قصة المزحة #الجزء 125 : ارثر: واخا تعياي ماتهضري هادشي لي في بالي و نظري ليهم عمرو ماغادي يتبدل هادشي ماشي لخاطري, غير نبدلو الموضوع دابا. ايلاف: اشنو طرا؟ ارثر: من بعد عامين مور الموت ديال واليديا عاد عرفت اش طرا, و كانت عمتي هي لي عاودات ليا, كانت عندي 10 سنين ديك الساعة, فاش عرفت بلي السبب هي خالتي كعامل اول و عمي حتى هو. ايلاف شهقات: ياك قلتي ليا ماتو بكسيدة ؟؟ باكما كانت خطة محبوكة؟ ارثر: كوني اكيدة كن كانت هاكاك عمرهم يشوفنو نور الشمس, القضية مخربقة و قديمة. عمي كان كيبغي ماما, و خالتي كانت كتبغي عمي, بابا بحكن انه كان هو لي كبير فهو لي تزوج اللول و جدادي كانو صحاب و مشاركين فالحل لي كان هو بابا غادي يتزوج يا خالتي يا ماما, و كلشي كان كيقول غادي ياخد خالتي بحكم انها هي لكبيرة و لكن بابا ختار ماما, و عمي باش يبقى قريب ليها خدا خالتي و هادشي لي خلا خالتي ديما حاقدة على الوضعية كان ديما كيبغي ماما و هي دارها غير طريق و كان عارفها كتبغيه, الوقت دازت واليديا عايشين حياتهم حتى كلشي غادي يتقلب نهار غادي نكوونو معروضين عندهم, كنت كالس حتى كيبانو ليا كيتغاوتو مافهمت والو حتى كتبان ليا ماما خارجة كتبكي و ركبات طوموبيل و مشات كتجري, ديك الوقيتة كان بابا يالاه داخل مع تعطل في الخدمة شافها كتجري و ماوقفاتش تبعها بسيارتو, وونساوني انا تما حتى كيقولو ليا بلي مشات بسرعة حتى خرجات في شاحنة و المنظر كان قدام عينين بابا لي بالصدمة طلق المقود حتى خرج على طريق و هذا هو الاستنتاج لي لقاو, تخيلي لدرجة انهم سكت ليهم القلب دقة وحدة بحال كانو بزوج عايشين بقلب واحد, و في اخير لقينا بلي 3 لي ماتو ماشي غير 2, كانت ماما حاملة و ماكناش عارفين. ************ فاقت من سهوتها و من الموقف لي طرا ليها مع ايميلي, و هي تبدا تهضر مع راسها " زعما تكون باقي كضور عليه!؟" " و تزوج بيه كاع انا مالي سوقي" " و الا كانت بيناتهم شي حاجة زعما, لاش جاي كيضور عليا" " اوووف, يعومو بحرهم, ماشغليش فيهم, ركزي ا ايلاف" حتى حسات بجودي كتزعز فيها. جودي: و ايلاف فين مشيتي !؟ ايلاف:ها انا معاكم , شنو قلتو؟ ادم: بغيتي تكلسي باتي معانا, اما مرتي بلاصتها حدايا, ماعندها فين تبات. ايلاف: يا ربي سلامة, خشيها حداك ماعندي ماندير بيها, ايوا ا سيادنا خليتكم على خير, نوض نمشي فحالي انا. جودي: ا فين غادي تمشي, كلسي تباتي معانا. ايلاف:سيري فحالك اختي, نتي و راجلك و انا اشنو ندير, شيطانة وسط منكم. جودي: ههه تي مالنا انعسوك وسط منا, راه بيتك واجد. ايلاف: و لا ا لالة انوض نمشي فحالي, عيطو ليا على ولدي يالاه نمشي رتاح. ____________ ارثر كيجمع حويجو في فاليز و كيتفكر الخطة لي كدير و كيبدا يضحك, باغي يشوف ردة فعلها كيفاش اتكون. كمل و نزل لقى ايميلي كتسنى فيه,☆~~ هاد الاخيرة لي رجع مسالم معاها و مع عمو و خالتو و سمح ليهم بمجرد ما سلم و بحث و عرف بلي كلشي بالمكتاب و بلي الله كيسامح و حنا مامسامحوش و رجعات العلاقة صافية بيناتهم و شحال من مرة كيبدا يعطيهم نبدو هلى الاسلام كيجيب ليهم شي كتاب في شرح عليه,و لكن ماعارفونوش راه سلم باقي مامستعدش يعلن اسلامو, انما كيدير كل مافي جهدو باش يوريهم طريق النور و طريق الصحيحة. اما ايميلي فحط معاها نقط على الحروف من مور ماصلح معاهم العلاقات و هضر معاها. ارثر: ايميلي نتي راك ختي, ماكانشوفكش كثر ماهاكا, و مستحيل تكون بيناتنا شي حاجة, في قلبي شخص واحد و هو لي غادي يبقى فيه ديما مادام باقي حي. ايميلي: و لكن فين هي !! مشات و خلاتك......... #يتبـــــــــع....... تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM