة خاوية كنت غير بغيت نشوفك واش غادي ترجع ليه ولا لا الموهيم دابا غادي دوز لفترة نقاهة لمدة ديالها 10 يام باش نتأكد 100% بيلا ماغديش تبقا تستاعملو _ اوف غادي نبقا محبوس تاني لمدة 10 يام بوحدي بحال المرة لولة . مكان كيدخل عندي حتا واحد من غير الطبيب أو واحد 2 حراس ماعلينا دازت ديك 10 يام بيخير وعلى خير قدرت نتخلص من البلية ديالي ورجعت لشومبر ديالي وكنخرج وندخل عادي كيما بغيت وصل وقت الغدا مشيت لمطعم بديت كنتغدا حتا سيفط ليا الواليد مع واحد الحارس باش نجي عندو لعيادة مشيت وأنا لقاه هو واحد خونا آخر قال ليا الواليد بيلا طبيب جراح خاص بالتجميل الطبيب الجراح : نعس نشوف وجهك بدا كيحيد ليا الفاصمة لي على وجهي من بعد ماحيدها عطاني أمل وقال ليا بيلا يقدر يرجع ليا وجهي كيما كان وبدا كيشرح ليا كيفاش وأنا متسوقتش لداكشي لي سمعت وفرحاتني وهي غادي يقدر يرجع ليا وجهي كيما كان . ايه وإيمتا غادي دير ليا العملية الطبيب الجراح : غدا انشاء الله نديرها ليك مع 9:00 . سيدي غادي يخصونا بعد الأجهزة المهمين للعملية كيبانو ليا مكاينينش هنا ولا نديوه العيادة ديالي الواليد : لا نديرو ليه العملية غير هنا قول ليا داكشي لي غادي يخص ليوم نحضروه _ قال لواليد داكشي لي غادي يخص و عاود دار ليا فاصمة أخرى و خرج وبقيت مريح أنا والواليد و فرحان حيث عطاني داك الجراح أمل الواليد : قلت ليك بيلا كولشي غادي يتحسن وغادي ترجع كيف لول _ اه إنشاء الله غادي يكون خير رجعت لشومبر ديالي تكيت وداز النهار طويل جا الصباح فيقني واحد من الحراس قال ليا الطبيب جا نضت و دخلت لعملية بلا فطور دازت العملية دوزت فيها 4 سوايع فاش فقت وحيد مني مفعول البنج لقيت الجراح والواليد وخويا قدامي الطبيب الجراح : العملية نجحات ودرت العملية على لحمك كامل وإنشاء الله ماغدي يبقا حتا أثر لشي حرقة _ شكرا دكتور ماجيت فين نكمل الشكر ديالي حتا تطلق جرس الانذار وبدينا كنسمعو صوت القرطاس ... يتبع في نضركم شنو غادي يكون واقع ؟؟ تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM