الأسود 🖤 الجزء الثاني 🔥🔥🔥🔥🔥 ( التتمة من بعد 300 لايك طاكيو صحابكم يقراو وجمجمو أحسن قصة تقدرو تقراو ❤️🔥🔥) وقفو عليا 2 دراري ومعاهم هاذ البنت ماكين لا سلام لاكلام عرفت الدعوة اترون مع البدية دخل فيا واحد بواحد الكروشي ولاخر شدني گرتاني من لور بدا يدخل ليا في الكروشيات هاذي تنفع هاذي ضر هاك لحبك زيدك خود مزال وبدون مقاومة مني حمد السرباي : لا لا واهيا واسيي حيد بلاك واش مسطيين حاگرين على واحد عما _ كليتها في عظامي بديت كندمع ليهم وكنقول ليهم علاش كضربوني اش درت ليكم حشومة عليكم يارباعة الحگارة غادي نديكم الحبس سناء : تبسل عليا ودارها بلعاني المكبوت لاخر خاصك كثر حمد السرباي : اش ايدير ليك اختي السيد غير عما يهديك الله ايكون أوقع شي سوء تفاهم وصافي رآه هاذ الدري مسكين عما أيمن: كيفاش عما واش ماكيشوفش ولا شنو حمد السرباي : على عما عندها شي تفسير آخر كيف كتشوفو رآه السيد ماكيشوفش واش ماكتراعيوش اصحبي حشومة الظلم ماكيبغيه لا الله لا عبدو حگرتو عليه وهو عما لاحول ولا قوة الا بالله منير : الله اكبر شنو درنا موشكيلة صافي سناء : قفرناها الدراري يمكن ظلمناه مادارهاش بلعاني أربي ماسمح ليا اخويا عفاك _ بقيت مسرح فالأرض و كنشوف في السما كنمثل عليهم وكنتلمس في الأرض بحال إلى كنقلب على نظاظري فين هوما نظاظري عطيوني نظاظري أح أيييييي وجهي حمد السرباي : هاك أخويا هاهوما نظاظرك نوض بشوية عليك _ نوضني السرباي وقفت على رجليا وبديت كنتمسكن عليهم ...ختي أنا مادرت ليك والو ماقستكش گاع ولا عرفتك فين كاينة أو شكون نتي كنت واقف بين الناس بغيت نخلص السيد حتا سرفقتيني قلت مافيها باس الغلط كيوقع وصبرت ودابا جيتو سلختوني ولا غير حيث عما حگرتو عليا إلى كنتو واعرين سيرو حگرو على شي حد آخر قاد على راسو ولكن ربي كبير وكلت عليكم ربي غادي ينتاقم منكم درت نظيظراتي وتميت غادي وكنتمسكن أييي نتوما حگارة ظاليمين نتوما مجرمين سناء : عفاك سمح لينا اخويا ماكناش عارفين بليز بليز منير : الصديق سمح لينا والله ماكنا عارفين بيلا عما _ سيرو يا الحگارة بعدو مني مايدوي معايا حد أو نديكلاري بيكم مشيت وخليتهم وعينيا كيغرغرو بالدموع بقا فيا الحال حگروني ولاد العبد سناء : اوبسسس مريم بقا فيا الحال والله كنحس بالذنب كيفاش اتكون نفسيتو مسكين تفو على تسرع ظلمناه مريم : تسرعتي اصحبتي واقيلا ماشي كاع هو لي قاسك كنت شاكة في واحد المسخ آخر هو لي ضربك هاذا مكنظنش يديرها وحتا لوكان هو لي دارها ايكون غير حط ايديو بالغلط ومشافكش مابلانش سناء : موشكيلة غير الله يسمح لينا منو بقاو لينا غير ذنوب العميين نجمعوهم حتا هوما مريم : حتا نتي اصحبتي عطيتيه ديك الطرشة درتي ليه الميزاجور سناء : راني مارضيتش يدار ليا هكذا قدام الناس جمعت فيها غدايد داك الشمكار حتا هو مريم : صافي هاذشي علاش مزرباني جيباني من الصالون حتا حجباني مزال ماقديتهم في الأخير نشوف المدابزة و الشمكار سناء : صافي اصحبتي بلا ماتبقاي تنگري ماتزيديش عليا حتا نتي مريم : صافي بيبي لي عطا الله عطاه _ مشيت لدار وأنا داخل هي توقف عليا الواليدة بدات كتقلب ليا في وجهي الواليدة : معامن مضارب تاني أوجه البلا _ حتا حد الطوبيس حبس فران بجهد ضربت وجهي مع واحد الحديدة هاذا ماكين الواليدة : حديدة باينة باينة أول مرة نشوف حديدة عندها ليدين زيد دير كسكروط _ ماحكراتش عليا بالهدرة مشيت التلاجة هزيت ميكة ديال الگلاص درتها بلاصة الضربة وريحت كناكل في البغرير والعسل وكندوز بقهوة وحليب حتا تما داخل الواليد لصالون بست ليه ايدو وجلست كملت ماكلتي وانا حادر عينيا الواليد : وجه المشاكيل ضاربتي تاني معامن شكون هاذا لي سلخك _ لا مضاربتش غير ضربت وجهي مع حديدة ديال الطوبيس الواليد : ماعلينا سربي الوقت كيدوز وكيتحسب عليك ماعندك الوقت رآه حما الطرح أولدي _ عارف الواليد بلا ماتبقا تنگر كل مرة وتفكرني عارف لي عليا وانا راني خدام على داكشي ماشي غير جالس كون هاني الواليدة : السي عبد القادر صافي خليه ياكل على خاطرو ولدي راجل وقادر يوفي بوعدو لي قطع لينا كول أولدي عمر كريشتك _كملت ماكلتي ودخلت لبيتي سديت عليا بديت كنكتب ملاحظات ساليت بعد شعلت البيسي كنتفرج وخرجت كنعيط الواليدة وا حادددة الواليدة : نعم اولدي _ مايدخل عليا حد ومايعيط عليا حد العشا ماغديش نتعشا راني شبعان ( شبعان نيت عصا ) زدحت الباب و بقيت كنتفرج وفي نفس الوقت كنقاد شي لعيبات خاصين بيا حتا وصل وقت النعاس شديت بلاصتي وانا كنتأمل وكنسترجع الذكريات ديولي كيف كنت قبل سنة من دابا حتا بدا يديني النعاس... ناري على بلان نسيت ماعرفتكم براسي سميتي مهذي 27 عام من آسفي ولد حي المطار خدمتي ممثل على الناس وكذاب وراكم شفتو العربون من الأول ديال القصة, عندي قامة متوسطة 175 سنتيم في طول وغليظ عندي كرش كبيرة مع الماكلة والنعاس والجلوس وحناكي منفوخين تقول واكل دردك كنبان بحال ( الزوبير ) مربي اللحية مشنتفة وشعر مغوفل واخا رطب كنبان بحال شي هبيل غير الفرق لي بيناتنا أنا نقي و هاذشي لي خاصكم تعرفو حاليا عليا .... من بعد عناء طويل مع التفكير ضربتها بنعسة الغد ليه مع الصباح كنسمع الدقان بجهد قفزني فقت مخلوع من النعاس خرجت من بيتي مخلوع طليت كلقا البوليس عندنا في الدار عاد رتاحيت كوميسير مغاري : لآلة حادة السي عبد القادر اتمشيو معانا لولاية الأمن من أجل واحد تحقيق خفيف وترجعو الواليد : ياك ديتو الولد شنو باغيينا حنا عطونا تيساع تفرقو علينا كوميسير مغاري : هاذشي في مصلحتكم يقدر ينفع ولدكم غير شرفو معانا دغيا اترجعو _ مشات الواليدة لبسات جلابتها والواليد كان لابس ضراعيتو وتماو خارجين مع الباب وفي عينيهم نظرات قهر وحزن الواليدة : مهذي الغدا كيطيب رد ليه البال راك عارف ضابط : وهاذا الشاف شنو نديرو معاه ندوه معانا تاهو من أجل التحقيق كوميسير مغاري : هاذاك غير عما ماعندو باش يفيدنا غير خليه _ داوهم البوليس وانا مشيت كنفطر بالخبز والزبدة بلدية وشوية الزيت وكندوز بأتاي وكناكل عادي بحال إلى ماواقع والو كنظن كلكم كتسائلو علاش كلشي كيحساب ليه أني عما واخا أنا كنشوف هاذ السؤال الجواب ديالو اتعرفوه من بعد ماتعمقو في قصتي بقيت شاد التيليكومند كنتفرج وكنقلب من قناة لقناة ودرت لي وصاتني عليه الواليدة غير نشف الغدا من البلول طفيت عليه وكملت فراجتي حتا دخلو عليا مالين دار مقلقين الواليد : في آخر ياماتنا نبقاو نطلعو ونزلو في الكوميساريات الواليدة : صافي سكت دابا يسمعك _ على سلامتكم اش قالو ليكم في الولاية الواليدة : غير بغاو يعرفو على خوك فين كيمشي معامن كيخرج وايمتا كان كيجي يدوز معانا أوقات الفراغ وشنو كيقول لينا قبل من ديك الجريمة وامتى آخر مرة تكلم معانا في الهاتف وشي أسئلة آخرين صافي الواليد : وقدرنا نعرفو حتا موعد المحاكمة ديالو ايمتا _هاذشي كي والو يكون خير ماعلينا انمشي نبدل حوايجي انخرج خليت ليكم الراحة الواليدة : جلس حتا تغدا بعدا,دابا نحط ليكم الغدا _ مع بدا يجيني الجوع تسنيت حتا حطات لينا المرقة بطاطة وزيتون والدجاج كليت حتا شعبت من بعد توجهت لدوش غسلت ايدي ومشيت لبيتي بدلت حوايجي لبست قبية كحلة سروال كحل وسبادري كحلة نظيظرات كحلين وعصا ديال العميين طرگت الواليدة خديت منها 100 درهم وتميت خارج تجاه بلاكة الطوبيس لي كيدي لافاك من بعض طول انتظار جا الطوبيس طلعت كان عامر ولكن واحد السيد الله يجازيه بالخير ناض ليا من البلاصة مع كيحساب ليه عما جاتني من الجنة والناس ريحت تا وصلت حدا لافاك كيف العادة وصلت قبل الوقت لي كيتجمعو فيه الكلكية و قصدت القهوة حمد السرباي : مرحبا مرحبا هاني انجيب ليك قهوتك كيف العادة وهاذ المرة مندخلش معاك التفاصيل _ ههه صافي الحمد الله فهمتي وكنشكرك بزاف يعز بيك على البارح فكيتيني من دوك الدراري حمد السرباي: هاذا واجب اصديقي مكنحملش الحگرة أنا واحد النهار كنت غادي حتا لقيت ... _ هاهو بدا تاني موصيبة, صافي اخويا حمد ما فيا لي يسمع شي قصة بغيت غير نبقا متراكي بوحدي الله يحفظك . مشا جاب ليا القهوة وريحت كنشرب في قهوتي وشاد الستون مع راسي حتا كيبانو ليا الكليكة تجمعو في نفس القنت وكيف العادة ولابد شي واحد فيهم يمشي الكيوسك يتقدا ليهم المشروبات و السقاطة ... عيطت على حمد خلصتو وقصدت الكيوسك لحقت على دوك دراري لي مشاو وكان فيهم واحد سميتو سامي طويل وصحيح شوية ولكن زينو على قد الحال ولاخر سميتو حمزة قصير ولكن شكلو زوين كيوت وهوما خارجين دخلت في سامي بجهد حتا كان ايطيح ... سمح ليا خويا سامي : ماكين باس أنا لي منتابهتش اخويا _ مشاو وأنا تقديت موناضة ومشيت كوانيت قريب منهم سناء : الداري شوفوو راهو الولد ديال البارح مسكين الحمد لله جا _ جبدت شيشة الكتريك من جيبي وبديت كنضرب شي نطيرات سامي : واش هذاك العما هو لي قلتو لينا دابزتو معاه مسكين باينة فيه ظريف نمشي نعيط ليه يجي يريح معانا ومنها ديرو الواجب وعتاذرو منو اكي سناء : بلاتي انمشي معاك عندو , مشيت مع سامي وأنا مترددة كندور في عويناتي ومعارفة مانقول حشمانة منو سامي : سلام الخاوة بيخير أنا صديق الدراري لي تخاصمو معاك البارح وبغيناك تجي تريح معانا ويعتاذرو منك على سوء الفهم لي وقع البارح وحتا أنا كنعتاذر منك بالنيابة عليهم _ عليكم السلام نتا باينة فيك دروريش ولكن هوما ماتايقش فيهم ياك ماغيقيصني حد ؟ نخاف يضربوني تاني وبالأخص ديك البنت ايديها كتخرج السم قصحاتني بديك الطرشة واش خدامة في البني. بديت كنضحك وبالأخص فاش شفتها كتلامس إيديها واش نيت قاصحيين وعلامة الاستغراب على وجهها🤣 سناء : كح كح مكانش يحساب ليا ايدي قاصحين لهاذ الدرجة عند بالي رطبين سمح لينا اخويا بزاف غير يله معانا حتا واحد ماغيقيصك على ضمانتي _ فاش جاو عندي وبغاوني نمشي نجلس معاهم حسيت بواحد الفرحة كثر من الفرحة ديال الباك واخيرا نجحات الخطة لا لا ماشي غير وحدة 2 خطط . لولة هي اني أنا لي ضربت سناء في الكيوسك ونكرت تعمدت نحيد نظاظري باش مايحسابش ليها عما وضربني ومع قلبها بيض قدرت ندير ليها تأنيب الضمير بسهولة هاذشي ايخليها تبغي تعتاذر مني بأي طريقة وتحس بأنها مدينة ليا باعتذار وتبغي ضمني لكليكة ديالهم وحتا في حالة قلت يقدر ماينجحش البلان الاول درت خطة بديلة دزت لسامي وهذا بالضبط تجيه في صحتو وماتجيهش في شيشة إلكتريك ديالو كيموت على شيحاجة سميتها الشيشة . بقيت حاضي معاه حتا عرفت النوع لي كيستعمل واليوم في الكيوسك خديتها ليه فاش خرجت فيه باش يتحنسر , وفاش يتقطع يضطر يطلب مني اني نعطيه الشيشة ديالي حيث عندي نفس النوع لي شفرت وهاذشي كامل كنديرو باش ندخل معاهم لكليكة وكيف كتشوفو نجحات الخطة ديالي مشيت لعندهم من بعد ماوصلني سامي عرفت براسي و مديت ايدي وبداو كيسلمو عليا وكيعرفوني بسمياتهم وصلت نوبة ديال خونا لي ضربني لبارح سلم عليا بقيت طالقها عليهم قلت ليه هاذ اليد حرشة دايرة بحال البالة هاذي وحدة من ليدين لي سلخوني لبارح ياك ماغلطتش بديت كنضحك وحتا هوما كيضحكو أيمن : سميتي ايمن سمح ليا اخويا عمرات لينا هاذ ختنا راسنا ومع هي بمتابة ختنا مابغيناش شي حد يقيسها ونتا عارف ردة الفعل ديال الإنسان إلى تبسل ليه شي حد بختو وحنا دمنا حامي _ المسماحة الله يسامح ماكين باس أهو ماتبقاش تسرعوو هانتوما ضربتوني وماقدرتو ديرو والو لشخص لي ضربها شتو الغلط. منير : بصح عندك الحق _ تعرفت عليهم كان المجموع ديالهم 9 الأشخاص 4 ولاد و 5 بنات سامي : تقدر تعطيني الشيشة ديالك نضربو بيها شي نطيرات اعشيري خوك تقطع _ ايه ايه خود راحتك ماشي موشكيل هاك مريم : شفتك ديما كتكون هنا ومكناش عارفينك مكتشوفش اش كتجي دير _ غير كنقنت في للدار وكنجي يضربني شوية الهوى ومرة مرة كنسمع غناكم وكيعجبني اني نتصنت ليكم وديما كنقول انكم دراري نقيين هناء : مرحبا بيك معانا أخويا , حمزة حرك داك الگيتار موسقنا حمزة : بلاتي قبل مانبداو كيف كنديرو مع كلشي خاص نغنيو والمهذي يختار يشطح يا بهاذ الفولار يديرو في خصرو ولا يشطح بالخلخال نتوما عارفين شروط الانضمام لينا _ جبدهم من شكارة وحطهم قدامي ولد العبد يحساب ليه أنا شيخة مولينيكس ... واعشيري الشيخات ومكيدوزوش هاذ السطاج , هذا عليا أنا مانديرش هاذشي روجولتي ماتسمحش ليا ندير هاذشي حمزة : ولكن أنا درتها الساط _ كندوي على روجولتي أنا نتا إلى ماكنتيش راجل منعرف دخلتها ليه غير بضحك وصافي ومحملهاش وجهو ولا حمر وحتا الكليكة كيبانو ليا حابسين الضحكة غير بزز حشمو يضحكو ليه في وجهو .... عفوني من هاذشي ونقدر اني نموسقكم بالگيتار بهاذ الصبعان السحريين نخليكم فرحانين وناشطين سناء : بصح كتعرف الگيتار كي درتي ليها ونتا ماكتشوفش _ ماكنتش عما يله مدة قصيرة باش عميت وكنعرف لگيتار مزيان ارو ليا الگيتار وحيدو هاذ الخلخال وفولار يقدر حمزة تشدو الحالة ويبدا يشطح لينا هنا , بداو كيضحكو عليه وهكذا قدرت نفرض شخصيتي القوية عليهم شديت داك الگيتار كنتلمس فيه وكناسيي فيه و بديت كنعزف و كنغني ليهم وهوما كيغنيو معايا وكيصفقو حتال واحد اللحظة اتقلب الفرحة ديالنا فاش وقف علينا واحد وجه الحبس ماتحملش تشوف كمارتو عبيقة : سناء بغيت نهدر معاك سناء : شنو بغيتي اخويا سير عطينا تيساع حمزة : أيمن شنو جاب هاذ الميكروب لينا تفو على نهار الله يبعدو علينا منير : موشكيلة بحال هاذ النوع تضربو مايبقاش يفرقك حتا يقتلك ولا تقتلو عبيقة : قلت ليك بغيت نهدر معاك اسناء سناء : وسير بعد مني اخويا واش مكتفهمش قول شنو بغيتي عبيقة : كتمرگني بيا أو كنبان ليك ولد صغير علاش كنسيفط ليك ومكتجاوبيش سناء : مابغيتش نجاوبك سير عطيني التيساع دابا أو نعيط ليك البوليس عبيقة : ناري مي خلعتيني وقفي بعدا نهدر معاك واحد الدقيقة دابا هاذ المونيكات حسن مني _ جرها بزز نوضها وكاملين كيتفرجو , وقفت بكل شجاعة وأنا متوجه ليه وداير فيها عما هزيت وجهي وحمرتو فيه عبيقة : اش خاصك اداك العما شتك جاي عندي ماخفتيش على راسك _ الخوف من الله ماشي من العبد خلي فيك شوية النفس اخونا مابغاتش تهدر معاك سير غيرها عطا الله البنات غيرها... كعا من كلامي وشاف فيا بنظرات تهديد وجبد مضاية من تحت حوايجو حطها ليا حدا وجهي , لي معايا شداتهم الخلعة وسارة طلقات واحد الغوتة عبيقة : نتا دخل سوق راسك أنا كنبغيها غير اتولي مراتي يا بالخاطر يا بالقوة ونتا إلى عاودتي دويتي معايا غادي ندير ليك خريطة في وجهك بهاذ المسطرة سمعتيني _ ضربني بطرشة وجمعني بنص تحت انظار الجميع وحتا حد ماقدر يتدخل عبيقة : الزعرة زيدي نهدر معاك _ يله شد في ايد سناء حتا بانو ليه البوليس ديال البوسط لي حدا لافاك كيجريو جيهتو هو يهرب عبيقة : إلى حساب ليك غادي نتفرق منك راكي غالطة نتي دياليييييي الزعرة سناء : سير الله يلگيها ليك نوض أمهدي ياك ماوقع ليك والو _ أنا بيخير ماوقع ليا والو قولي ليا شكون هاذ خونا وشنو باغي منك مريم :اوففف خرجها منا خلعة قال ليك باغيها ليه عيا يدور بيها ومكتحاشيهاش ليه ودابا كاع بسل ولا كيتقرب ليها عاين باين سامي : مسخوط الواليدين هاذا حباس معروف ديما خارج داخل الحبس وحتا عائلتو معروفين حباسة ومعديين على الناس ديما كيتعداو منير : الله يبعدهم علينا ياربي السلامة تريكة هوما قاطعين أيديهم من يد الرحمان _ غير خليوهم كيف كيتعداو ايجيب ليهم الله لي يتعدا عليهم سناء : شنو غادي نديرو مع هاذ خونا باينة ماغديش يعطينا التيساع _ الحل سيرو ديكلاريو رآه كاين المخزن في البلاد سناء : مابغيتش بابا يسيق الخبار لهاذشي ( شارع الحرية ) مجهولة : علاش ضربتيه واش عرفتي شنو درتي اليد لي تحطات عليه غادي نهرسها عبيقة : رحميني عفاك والله منعاود نقرب ليه ولا نقرب جيهتهم آخر مرة باقي تشوفيني الآلة الله يرحم باك حني عليا مجهولة : داز الحال على هاذ الكلام الدفلة فاش كتخرج من الفم ماكترجعش غادي تنال الجزاء ديالك على هاذ العملة حتا نتا ماحنيتيش فيه قبيلة , سلختو مزيان وهرست ليه إديه باش مايبقاش يمدهم على الضعفاء ودخلتو السيارة ديالي لي من نوع Audi كحلة ونطالقت بأقصى سرعة . _ بقينا كنديو ونجيبو في الهدرة على هاذ خونا من بعد ساعة ديال الوقت دازت واحد الطومبيل كحلة من نوع Audi من شانطي لي قدامنا بسرعة كبيرة وفي لحظة دهشة من الجميع تحل الباب ديال الطومبيل وترما شي حد من ديك الطومبيل وكان كولو دمايات تجمعوو عليه الناس ومشينا حتا حنا قربنا منو نعرفو شنو واقع وشكون داك الشخص وإذا بينا كنتفاجئو انهو عبيقة كلو جروح وضرابي مغيب ماكيتحركش وإيديه عوجين بقيت غير مصدوم كيفاش وقع هاذشي وعلاش لاحوه قريب منا واش زعما صدفة وانا كنفكر تحطات عليا إيد على كتفي....يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM