الأسود 🖤 الجزء العاشر 🔥🔥🔥🔥🔥 ( التتمة من بعد 320 لايك طاكيو صحابكم يقراو القصة 🔥) _درت السمطة وقبل مانتحركوو حطات إيديها فوق كتفي وكانت مركزة عينيها عليا وعلى وجهها إبتسامة بريئة كتفتن العقل سناء : مهدي شكرا بزاف على هاذ الخرجة الرائعة خليتيني فرحانة بزاف عمر شي حد حسسني بهاذ الشعور حسيت معاك بالراحة والسعادة نتا ماكينش بحالك _ مزال ماشفتي والو هاذي غير البداية انخليك ديما فرحانة وغادي نعوضك على أي حاجة خايبة عشتيها سناء : اتفرحني ديال بصح نهار تولي تشوف _ إن شاء الله لي بغاها الله هي لي غادي تكون ، ديمارات الطومبيل وشدينا طريق آسفي بقينا كنتحدثو حتا وصلنا قدام دارنا توادعنا هي مشات وأنا دخلت للدار الواليدة في الكوزينة شافتني جات لعندي الواليدة : شتك وليتي كتلاقا بهاذ البنت بزاف ياكما وليتي تحب العفريت _ الله يهديك الواليدة أشمن حب الواليدة : امممممم شوف فيا _ هزيت وجهي فيها وأن حشمان بتاسمت في وجهها وكملت طريقي لبيتي الواليدة : من خلال نظاراتو وابتسامتو لي وتات وجهو ونوراتو عرفت أن ولدي ولا كيحب حيث ماشي هاذا أمين لي كان غير كيخنزر تبدل _دخلت لبيتي وانا فرحان خدمت الديسك ديال الوترا وبديت كنشطح من الفرحة وكنتخيل دوك اللحظات لي عشت مع سناء فاش شبعت شطيح تلاحيت بلاصتي وكنشوف في السقف وكنتخيل وجهها بروجولة هاذ البنت لونات ليا حياتي المظلمة ، قبل مانعرفها كانت حياتي ظلام وعمري كنت فرحان لهاذ الدرجة حتا في الفطرة لي كنت خدام فيها ، من بعد طول تفكير مشيت بدلت حوايجي خرجت الكوزينة درت الكسكروط مع كان فيا الجوع ساليت ورجعت لبيتي شديت تيلي بديت كنتفرج في فيلم ديال الزومبي بيما طاب العشا الواليدة : أمين هود العشا موجود _ سمعت الواليدة كتعيط هودت غسلت ايدي وريحت كناكل الواليد : فين كنتي اليوم شفتك غابر _ كيما العادة الواليد غير خارج ، زربت كليت دغيا و فاش ساليت ماكلتي طلعت السطح جلست فوق الكرسي كنراقب النجوم وكنحسب فيهم وكنسميهم كنقول ها الواليدة ها الواليد هامهدي ها سناء سميت كلشي وبديت كنضحك على راسي ماضحكوش عليا ولا تقولو هاذا تسطا حيث هكذا كنت كندير أنا وخويا من الصغر ، واحد الوقيتة حسيت بالبرد هودت بحالي للبيت شربت الفنيد ديال النعاس وبقيت كنتقلب في بلاصتي وأنا كنتفكر أحداث لي وقعو اليوم حتا داني النعاس فاش فقت الصباح حسيت براسي ماشي هو هذاك صوتي باح نيفي كايسيل وعضامي مسهرسين ضربني البرد فطرت ابزز وسخرت الواليد يجيب ليا الدوا من الفرمسيان ناض مسكين خداه ليا الواليد : هاد الفنيد تشربو 3 المرات في النهار من بعد الفطور والغدا والعشا _ شكرا الواليد ، خديت فنيدة شربتها وطلعت البيت تاصلت بسامي علمتو بيلا العشية ماغنجيش حيث مريض ، دعا معايا بالشفاء وقطع من بعد لابيل هزيت المانطة ديالي وخرجت لصالون تكيت تما شديت تلفازة كنتفرج في دراغون بول من بعد ماسلا شديت MBC2 لقيت فيها فيلم ديال سبيدرمان الواليدة : ولدي اجي تاكل _ غير كولو ماعندو منين يدوز ليا بصحتكم الواليد : اجي كول غير شوية على ود الدوا _ نضت نقبت شوية كيف كيقولو خديت دوا ورجعت تكيت بلاصتي وفي الوقت لي كنمشي نتلقا فيه مع الكليكة كنقول مع راسي كون غير مشيت شفتهم توحشتهم غير دكرتهم سمعت صوت مطور سامي وصوت حمزة حيث فيه التجعويق وبلا مانطل فهمت البلان جايين عندي يشوفوني دقو الباب حلات ليهم الواليدة دخلاتهم كان حمزة وسامي كيف توقعت حمزة : الساط باقي الكليكة على برا وحنا سبقنا باش نتشاورو معاك واش داركم زعما كول يعني هانية إلى دخلو البنات يشوفوك _ عادي غير سيرو عيطو عليهم ، مشاو لعندهم عيطو عليهم شوية كيتماو داخلين هازين الحليب والسكر ودانون كليكة ديالي مصوابين حادرين عينيهم زعما الحشمة سلمو عليا وعلى الواليدة وريحوو معايا في صالون والواليدة فرحانة بيهم وكترحب بيهم الواليدة : مرحبا بيكم دار داركم أنا شوية نرجع فدوى : الله يجيب الشفاء اخويا المهدي _ أمين الله يحفظك اختي مرحبا بيكم عندي مريم : هاذو ذنوبي المسخوط كيفاش أنا منشوفش الورد الحمر مابلان ماوالو _ بنت العبد خبار في راسها عاودات ليها سامي: درتي معانا العيب اخاي المهدي غير قولها ليا نمشي معاك تشري الغوب حمرة _ وناري على بلان الفرشة اون بيغصون كلشي في خبارو الموضوع ، دابا كاملين في راسكم الخبار ؟ حمزة : وهل يخفا علينا شيء هناء : ديرها غير زينة توصل سارة : حتا حاجة ماكتخبا في هاذ الوقت _ قرصت سناء حيث كانت جالسة حدايا وقلت ليها فرشتينا سناء : أنا عاودت لهاذ الزبلة ديال مريم وهي دارت الدعاية مكتسكتش _ صافي ماوقع والو ماشي موشكيل عادي سارة : حمزة و المسخوط واش دانون جبناه لدري لي مريض ولا ليك نتا حمزة : إلى ماشربوهش ليه عشرانو ماكينا معنى أيمن : سالي منو دوز الحليب حتا هو وبازز _كول بصحتك اخويا حمزة ... بقينا كنديوو ونجيبو في الهدرة شوية كاتما جاية الواليدة وجايبة في ايديها سخرة كرواصة والحلوة وشي سخرة ومتقلة .... والواليدة كنقول ليك سدي الباب بشوية كنت انفرش راسي شوية وكنت نقول ليها ( ماتبقايش تهزي تقل ) كنسا راسي بعض المرات منير : ماغديش تورينا بيتك _ ها بيتي هو لي مريحين فيه دابا الساط كنعس غير في صالون ماعنديش بيتي مريم : احم احم _شفت مريم كتقرص في منير زعما حشومة حيث حرجني ولكن ماعليش منقدرش نوريهم سوا بيتي ولا بيت خويا حيث بيتي فيه الملاحظات معلقين في البيت كامل وبيت خويا فيه الصور ديالي معاه منقدرش نفرش راسي قدامهم اللهم يحساب ليهم كنعس في صالون ولا نبان . سناء : شنو وقع ليك حتا ضربك البرد _ طلعت كنتخيلك بين النجوم ومع كان البرد ضربني فدوى : هاي هاي على نزار قباني سناء : وقول _ ديما ماكيتيقوش بالصراحة والكذوب كيتيقو بيه شهدو عليهم فاش كنقول الصراحة كيكدبوني 🤣... لبارح دخلت دوشت ومالبستش حوايجي في الدوش خرجت غير بفوطة حتا مشيت لبيت عاد لبست وهنا فين ضربني البرد يمكن سناء : بقا ترد لبال لراسك _ بقينا كنديو ونجيبو في الهدرة حتا دخلات علينا الواليدة وفيديها الكسكروط حطاتو وريحات معانا بدات كتجمع مع دراري و دخلاتهم في موضوع القراية ، الواليدة عندي مجهدة شوية حيث هي أستاذة جامعية وغير خدات تقاعد نسبي بسباب واحد البلان ، الواليدة : محال كدخلو تقراو _دراري خاويين ماقريين والو باين فيهم داك زهو والنشاط غير سطولة محطوطين زمطاتهم الواليدة الواليد : سلام عليكم الجميع: عليكم السلام _ الواليد غير قال ليهم سلام عليكم ومشا دخل لبيتو وحنا بقينا مجمعين وكناكلو تاوصل الوقت لي كيتحركو فيه من حدا لافاك وجمعوو الوقفة هناء : دراري الوقت خاص نخليو دري يرتاح حمزة : الله يخلف اخالتي أيمن : يله اخويا مهدي مايكون عندك باس سامي : تهلا في راسك اعشيري سناء : رد البال لراسك والله يجيب شفاء _ مشيت معاهم تال حدا الباب وقبل ماتخرج سناء جريتها لعندي وشديت ايديها نتي بدات ماسخيتش بيك كون ابقيتي معايا سناء : ماكرهتش ولكن ايخصني نمشي _ يله خرجي دغيا قبل مانخطفك واحد الراس كيقول ليا ديرها سناء : اويلي كون تحشم ماماك كتشوف _طلقت ليها من ايديها وتلفت بالعرض البطيء لواليدة لقيتها حضياني وكضحك سديت الباب ودخلت بلا حتا كلمة ريحت في صالون جات عندي الواليدة الواليدة : مزيان اولدي هكذا بصراحة لاعب دور مهدي على أحسن وجه شكون قال أن امين يولي اجتماعي ويوليو عندو صحاب كنتي بحال روبو كتعرف غير الخدمة ليل ونهار حتا حنا ماكنتي عاطينا وقت _ الوقت كتبدل اميمتي شكون قال نوصلو لهاذ المرحلة ولكن كنظن هادشي لي وقع في صالحنا ، بسباب هاذ الموشكيل تعلمت نقدر الوقت العائلي وندير صحاب عكس كي كنت هاملكم فاش كنت خدام كان كيحساب ليا الخدمة هي كلشي الواليدة : ايوا عنداك ملي ترجع تخدم عنداك ترجع لعادتك القديمة _ كوني هانية الواليدة عمري نرجع كي كنت واخا نرجع نخدم ولا عرفتي شنو كاين بلان ماعندي ماندير بشي خدمة انبقا مريح غير حداك نخلي مهدي مكمل على الدور ديالي هههه الواليدة : لا لا العگز تاني بزاف خايب خاصك ترجع خدمتك وفي نفس الوقت تفرغ وقتك لعائلة وتكمل دينك ماكرهتش تكون هاذ البنت زعما سناء مرتك باينة فيك كتبغيها بزاف _ الواليدة هاذشي لي كتقولي مايمكنش واش هي أتقبل بعما الواليدة : في هاذ المواضيع كتبغي دير فيها مكلخ على نتا عما ؟ _ ماشي زعما عما ولكن أنا كاذب عليها في كلشي وكيحساب ليها عما ، راني كنعرفها مزيان ملي تعرف حقيقتي اتبعد مني على الكدوب ديالي وحتا على حياتي لي عامرة مشاكيل كيف دارت هدى من قبل حتا حد مايبغي يعيش معايا .ط الواليد : سمع اولدي هدى طماعة وخوافة داكشي علاش مقدارتش تكمل معاك وماشي كاع البنات هكذا تقدر يكون في هاذي الخير وتطلع مزيانة رآه البنات فيهم زوين وفيهم الخايب هانتا شوف مك بدينا من زيرو ووقفات معايا حتا وصلنا لهاذ المرحلة _ أنا وديك البنت ماشي بحالكم زيد عليها هي منظنش تبغيني واخا نبغي أنا الواليدة : مالك نتا شنو خاصك 1000 وحدة تمناك _ يكون خير ، رجعت بيتي كنفكر في كلامهم ولكن لي ماعرفينش أن باها العدو ديالي ومايمكنش تقبل بيا نتزوج بيها واخا تحل مشكلتي حيث الحل الوحيد باش نتفك أنا هو ندخل باها الحبس ، جبدت واحد الكتاب كنقرا عند سناء ↔↔↔ صوفيا : اهلا حبوباتي دخلو مرحبا بيكم مريم : ختي صوفيا لباس عليك صوفيا : بيخير اختيتو جلسو نمشي نعمر ليكم اتاي فدوى : مشات صوفيا توجد اتاي وحنا جلسنا كنهدرو بيناتنا سناء : فدوى فكرة غبية هاذي شوهتوني غير بلا ماتقولو ليها فدوى: سكتي اصحبتي صوفيا غادي تعطيك الحل كوني أكيدة صوفيا : بحال إلى سمعت بغيتو مني حل ياكما عندكم شي موشكيل سناء : لا والو صوفيا : شامة ريحة شيحاجة شنو كاين ياكما موضوع كيخص الولاد مريم : بحال داكشي صوفيا : ايوا قولو ليا خلاص نسمع موضوعكم فدوى : دابا سناء في حياتها واحد الولد صوفيا ضحكت باستهزاء: ههه بغيتي شي طريقة تخرجيه من حياتك كاينين الحلول بزاف مريم : لا بالعكس هي كتبغيه وبغاتو يكون ليها صوفيا : اوووو القضية فيها الحب عاودو ليا كتر باش نفهم الموضوع ، شكون هاذ الولد وشنو كيجمعكم أسناء سناء بحشمة : هو صديق ديالنا جميع ومعانا في الكليكةوكتجمعنا غير الصداقة صوفيا : كيفاش كيتعامل معاك ؟ عمرو بين ليك الاعجاب ديالو سناء : كيتعامل معايا زوين ولبارح خداني لحديقة زوينة كتسما حديقة الدماء كلها ورود ، قال ليا كان بإمكاني نعطيك وردة بحال الناس ولكن بغيت نهديك حاجة مختالفة وشطحنا تما وليوم قال ليا ماكرهتش نخطفك باش تبقاي معايا ملاك : خداها لبلاصة رومانسية وريها التصاور ديال الحديقة صوفيا بدهشة : واووووو بلاصة زوينة بزاف هاذ الولد رومانسي سناء : اه رومانسي وكلامو زوين ومعاملتو واهتمامو كتر ولكن لحد الساعة ماعرفتش شنو كنعني ليه واش كيعاملني هكذا حيث كيبغيني أو كيعتابرني مجرد صديقة صوفيا : ياصحبتي ماتكونيش هبيلة كون كان معتابرك صديقة مايديكش نتي من دون صحباتك حيث كيف قلتي صديق ديالكم كاملين مريم : قلتها ليها وهي بدات كيعاملها هاذ المعاملة صوفيا :أصلا شكون يقدر يرفض وحدة بحال سناء أو مايبغيهاش، نقدر نشوف صورتو وروه ليا نشوفو سناء : هاهي صورتو أختي ( وريتها صورتو معايا وكاين نظاظر ديال العميين وهاز عصاتو ) صوفيا : ولكن هاذا عما ؟؟ فدوى : أه عما مسكين ولكن درويش بزاف هناء : من بين أحسن الناس لي عرفنا في حياتنا طيب و شخصيتو مرحة وقوية بزاف سناء : مختالف على كاع الناس لي عرفت عندو واحد الجادبية خاصة فاش كنكون معاه كنحس بالسعادة ومكنسخاش بيه يمشي وكنبغي غير ايمتا يجي الصباح باش نعاود نشوفو صوفيا : بيبي أنسولك سؤال واحد إلى كنتي عارفة الجواب ديالو أيفيدنا بزاف ومن خلال الجواب ديالك غادي نعطيك نصيحتي سناء : سولي صوفيا : هاذ الولد عندو أمل يرجع يشوف أو غادي يبقا عما ، أكيد غادي يكون مستشار مع طبيب حيث كاينين الحالات لي كيرجعو يشوفو وكاين لي لا سناء : قال ليا أن طبيب قال ليه عندك أمل ترجع تشوف صوفيا : خبار زوينة ايوا شدي فيه بيديك وسنيك ووقفي معاه حتا يرجع يشوف سارة : تخاف غير يرجع ليه الشوف يخليها هههه صوفيا : هههه يله قلتو مختالف وزينتوه في عيني وزايدون واخا يكون مضروب بفردي خاوي مايديرهاش بالعكس غير ماغدي يزيد عشقها فاش غادي يشوفها حيث تبارك الله سناء زوينة سناء : مهدي طيب ومن النوع الى بغا الحاجة مايفرقهاش صوفيا : قولو ليا كيفاش تعارفتو سناء : عاودت ليها كلشي من أول سوء تفاهم وقع بيناتنا إلى يومنا هاذا صوفيا : هههههه والله متشوقة لقصة حبكم حيث جاني فيها التشويق والحماس عكس العلاقات العادية لي كتكون مملة ، ومن خلال ماعودتو مهدي حتا هو كيبغيك غير متردد يقولها ليك فدوى : ايوا كيفاش نخلوه يعتارف ليها صوفيا : بغيتو الخطة !!! الجميع : اه قولي نسمعو صوفيا : بلاتي نجيب ليكم اتاي والگاتو و نعطيكم خطة جهنمية غادي تعجبكم مريم : تايقين في الخطط ديالك داكشي علاش قصدناك نتي _ صبح نهار جديد فقت شوية معطل فطرت وشديت التلفازة بيما وصلات الوقيتة المعهودة تغديت وبدلت حوايجي وخرجت لافاك ريحت في القهوة ، جاب ليا حمد قهوتي وريح كيجمع معايا وكيعاود ليا على مشاكيلو لي عبارة عن ماديات بديت كنقول معا راسي أنا ناقصيني مشاكل لي كتعاود ليا هادشي ديالك ولكن مابغيتش نقمعوو تاني خليتو يخوي قلبو بيما تجمعو الكليكة مشيت لعندهم سلمت عليهم مريم : عاجلللللللل خبر سار للجميع سناء : الأسبوع الجاي...يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM