...بعد ليلة من تجمعهم اللمة رجعات والرابط تقوى أكثر فأكثر ، مرت ايام قليلة ، وكل مرة فين مجموعين مرة كوتي مرة الغداء، و مثل اليوم دايرين العشاء يكون عند فاروق في الفيلا ، صابحة معطلة فالكوزينة تتوجد الفطور لان الوازنة البارح داز فاروق داها عندو ؛ يلاه تتوجد فالبان كيك وهيا تتسمع الغوات ..الغوات ..تتقول هاهما يسكتو ؟ هاهمااا يحشمووو ؟ تا كملت نازلة فدروج محلفة اسماء : مااالنا على هااااد الغواااات ؟ يوسف: ( وقف تيشوف فيها ) أهلا أهلا امي العزيزة اسماء : ( جاي يعنقها هيا دفعو ) شوووف داك البانضي والله ؟ ثم و الله يا تتاكلها يوسف : ( حرك ليها راسو قدام بقوة و تيسخط بيدو ) حطيها و الله تناكلها ! ياك غير البغرير و الله تناكلو اسماء: ( شدات فراسها ) زكرياء مالكم ؟ زكرياء : اماما هذا راه باسل يوسف: ( طلع فيه هبط مطلع حاجبو ) هاد الهضرة راه فيها ( هز يديه تيعد ليه ) فيها حقووق و قوااانين اسماء : واش ماغاديش تسكت ؟ واااااااسكت نعمة : ( بصوت باكي ) ماما خربق ليا لعبتي اسماء :يوسف؟ ...تتمسح دموعها و تتحرك راسها، تتشوف فالpuzl لي خربقهم .. اسماء : ( شداتو من قرفادتو تتديه و تجرو ) مااغاااديش تحشم ؟ماااا غادي تهدا ؟ يوسف: ( بزرية ) عنقققيييي عنقييييي ...اااااياااي عنقي اوووووقسم بالله غير قستها اسماء : براكة من تبوهيل ! والله مادير عقلك ياحتى نوريك يوسف: ( تجر من يديها ) كلتي ليا اتاكل ؟ شي ماكليتوو ؟اتوريني ؟ شي ماوريتيني ..تتضيعو ليا فوقتي انااااا اماما زكريا : ( شافو غادي شدو ) ارا شارجور يوسف : راه فوق تحت سداري جنب ناموسية فكوزينة فالباب دسطح زكرياء : سمعتيه أماما؟ اسماء شدات راسها طلعت كوزينة تتحط لفطور ، طلعو يفطرو هو عاد جاي جالس تيضحك مع الطبلة و اسماء تتهضر و توصي هو تيحرك لها راسه نعمة: ماما بغيت واحد اللعبة شفتها فامبيسي تري يوسف : ( هز يديه بزعاف )دبا حنا نمشيو حتى الإمارات فين كاينة ام بيسي تري نشريو ليك للعب ؟ اسماء : وانت سوووقك ؟ اتشريها ليها ؟ يوسف: تتحكرو على الواليد اسماء : نوض الله يجيبك على خير !ماجتيهش فايامو زكرياء : اوا منين ام بيسي تري جات في الامارات! اكشن فين جات ؟ يوسف: ( بثقة تيهز كتافو ) فميريكان نعمة: كسول اسماء : اويلي ماجاتش فميريكان ؟ زكرياء : ( مسح فمو ..نايض ) ما عرفت يوسف : اوا من اول حط السلاح ! ( ضرب نعمة بزيتونة ) انا كسول؟ ا طرف الخبز بايت اسماء : ( شعلت معاه ضربة لراس ) بزاااف عليك ! سميتها نِعمة ما نْعمة يوسف: عارف عارف! نعمة : ( بهدوء ) ماما ايم بيسي اكشن ماشي فامريكا ! غير تينقلو افلام امريكية اسماء : ( بندهاش ) ياكي ؟ نعمة : اه ! بابا سولتو انا و قالها ليا يوسف : ( ناض واقف تيشير خارج ) انننناا اناااا اسماء : انت ! مااااخااارجش ! تنشوف واش ام بيسي واش فميركان ولا برج العرب ! يوسف: نمشي دغيا ونجي ! بزززربببة ، نتي خودي وقتك اماما شوفي ....مهبلها ! مرضها ! مرة يضحكهم مرة يفقصهم ، القراية الله يجيب ، ماشي #يوسف لي يجلس يحفظ و يكتب و يبحث ! عكس زكرياء لي جدي في الدراسة اما نعمة من لاكغوند هيا تتكلاصا من الأوائل . لكن نبيل مرات تيوقف عليه كي الحارس ، جمعت الطبلة ، تتوجد الغداء، كل مرة تخرج بالكو طل على يوسف و تنادي باسمه و يجاوبها _اهانااا هنااا _هانااا امامااااا ...ماتهنات تادخل ، دخلت دوش، اسماء مع سنين تاتقدم ، اول تقدم ظهر فمظهرها و زينتها ، رجعت تتفهم فالماركات و اللبس حتى من فراش الدار غيراتو ، بلغت ثلاتينات ، هيا الان فاوج شبابها ، زادت طول و لاطاي رجعت من الإس ل لاغج ..زدادت فمناطق انثوية و رجعت امرأة بمعنى الكلمة ..دخلت دوش تتدهن و تعاود ، هذا كوماج هذا ماسك ، الفلوس تاتلعب دور و أسماء تتدخل النقود من البوتيك ..خرجت تتنشف جسمها مع مفضلتها فكتوريا سوكري تتعطي جسمها كلوو ! لبست عليها تا رن هاتفها وجاوبات : آزين ! زاينة: انا غادة مرجان ! تمشي ؟ اسماء: اييه ! خاصني شحال من حاجة زاينة : يلاه تسمعي كلاكصون نزلي اسماء: اوا والبراهش ؟ زاينة: اناخد عمر ! زياد يشد ليا خوه ! اسماء : اناخد يوسف و زكرياء يشد اخته ... ...هزت صاكها لبست عباية كحلة بعد ما دهنت ليكخون و كلوص ، رمات عليها شال و خرجت تتوصي في زكرياء على نعمة ..نازلة تحت تا لقاتو مع تلفزة تيخربق فسلوكة اسماء: اش تدير ؟ يوسف: ( هز صبعو تينفي ) ماااقستهااااش ( تيشير لراسه) واااش انا قستها ؟ اسماء: ( تتشوف فتلفزة و تتسمع كلاكصون ) زيييد قدامي يوسف: فيين نمشي ؟ اسماء: شوووف والله تنصمكك ؟ يوسف: فييين خوتي؟ علاش انا ديما اسماء: خوتك ؟ طول نهار وأنت تفقض فيهم .. يوسف : ( تيعبر ) خوووتي ! خوووتي ...واش انا بوحدي تديني اسماء : ( دفعاتو ) زيد باغي نجي لقى شوف تيفي سابقاني ! سويف : ( تيهرب لها ) خليني فالباب اسماء: و اللله تاتمشي يوسف : ( تيعيبها ) و الله تتامشي ! زيدي الالة اسماء زيدي ....زرع تحصد ! خدم تربح ! سبب اعبدي انا نكمل ، من زمان حاطة هدف امامها لي هو العمل ، بدات من عملها كمربية و من قبل هادشي قرات و تعلمات و صبرت انتظرات مشروعها سنين حتى بغا مولانا ، اليوم #مؤسسة_اولاد_الوازنة عندها سمعة جيدة فالحي و خارج الحي ، هاد السنة رجعت تستقبل الأطفال المصابون بالتوحد و تتشرف بنفسها على تدرسيهم و تربيتهم و دائما تتخضع لدورات تكوينية حتى من ايطاج لي كانت ساكنة فيه و كانت متافقة مع اسماء تشدو للخياطة ، رجعت تنازلت عليه اسماء و زادتو في الحضانة ، طموحها حاليا كبر و رجعت تتفكر تشري ارض و واطلع مؤسسة ديلوكس...زاينة اليوم تعتبر سيدة نفسها ، مربية أولادها! زوجة جيدة لزوجها ، امراة عاملة براتبها و سياراتها .. زاينة : نمشيو هاد الوقت مارشي تيكون خاوي اسماء : ( تتمسح عينيها ) نسيت نظاظر شمس زاينة : هزي نظاظري من صاك ..مدت يديها و فتحت صاك هزت لابواط نظاظر جبداتهم تتشوف فيهم و تتقيسهم اسماء: شوفي ؟ زاينة : جاوك واعرين ..لوي فيتون اسماء : الخرا ! سمية ماركات رجعو كثر من سميات بنادم يوسف : دروي نشوف اماما ! اسماء: ( دارت تاتبوزا ) جيت واعرة؟ يوسف: ( تيزيد مليحة ) جيتي قتالة اماما ...هزت تلفون قدات شال طالقاه و هبطت نظاظر شوية باش يبانو عويناتها و فتحت عباية تابان صدرها و خدات سيلفي و رماتو فسطاتيو ..دخلو مرجان يتقضاو ، #يوسف مهبلها لي شافو بغاه و زاينة مع عمر تيهرنن ..كملو تقضيتهم و خلصو بليكارط جارين شاريوو تيحطو سلعة فكوفر و تلفون اسماء تيرن يوسف: ماما تلفونك صدعني اسماء: غير بوتيك ! تبريت فيهم اليوم يخليوني ارتاح زاينة : اوا الصبر! احقا وجدتي كوليكسيون افخيكان ؟ اسماء : والو مزال دماغي مسدود ...دراري ياختي درااري يوسف : ( بازعاج ) اماما تلفووونك ... ...اسماء: ( قفزها ) يعطيييك الحلاقم ..( لمحت اسم نبيل تعجبت ) الو نبيل : فين راكي ؟ اسماء: فمرجان ! وصلتي دار ؟ نبيل: فدار ! ( بحدة ) دخلي لداك زمر لي لاوحتي مسحيه ومنين ترجعي لينا هضرة اخرى ! ...قطع عليها خلاها تتدور فعينيها ! دخلت سطوري لقات مساجاتو تيسب و يعاير ، مسحاتها زاينة: اشدرتي اصكعة ؟ اسماء : ( بانفعال ) مالي آش درت؟ زاينة : زيييدي خرررجي عيينييك فيا ! سيري احبيبة شوفي ليك معامن اسماء : تفوو ! مرضني اختي، حاااضيني فطالعة و نازلة .. يوسف: ( شاف عمر ) طاطا زاينة ولدك تيتقيا ..زاينة: ( بخوف شافت فيه ) ضروس مرضوه ليا .. ..مسحت ليه اسماء و عطاتو يشرب ، مسافة طريق كانو فالباب، كلها هزت تقضيتها داخلة دارها، من الباب لقاتو واقف تيسنى فيها تيطلع ويهبط اسماء: ( بابتسامة صفرا ) تغديتو ؟ نبيل: ( تيشوف فيها ) زااااكرياااااا زكرياء : (نزل تيجري ) نعم ابابا نبيل: طلع مع خوك تقضية .. اسماء: ( هزت جلايلها طالعة بيت هو تابعها ) ياربي ماتخرج طرح بسلام نبيل : (ردخ لباب ) مزيان ديك الحالة لي مصورة بيها ؟ اسماء: حطيتها غير فواتساب مع العائلة نبيل : ( بحدة ) ماااااتحطيييش زمر ! تبرييييت فيك زمااان ماتحطيش تصااورك ابنااادمة اسماء: ( رمات شال طلقات شعرها ) صافي راه مسحتها نبيل: واش تتقلبي عليا نهرس لمك وجهك ؟ واااش راسك مصنوع من الحديد؟ انا مراااتي ماتحطش تصاااورها ، ماخليتك تحطي تصاورك حتى وانت كي الكمشة عاد نخليك دبا ونتي عاطية العين اسماء : الطووووويل و تلبسوووو ؟ شعررري مغطياااه ؟ مااكيااااج و منعتيه ؟ اش باغي مزال ؟ نبيل : ( جبد تلفونو قدام وجها تيوريها صورتها ) شووووفي و حنزززي ! تتعاندي ليا مع مسالين قبهم اسماء: ( قلبت وجها ) صافي فهمنا نبيل : ماباغاش ديري عقلك ؟ علاش تتحرقيني بهاد الفعايل ؟ اسماء: شمن فعايل !؟ تصويرة حطيتها ماعجباااتكش و مسحتها ! نت لي حاضيني وخانقني نبيل : الله اكبر هادشي غير حاضيك و خانقك مصورة ليا البوزات ؟ اما كن قالب عليك يعلم الله فين توصلي ، و تتزيديها بتخراج العينين اناااا ضاااالمك اسماء : ( شدات بين عينيها ) هااادي و توووبة ! مااابقيتش نتصور نبيل : نتي عمرررك تفهمي قصدي ! انا بيا داك عقل عندك لي مااابغاااش يكبرر ؟ بغيت غير نفهم شمن مساج تترسلي بداك تصاور ؟ شوفوني هانا زوينة ؟ شوفوني هانا محيحة ؟ اسماء: براكة عفاك ! راسي منفوخ مع يوسف ماتزدنيش نبيل : يوسف ربي رزقك بيه باش تعرفي اش تنعاني معاك و مزال ...ديري اولى و تعيطي لتانية .. اسماء : اااش تندير ؟ نبيل : لا ماتديري وااالوو ! عوض ماتكبري ديري عقلك و تلتزمي بللباس شرعي و تصوني راجلك زايدة طالقة زينك و نت انبيل تفقص لوح راااسك من سطح اسماء: انااا ماغاديش ندير شي حاجة مانقتنعاش بيها ! نت ماكرهتيش تسد عليا فقفز نبيل: من نهار اول انا تنزير و نزززير و كنت ضد هاد صنعة ولا النم ! ها السبب علاااش ؟ اوو لااااباااس لي وصلتي هادشي تادرنا ااولاد اما موحاااال تعقلي عليا اسماء: علاش تظن بيا سووء ؟ فين عمرني خليييتك ؟ نبيل : راكي غادة فديك طريق ماحساش ! لباس و مصاوبة و بوزات و قوة صيكان و روايح ، حمام رجع عندي بحال بساج ماكياج ، فين غادة بهادشي ؟ اسماء: ( بلوكاها ) تتحسب ليا حوايجي ؟ نبيل: راه ماااعندش شغل غييررك تكااادي مرحبا ! ماتكاااديش رجعو نبيل و اسماء ديال عشر سنين هادي اسماء: ( خلاتو دخلت الحمام تتبركم ) هاهو يبدا تاني ، كرهت حياتي ... ..خرجت لابسة شورط و ديباغدوغ ، جمعات شعرها منخلاه هو جالس هاز تلفونو تيشوف و يعاود فصورة .. نبيل : انا عطيني غير خو جوابي ؟ شنو تيعني هاد تزواق و تصوري و تحطيها للبشر ؟ اسماء: ( عصبها) صافي تصورت و مسحتها ! مالك على هاد الخطبة ؟ نبيل: ( وقف مواجه ليها ) حياتنا كلها خطبة ! نخطب بليل تنسايه بنهار و نخطب ينهار يمشي مع الليل ! راك كبرتي واولادك كبرو ، نتي مزال مع سيلفيات و البوزات خاووين ؟ وتزوواق تزوواااق ! اتجهلي عدوو ربي اسماء: اااه دبا ندير لي بغيتي ! دخل تلقى فيا ريحة طياب و نبقى بحوايجي تلتيام و الحمام مرة فسيمانا و لبس حوايج امي و امك باش تبقى على راحتك ؟ كالك تزواق ؟ ( قربت ليه ) هااا كماارتي شنو طالية ليها ؟ نبيل : ( عاقدهم فيها ) ماغاديش توبي من القوالب ؟ وجهك كان تيبري و فمك ! راه حافظك و عارف عينيك فاش تيدورو فاش تتفكري ؟ ولكن بربي تانقاادك .. اسماء: عرفتي اش دير ؟ عطييينيييي اتساااااع ! بزاااااف على هاااادشي ؟ مدخل ليا فلباسي فهضرتي فضحتي ! بنااادم مريييض نبيل : ماااتغوتيش بنتك ناعسة ! نتي تمرضي قووووم ، علاش تتخدمي العكس ؟ باغانا نخسروها على شرفنا ؟ اسماء: ( بعناد ) اااه باغة نخسرها ! شفتي منين جبدتني بلا سبب والله تندير لي فراسي ..( تمت خارجة ) نبيل: فييين غادة ؟ اسماء : ماشي سوقك ؟ ياك فداري ؟ نبيل: لبسي عليك ! تكوني فبيتك جلسي تاعريانة ، تفوتي الباب لبسي عليك اسماء: ياكما كارية مع الجيران ؟ نبيل : اولادك كبرو ! _جننها ! فقصهاا ...ماعرفت حنى شنو دير مشات بلاكار بدات تهز فحويجها و ترمي للأرض ؛ تهز و ترمي و تغوت و تجنن هو مقابلها ..بردات جنونها و هزات الماء دالصباغة حلاتو و تترش عليهم و خرجت غادو كوزينة تيجيب البريكة باغة تشعل العافية ، راجعة من نيتها اتشعل تاشدها بقوة و هيا تتهز اسماء: طلقننننني و الله تنحرقههههم و الله لا خلييييت شي شروويطة نبيل : نعلي شيطاان ! اولادك تمرضيهم بغواتك اسماء: ( ضربات بريكة فارض ) اولادي ؟! شتي دوووك اولاد خلييتهم ليك ! ومخليا ليك هاد الدار لي باغي تحبسني فيها نبيل : ( بصراخ ) مااال دلمك دبا؟ مااغاااديش ديري عقلك ، يا نخليك ديري لي بغيتي ياااا نقودوها اسماء: طلعتي لياا فرااااسي لا انت لا اولادك لا حياتك نبيل: ( بحرقة ) آخر هضرة عندك ؟ اسماء: اااه نهاااية ... .._الانسان ماحدو تيكبر في الدنيا و مسؤوليته تتزاد ، ضغظ العمل ! ضغظ البيت و الزوج و الاولاد ، غير يوسف فيه جوج ، اسماء ديال عشر سنوات هادي ماشي هيا اسماء الحالية ، رجعت تتعصب و الخاطر تيضياق و غيرة نبيل رجعت عندها من المكروهات...دازت من حداهم طالعة بيت فالسطح هما تيطلو من بيت زكرياء : بابا خرج ؟ يوسف: ( بهمس ) يكون الواليد تيخون الوليدة ؟ ولا تكون الواليدة تتسرق ليه الفلوس؟ زكرياء: ( تلاوح بلاصتو هاز طابليط ) و الله يسمعك بابا تا يوريك وجهك فالمرايا يوسف : ( وقف امام بلاكار فيه مرايا ) مالي ؟ بوكوووص ! انا الوحيد لي لميمة تتكولي خموس عليك اوليدي زكرياء : ( عينيها فطالبيط ) تتكول ليك الله يهديك النمس يوسف: ( وقف تيتبوزا ) ليلة العشاء عند المخزن ! خاصني نضرب الحطة ...مولفين يسمعو غواتهم ! مولفين من نبيل الا كان مغير مع اسماء تتبان ليه فوجهو ، ولفو ! عارفين ساعة و دوز ، زكرياء تيتقلق فداخلو ماتيبغيش يشوف اسماء تتبكي و نعمة غالبا فاش تتحضر لصداع داك نهار عندها تتقطع ماكلة... الا الوحيد لي ضاربها بركلة و تيقيس تيشورط و تيوري لزكرياء يوسف: اااه كي جيتك ؟ نااضي المعلم زكرياء : هداك راه ديالي يوسف: مكتوب فسميتك ؟ ( جاي عندو ) وريني فين مكتوبة زكرياء: لبسو غير هنيني من هضوراتك يوسف: ( بدلو هز واحد اخر ) وهذااا ؟ تنضرب على شعة بحال فلاش سامسونج زكرياء رجع نشاغل باللعبة و يوسف تيلبس و يعاود و مخلي جوطية موراه ، تسمع المغرب تيأذن وصوت سيارة نوصير داخلة و نزل تيدردك فدروج ...تاخرج عندو ملاقيه يوسف: اافين العموم ؟ نوصير : ( مصغر فيه عينيه هضر برود) راه راديو فالكوفر و دير عقلك آيوسف يوسف: ( تيجري فتح كوفر وهز راديو لي بغى ) يحفظك اعموو .. ...مرة راديو خاسر ! مرة تلفزة صغيرة خاسرة مرة مولينكس ، اي حاجة قابلة للإصلاح #يوسف تيهواها ، تيطلب نوصير يجيبهم ليه ، لأن نبيل حلف ليه من نهار وقع سيركوي ضوء في الدار و نعمة بسبب داك السيركوي ماتتنعسش بخلعة ..هازو طالع بسكات للسطح تا خرج فيها اسماء : دوز تنزل نمشيو عند عمك يوسف: ( مخبعو مور ضهور تيشير لها بيدو طريق بحب ) إذهبي ياامي سآتي ورائكي اسماء : شنو مخبي مور ظهرك ؟ يوسف: لعبة ! تشوفي؟ اسماء : مانشوفش ! ماااتعطلش .. يوسف: ( تيهزز يديه وراسه بحب وهو تيشوف فراديو ) هياا لي مابغاتش تشوووف ..اجي اليوم نجبد لك مصارنك .. ....عندو مكان خاص و شبكة فيها سلوكة و كل مايلزم لاميكانيك كل مرة منين تيجمع ، هواية من صغر تلاحظت فيه ، من صغرو يشد لعبة يفرتتها ويعاود يركبها ، الدراجة هيا الاخيرة فكها وعاود ركبها ، يخسر الحاجة ويعاود يتقاتل معاها يركبها، خدمت هيا هاديك ؟ ماخدماتش هيا هاديك...منزل راسه تا سمع صوتها وقف تيجمع داكشي تيعيبها يوسف: وااااايوسف هبببط اسماء : واايوسف هبط يوسف : ( هاز يديه تيحلف فالهواء مقلدها ) و الله تنطلع ليك اسماء: ( هازة يديها تتحلف ) و الله تنطلع ليك ...( وقف عندها ) يوسف : هانا اماما ! اسماء : تحرك لبس باباك راه تحت فطموبيل يوسف : علاش انت ماتمشيش ؟ اسماء: ماغاداش .. ..دخل البيت لبس حوايجه و تم هابط تحت لقى خوتو راكبين و ركب حدا نبيل نبيل : فين ماماك ؟ يوسف: ماجاياش نبيل: ( زفر بغضب و نزل من السيارة ) قصوحية الراس ! كبرتي و شنتي ... ..باش داخل باش دااير ! اخر درجة خطاتها ضرب فيها منزلة راسها تتشوف تحت ورجع خارج ، غزز سنانو من يوسف ، صورتها ولو مخطوفة تحفرت ، ماكاين غير ضدد ، ضاربة ليك جابدور شكل شوميز مزيناه بصمطة كوتشي و سروال توب قصير مع صندلة صيفية خفيفة وصاك وشال إيغميس ، اسماء رجعت تكون مقلقة ولا فرحانة اناقتها ماتفرطش فيها ، خصوصا منين تتكون قضية فيها ضدد تتزيد كراد ...متجهة سيارة تبان لها يوسف نازل من القدام ركب للور ..ركبت منفخة و ديمارا عطا كلاكصون لنوصير لي قدامو خارج ، تسدو بيبان و شدو طريق عند فاروق ..سيارة نوصير تتسمع هدا ورصا و بكى و غوات وزياد داير فيها باهم يخاصم على هدا و يشد بخاطر هدا، و سيارة نبيل تلتزم بصمت لان الام غضبانة اما تنشط لهم القضية ...ساعة ماكملاش كانو امام الفيلا ..فتح لهم عساس الباب ، بركاو فجهة سيارات لي كانت تما سيارة مغيث و فاروق وخديجة ..نزلو دراري تيتجراو عشقهم هيا فيلا فاروق لابسين و تواسع و تيران كرة صغير و جلسة للعائلة على عشب بمنظر غزال ..اكيد من تصميم خديجة لي هاد سنين كلها تتفرش و تجهز حتى رجعتها من افخر الفيلات .. خديجة : مرحبااا مرحبببااااا .. ..رحبت بصغير الكبير ! جلسو غير فالجردة و الوازنة خرجت عندهم ، تجمعو العرايسات على صينية اتاي و الرجال فجهة اخرى كدالك امامهم دراري، اللمة تتجمع و الفرحة تتحل ، هضرة تجيب هضرة و ضحك تجيب ضحكة وهيا غااادة .. زياد : حساااام ! حساااااام براء : وااغير خليه ! ماتخافش عليه زياد: عارف دوك فلالس درهم؟ صدع الواليد تاجابهم ليه و الغد ليه قتلهم بكراطة راه دبا بانت ليه فشي فلوس امير : هدا خاصو لي يحطو فالغابة افريقيا يعرف بحق حيوانات زياد : ( شدو ) مالك ما تاتسمعش ؟ سير حدا ماما يلاه حسام : راه غير العيللات تما ! يوسف جرا عليا امير : ( تيدور فراسو) فين هو يوسف ؟ ...يلاه ايكوليه راه شافو جهة مكانة ضو هازو زكريا هو يتقطع ضووو حسام: ( طلع حواجبو ) هدا راه يوووسف لي قطع ضو انا شفتو حق القسم زياد : سيير حدااا مك ... براء : ( ناض واقف غادي ) اليوم يخرا عليه الواليد ، اخر مرة تبرا فيه من ضو ...شكون قطع ضو ! واش الضو مشى ؟ يلاه نايض فاروق شاف براء سابقو و تراجع ..براء دخل جهة مكانة بانت ليه طايحة من بطونة الكحلة ، طلعها و رجع ضو يلاه خارج من جهة اخرى يشد يوسف هو يسمع صوت البكا رقيق زاد خطوات هو يضرب فيها مكمشة تتبكي براء : ( هبط راسو ماعرفهاش ) جنى !! _هزت عويناتها غيه حومر و شفار فازكين ، قليل فين تيشوفها ! بعض احيان تيقول الا شافها فزنقة مايعرفهاش ، لان فاي تجمع ماتتكونش ! حتى الا كانت تتخبع و ماتهضر ماتكلم نعمة : ( بصوت باكي ) بغيت بابا ! براء : ( تنهد بهمس ) خفتي تقطع ضو ؟ ماتخافيش ، يلاه نديك عند عمو نبيل نعمة : ( وقفت ماشداتش فيديه مسحت دموعها ) زيد براء : ( جمع يديه) وااا زيدي نعمة : ( بشوفة قاصحة ) انا عرفت طريق صافي ..خرجت تتجري الخارج وخلاتو تيشوف تا كمل طريق لقى جنة جاية تتجري تتضحك ... براء : عنداكي طيحي جنى : وِير نيما ( فين نعمة ) براء : مع باباها ( شاف يوسف ) اجي نت لهنا ! زكريا : ( بهدوء) نعام براء : علاش قاطع ضو ؟ واش باغي عمك فاروق يعلقك ؟ زكريا : ماشي انا أخويا براء ! راه يوسف كالي هزني نجرب واحد لعيبة براء: براكة اصاحبي من ترهبين زكرياء : و الله ماانا يوسف ...انا ماشي انا ! انت ماشي انا !! شدو مخرجو هو يبان ليه يوسف بصح شادو فاروق مهبط راسو قدامو باين تيسمعهم ليه براء : تانتما اصاحبي تتالفو زكرياء : ( أشار حاجبو) انا عندي هدا الحاجب هابط يوسف الا براء : واخة الخوادري ... فاروق: برررب و نعاود لقاك معلق فشي مكانة تنتفاهم معاك نبيل: آش داك لضو تاني ؟ يوسف: ( حاني راس ) غير فضول آبابا ! اقسم بالله مانعاودش ماعرف دقة منين جاتو ، هو غير فاروق لي شعل معاه فاروق: خلي الله بعيد ! مالك اصاحبي مالك؟ ما انت مع لي تيقراو ؟ مانت مع اصحاب سبور ؟ معامن انت ؟ يوسف : ( شاد بكية) مع اصحاب ضو مغيث : هههههههههه العالم هاد يوسف نبيل: ( بحدة ) تحرررك حدا اولاد عمك من بعد الهضرة .. مغيث : ارخفووو عليه ! الاعندو ميول هاد ميدان ساعدو وصافي نبيل : صعيب عليه فهاد سن ! شي نهار يسكت ليه القلب بشي سيركوي ، راه ضو هدا فاروق: يشد غير الباك مع خوتو و يدير تخصص مزيان لي يتكل عليه بالمستقبل نبيل : الله يدير الخير وصافي ! يوميا مكانة الضو طايحة اختو مركب فيها رعب مغيث : فالصغر كنتي تتديه لافيراي ؟ نبيل : ( حرك راسو برفض )من ديك الكارثة لي وقعت وانا متجنب نديهم .. نوصير خارج من فيلا كان ناعس ..جلس تيكب آتاي فاروق: تتدي يوسف انت لافيراي ؟ نوصير : اباه وماداهش ! انديه انا ..علاش مالو نبيل : ( شد فراسو ) مع الضو تاني ، راه طيح مكانة ماسمعتيش ؟ نوصير : انا نعست آخويا عيييت فاروق: ( تقاد فالجلسة مرتاح ) كالوها الولين كل الدار فيها كيضاااار .. ....تعرف مول فعلة و سمع توبيخ ! و بداو يحطو العشا تاجات خديجة عندهم خديجة: نحطو مجموعين ؟ اسماء : لا للرجال ! حطي لينا غير هنا الله يحموالديك خديجة : تعذبو فارض اصاحبتي الوازنة : اوا الحال مبرد ! انا عطيني يديك نوض نتعشى مع اولادي نوضوها تامشات عند اولادها و احفاد حطو لهم بوحديتهم من غير البنات لي جاو حدا مواتهم زاينة : الله جو مبرررد خديجة : مالك تاني ضد رجال ؟ ليالي : ( تكات عليها شافت فيها تاتضحك ) نبيل غوت عليها خديجة: ( بطنز ) حلفي ؟ ويلي حرااام عليه ! ونتي اش درتي ليه ؟ زاينة: ( تتقلب فعينيها )وااالوووو غير ضربت واحد سيلفي خطير حطاتو فسطوري خديجة: فيك الفعاايل ابنتي ! تتجبدي صداع على والو اسماء: ( عوجات فمها لمحات واقف تيهضر فتلفون تيشوف فيها قلبت وجها ) خليني نجغددو راني من الفطور خديجة : بصحتك احوووبي شكون شدك .. زاينة : عيييت اختي مانهضر معاها! شي مرات تنقول دارت عقلها وشي مرات العفوو اسماء: ياك كنت معاك فاش شديت سيلفي؟ زاينة: واكنا بجوج ! هاهو شافو و قلب دنيا خديجة: اسماء ! راه كبرنا واش اولادنا يديو عيبنا ؟ صافي الحاجة لي ماعندوش معاها نتجنبها اسماء: حاضي ليا حوايجي و كريماتي و ماكياجي كووولشي ليالي : ( بهدوء ) ماعندوش حق ! هداكشي تيخصك نتي ولكن حاولي تستغليهم لصالحكم ، مثلا ضد ماكياج ديريه فالدار زاينة : هانا قدامك لخدمة هلكاتني و دراري و تانوصير فيه ديك قضية اللباس قصير الا و الا هملت راسي ماتيعجبوش الحال، تلبس فداري لي بغيت و نفس وقت مراعية اسماء: قالك ممنوع شورط حدا اولادك خديجة : راه كلها تربيتو و شخصيتو ، نتي تبارك االله مازدتي عطيتي العين شكون يعطيك والدة زاينة: زيدي لها فيه ! نوووضي جمعي راسك و تصالحي مع راجلك انا عزيز عليا نبيل ماتيهزش عين كاع ليالي : الله يعمرها سلعة تيبغي مراتو و اولادو ديما مغيث تيقولي هداك الوحيد ماتيتسوق حتى حاجة غير اولادو و مرتو خديجة: ( طلقاتها بضحكة ) دوري ليا فدوك عينين اماشا أسماء: و الله ماعرفت هاد سيد لي تتهضرو عليه! فين رؤيا؟ خديجة: صباح خير !! راها مع اختي أميمة دايرة افتتاح لابوتيك لي فتحت شوية و تجي راها فاروق عطاها تلاتة سوايع ليالي: البنات نهار سامدي العرس عند بنت عمتي اتزوج ولدها خديجة : اخت ريم مرات أذيب ؟ ليالي: وي ختها الكبيرة اتزوج ولدها الكبير ! مرحبا بيكم راه تاصلو بيا نيت توحشت العراس المغرب خديجة: انشاء الله نجي والله تنجي ... اسماء : اوا اختي كولشي على عينك ! تصويرة شوهنا بقى غير العرس ليالي: انقول لمغيث يقولها ليه ! ونتي ازاينة اتجي ؟ زاينة: مع المكتاب انا ماعندي راجل يتحكم فهادشي .. انا وهاد براهش الا طلقوني ... ...لمحاتو تاني تيشوف فيها و هاز نعمة فحجرو ، طولت شوفة فيه و قلبت وجها عارفة هاد حركة تقتلو ! كاين حب كاين وفاء. ولكن مامستعداش تنازل ليه .. اسماء: ( بهمس ) كودك عندي وكودي عندك ! تتمرضني وصافي ...بقاو مجمعين تاوصلت سيارة اميمة سلمت عليهم و وصلت رؤيا سالمة كما داتها ، و دخلت رؤيا فرحانة شحال ماخرجت ، سلمت على اعمامها و غير حانية راسها و مشات جلست حدا عيالات اعمامها خصوصا اسماء لي صحبة هيا وياها اسماء : فوجتي ؟ رؤيا : داكشي غزاال ! ليالي : ( متكية مرخية ) رورو اتجي الماغياج مع ماماك ؟ رؤيا : دياالمن ماغياج اطاطا؟ ليالي : مانيييس ! رؤيا : نشاء الله .. خديجة: ( جات جلست معنقة رؤيا ) اححح الحب توحشتك، كي دوزتي العشية مع خالتك ؟ رؤيا : داكشي تيحمق اماما، عندما دي موديل زوينين خديجة : ماخديتي والو ؟ رؤيا : حشمت قالت ليا هزي لي بغيتي و حشمت زاينة : فين جا هاد بوتيك ؟ رؤيا : فسونطر **** دوزيام ايطاج ....الجلسة تتحلى ! الوازنة دخلت تنعس ومساعداها رؤيا و الباقي كلها ديمارا سيارتو هزو اولادهم متجهين للديورهم ، اللمة العائلية ماتتسخاش بيها ! نعاس غلب عليهم ...وصلو اخير و نوصير نزل يحل الباب تانزل زياد هاز حسام و نوصير هز عمر و زاينة هازة صيكان خلاوهم علل خير و طلعو ، اما توام مزال فايقين طلعو بيوتهم من غير نعمة لي معلقة فنبيل تاطلعها معاه بيتهم .. نبيل: ( نعسها حداه متنهد تيشوف لأسماء تتبدل ) تنعسي فبيتك ابابا؟ نعمة: اطفيو ضو ؟ نبيل : ( تيشوف عويناتها تيحمقوه غير أسماء ) لا ابنتي نخليوه شاعل ! ماتخافيش ابابا اسماء: ( جات وقفت عليها ) يلاه نعسك اماما ؟ نعمة ...حركت راسها وهزتها داتها بيتها ، حطاتها بلاصتها تتنتظرها تنعس ! تا داتها عينها ويلاه جات تحشى حداها هو يدخل نبيل : نعست ؟ اسماء: امممم نبيل: ماتنعسيش حدايا ؟ اسماء: ( تنهدت لعنت شيطان خرجت وهمست بهمس ) تقطع فالقلب يتبع... للمزيد من القصص تابعونا على : الواتساب : whatsapp.com/channel/0029VaicQtDKLaHqQiLXua02