الأسود 🖤 الجزء التاسع 🔥🔥🔥🔥🔥 ( التتمة من بعد 320 لايك طاكيو صحابكم يقراو القصة ❤️) _ والموصيبة قلت ليك الكادو داخل في الخطة لي كنوجد دامي : هههههه صافي أسيدي الخطة ولكن راه مادوزهاش عليا أنا وها الأيام بيناتنا غادي نشوفو _ شدينا الطريق لمول مع وصلنا بلاصات الطومبيل و دخلنا بجوج لبوتيك زارا تقدينا داكشي لي بغيت وخرجنا دامي : ذواق مع راسك كتعرف تختار ايعجبها الكادو لي خديتي ليها _ خوك ذوقو رفيع من الصغر ، ركبنا الطومبيل وحطاتني دامي حدا الدار ودخلت لقيتهم كيتعشاو نضميت ليهم كليت وطلعت لبيتي تاصلت بسناء مجاوبتنيش تابغيت نعس وهي تعاود تاصل بيا سناء : ألو مهدي ياك لباس _ والو باس بقيت مشطون وبغيت نطمأن عليك سناء : أنا بيخير مابيا والو ونتا صافا مزال مجاكش النعاس _ أنا الحمد الله مجانيش النعاس بقا بالي معاك وهاذشي علاش تاصلت بيك سناء : يسول فيك الخير أنا بيخير غير رتاح من جيهتي سناء : مزال موضوع اخر سناء : قول الله يسمعنا خبار الخير _ غدا إلى ماعندك والو شنو بان ليك دوزي عليا لدار نمشيو واحد البلاصة عندي ليك مفاجأة زوينة بزاف غادية تعجبك سناء : ايه علاش لا واش نقولها لصحابنا حتا هوما _ من الأفضل نمشيو غير بجوج حيث موجد ليك مفاجئة زوينة سناء : واخا معاش نمشيو _تافقت معاها على الوقت وقطعت وتكيت بلاصتي وانا كنفكر في المفاجأة ديال غدا واش غادي تعجبها أو لا ، وكيفاش غادي دوز الخرجة بقيت كنتخيل سيناريوهات حتا داوني عينيا الصباح فقت معطل شفت المگانة لقيتها 12:15 يعني بقات ساعة على الوقت لي داير مع سناء ريحت كنفطر على خاطري من بعد ضربتها بتدويشة ومشيت بدلت حوايجي ضربت حطيطة زوينة تفركست تيشورت أبيض سطارطيرة زرقة ودجين زرق وسبادري بيضة وكسكيطة زرقة ومگانة ورشيت ريحة خفيفة وهزيت نظاظر ديال العميين ومشيت جلست في وسط الدار كنستنا في سناء وفيدي الساشي لي فيها الكادو الواليدة : شتك مفركس فين غادي أولدي ممولفاش ليك تفركس شحال ماشفتك تفركستي من يامات الخدمة _ غير هنا خارج مع صاحبي سامي ، بدات كدير ليا أمم وكدور وجهها ديك اللعبة ديال عايقة بيك الواليدة : كلاكصون ديال شي طومبيل انوض نشوف شكون _ اخليك الواليدة مرتاحة غير سامي هذاك هاني غادي نخرج الواليدة : بغيت نشوف معامن خارج ، مشيت حليت الشرجم وبديت كنطل كتبان ليا طومبيل بيضة Range عرفتها ديال ديك البنت لي وصلاتو تال عند الباب داك النهار وقلت ليها بغيتها تكون عروستي ، يله بغيت نسد الشرجم وهي تبان ليا هابطة من الطومبيل كتبان أنيقة وآية في الجمال الله يحفظها لواليديها ... ولدي صاحبك سامي كيتسناك غير هو شفتو دغيا طوال ليه الشعر وولا زعر كيفاش البلان ههههه _ من خلال نظرات الواليدة ليا والتمرگين ديالها عرفتها شافت سناء وعاقت بيا ... باي الواليدة ، خرجت لعند سناء لقيتها كتسناني قدام الباب مديت ليها إيدي باش نسلم عليها ولكن زربات عليا وعنقاتني وسلمات عليه بالوجه عجبني الحال وتصدمت في نفس الوقت الواليدة : مع سمعت ولدي سد الباب ديال الدار مشيت كنجري لشرجم كنطل من واحد الشق كنبركگ فيهم شفتهم فاش كيتسالمو وبديت كنبتاسم هاكاوا هك على ولدي أمين لي داير فيها كيحشم مشات الحشمة _عاوناتني سناء نطلع لطومبيل درت السمطة ومديت ليها ورقة مكتوب فيها العنوان ديال المكان لي غادي نمشيو ليه ولي كيتواجد خارج آسفي سناء : فين انمشيو عمري مشيت هاذ البلاصة _ غير قصدي العنوان اتعجبك البلاصة سناء : على مولانا كتبان اليوم زوين جمع علينا زينك أالسي مهدي مافينا لي تزعط _ احم احم سناء : كاس القهوة ولا عصير _ كاس دلحب الزين يله تحركي باش نوصلو بكري ، شدينا الطريق وحنا كنهدرو وكنديو ونجيبو في الهدرة من بعد 45 دقيقة كنا حدا واحد القلعة قديمة خلاوها البرتغاليين والأغلبية ديال المسفيويين ماكيعرفوهاش سناء : عمري جيت هنا شنو كاين في هاذ البلاصة واش متحف _ دابا تعرفي غير هو قبل ماندخلوو بغيتك تلبسي هاذو جبتهم ليك كادو سناء : ميغسي مهدي _دخلات طومبيل تبدل حوايجها وأنا حاضيها وهي مع كيحساب ليها عما ماتسوقاتش ليا وأنا حاضيها بحال النمس ، حاليا شفت أحسن منظر اخوتي 🥰 سيرو يا لي وصلتوني لهنا مسامح ليكم دنيا واخرة واش عرفتو اشنو شفت بلا مانذكر ليكم التفاصيل ماقاد على ذنوبكم ولكن داكشي فخيش كيف كيقولو الزين ولاطاي 😂 سناء : شكرا بزاف على هاذ الغوب والطالون زوينين عندك الذوق عجبوني _ عرفتو فاش خرجات من طومبيل وشفتها بالغوب حمرة طويلة مفتوحة من جناب وبلا سميطات وطالون في الأسود وشعرها مطلوق كتبان بحال الاميرات زينها ماشي طبيعي قنبولة ، ودنيا تقلشو وحليت فيها فمي مايمكنش شحال زوينة سناء : مهدي مالك ساهي _ الأحمر يليق بيك باينة طلعتي كتحمقي بهاذ الغوب ياريت كون كانو عندي العينين نشوفك ولكن للأسف ماعندي زهر سناء : ماتقولش هاذشي أنا هي عينيك أمهدي وغادي نبقا معاك حتا تقدر تشوفني إن شاء الله قول ليا شكون عاونك تاخد هاذ الغوب _ ماعوني حد غير بوحدي مشيت البوتيك بديت كنوصفك لواحد السيدة خدامة تما وختارت ليا هاذي سناء : ونتا فين شايفني حتا وصفتيني بهاذ الدقة وجبتي العبار هو هذاك _ سامي كيوصف ليا كلشي زربت عليها كيف العادة بكذوبي ، حاجة أخرى واخا عليك كذبتي عليا الكذابة سناء : اويلي فاش كذبت عليك _ سامي وصف ليا شكلك والوصف لي عطاني عكس لي قلتي ليا على حساب الوصف ديالو مافيتينك في الزين غير حور العين سناء : كذبة بيضة ، بصراحة عندي حقي في الزين ولكن ماشي تاني كيف وصف ليك غير شوية وصافي _ امم التواضع زعما ، تمينا داخلين وحنا مشادين في بعضياتنا و كنشرح ليها على هاذ المعلمة لي كانت في الأساس قصر ديال أمير برتغالي ،و من بعد خروج البرتغاليين خداه واحد من الشيوخ كبار ديال آسفي ردو متحف وباقي دابا مفتوح في وجه العموم . سناء : متحف زوين _ مزال ماشفتي والو ماجيناش نشوفو هاذ التخربيق طلبي من السيكريتي ينعت ليك اتجاه الحديقة سناء : خويا عفاك ممكن توريني فين كاينة الحديقة إلى جات على خاطرك السيكريتي : سيرو نيشان ودورو على ليمن غادي يبان ليك الباب ديال الحديقة _ توجهنا ليها مع دخلنا تصدمات من المنظر لي شافت دارت ايديها على فمها وبقات كتشوف كدور عينيها في المكان الرائع سناء : واو واو على بلاصة مايمكنش شحال كتحمق عمري شفت بحالها غزالة _ جبتها لهاذ الحديقة حيث فيها جميع أنواع الورود الحمراء كتسما حديقة الدماء كيميزها الورد الاحمر الكثير والنادر لي كيتواجد فيها ، كان الأمير البرتغالي كيجمعو من جميع أنحاء العالم حيث مهووس بالورد الأحمر وفاش سمعت سناء كتبغي الورد الأحمر فكرت في هاذ البلاصة عرفت غادي تعجبها سناء : منكذبش عليكم ملي شفت الحديقة فرحت لدرجة حسيت بدموعي بغاوو ينزلو بالفرحة حيث هاذ المكان مميز وغزال بزاف حاسة براسي وسط شي حلمة بحال هاذ المنظر كنشوفو غير في الأفلام الكرتون والخيال ، الورود الحمراء على أشكالها وأنواعها في جميع الأماكن _ سناء سمعتك البارح كدوي على الورد الحمر وشحال كتبغيه كان بإمكاني نجيب ليك وريدات حمرين أو بوكي دالورد بحال بقية الناس ولكن نتي مميزة بغيت نهديك شيحاجة لي مختالفة ومتميزة وتبقاي عاقلة عليها حياتك كاملة ولقيت بيلا أحسن هدية تليق بيك هي هاذ المكان سناء : صدمتيني وفاجئتيني ماعمري حسيت بأن شي حد مهتم بيا وبداكشي لي كنبغي شكرا ليك هاذي أحسن مفاجئة في حياتي فرحتيني بزاف _ مستعد ندير أي حاجة كتعجبك وتفرحك حيث تستاهلي كل حاجة زوينة نتي قلبك بيض وظريفة بزاف عمري شفت شي إنسانة بحالك حيث من نهار عرفتك ونتي كتعامليني مزيان و قررتي تساعديني ، المعاملة ديالك خلاتني نشوفك بحال شي ملاك في حياتي ، بقات متأثرة وكتشوف فيا بنظرات إعجاب وفي لحظة كلاخ مني قطعت وردة من الجردة ولسقتها ليها في شعرها ، ولكن مع لهفتها وحبها لهاذ البلاصة كانت مرفوعة ما لحظاتش شنو درت كان عاجبها الحال وعقلها طاير وكتبتاسم وابتسامتها فتنات ليا قلبي وسحرات ليا عقلي سناء : ماكينينش شي كليمات نقدر نوصف بيهم الشعور ديالي _هي كانت كتشوف في الحديقة ومعجبة بيها وأنا كنت كنشوف غير سناء قدامي وتفتنت بيها ماحيدتش عليها عيني ولا دقيقة وقلبي كان كيضرب 360 ماعرفتش شنو هاذ الشعور عمري حسيت بيه من قبل واش هذا هو الحب الحقيقي سناء : ياييييييييييي أنا انطير بالفرحة امهدي _جبدت باف صغير من جيبي وخدمت واحد الموسيقى إنجليزية وقلت ليها اجي نشطحوو ، شديت في ايديها ومشينا حدا واحد النافورة سناء : نهار على نهار كتزيد تبهرني نتا مختالف على الجميع _ مزال ماشفتي والو هاذي غير البداية سناء : حيدت ليه نظاظر على عينيه وبقيت مفيكسية عيني على عينيه وكنتأمل فيهم بنظرات حب غرقت فيهم ، مهدي عينيك زوينين _ بقات كتشوف ليا في عينيا توترت وبقيت كنشوف في السما ، مدات ليا إيديها شديت فيها و بدينا كنشحطو ballroom dance وهذا نوع من الرقص الثنائي بان في أوائل السبعينات عند الطبقة الغنية في الإنجليز وحنا كنشطحو كنا فرحانين بزاف سناء : عرفتي بلاصة زوينة وولد وبنت كيشطحو فيها كنبانوو بحال أبطال ديال شي فيلم رومانسي من ديال ديزني قمة في الرومانسية _ عمري تخيلت نعيش هاذ لحظة مع شي وحدة سناء : حتا أنا وهاذي أحسن لحظة في حياتي جامي تخيلتها حتا في أحلامي ناري كون شافونا صحابنا ايعجبهم الحال _ متأكدة أنها أحسن لحظة في حياتك ( كنرقصو وكنهدرو ) سناء : اه عيشتيني شعور زوين ماليه مثيل أي بنت كتحب المفاجئات وكتبغي تعيش لحظات رومانسية ( فاش قلتها ليه ماكذبتش حيث عجباتني البلاصة وأنا معاه أنا طايرة بالفرحة حيث الولد لي كنبغي دار ليا هاذ المفاجأة الزوينة ، ماتصدموش من كلامي أنا كنبغي مهدي ووليت كنعشقو وبهاذ السرعة ماعرفتش كيفاش ولكن لي عارفة انهو ولا هو كلشي بالنسبة ليا وهو مصدر السعادة ديالي ) _ واحد لحظة بانت ليا سناء ساهية وكتفكر وبلا مانحس قربت بغيت نبوسها في شنايفها شافتني كنقرب ليها بتاسمت ليا وحشمات يله انبوسها مدات ليا جبهتها صدقت بايسها في جبهتها ناري على بلان ماصدقاتش واش حنا انبقاوو غير نبوسو الجبهات والريوس رآه شبعنا رضا من عند مالين الدار بغينا نوعو سناء : منين تعلمتي الرقص امهدي _ كنت كنتفرج في الأفلام ديال dance بزاف وتعلمت ليه من تما قولي لي كيف جاتك البلاصة واش عجباتك سناء : بصراحة كتحمق هاذ البلاصة عيشتيني نهار زوين من بين أحسن أيام حياتي حسيت براسي بحال شي أميرة عمر أيتنسا هاذ النهار شكرا على هاذ الشعور ، بغيت نعرف كيفاش عرفتي البلاصة _ كنت ديجا جيت ليها مع خويا وشي صحابي قبل ماندير الحادثة ، بقيت طالقها عليها مشينا ريحنا في واحد الكرسي سناء : مهدي عاود ليا على راسك ماحدنا بوحدنا نتعارفو على بعضنا كثر قول ليا واش كتبغي شي وحدة ؟ وفاش كنتي خدام قبل من الحادثة ؟ بغيت نتعرف على حياتك ماكرهتش نعرف عليك كولشي _ كنت قبل ماندير الحادثة إنسان سبورتيف ومهلي في حالتي وخدام في واحد الشركة ديال البرمجة وكنت تاانا خاطب وقريب نتزوج ولكن خطيبتي سمحات فيا حيث وليت عما دابا تزوجات ... وأنا كندوي سناء كتشوف فيا بنظرات إعجاب وكتلعب بشعرها سناء : بصراحة مادارت فيها مايصلاح ولكن فيها خير ماتعرف ربي شنو مخبي ليك واش كنتي كتبغيها _ لا عمري بغيت في حياتي كان غير ولف كنهدرو وكنضحكو وقليل فاش خرجنا بجوج حيث مادوزناش بزاف غير تعارفنا وتخطبنا سناء : ربي ايعوضك بيما حسن إن شاء الله _ هاذ ماحسن كاين معايا دابا ، سناء بغيت نقول ليك أني ... سناء : مريم كتصوني سمح ليا واحد الدقيقة نجاوب ( أنا خارجة اصحبتي مع الدار غدا نتشاوفو سيري تال من بعد ونصوني ليك ) أشنو كنتي بغيتي تقول ليا ، وانا كنشوف فيه متردد يخرج الهدرة وماعرفاهش شنو باغي يقول و كنتمنا نسمع منو كلمة كنبغيك _ حتا كنت انعتارف ليها بحبي ليها ودرت بناقص خفت ترفضني أو تقول ليا ممستعداش أو شيحاجة بحال هكذا نخلي حتا نتأكد أنها كتبغيني ... بغيت نقول أني سمعت من داري كتبغي شي ضابط سميتو أمين كيفاش البلان عاودي ليا سناء : ناري وصلوها ليك دغيا ، ماشي حب غير اعجاب أي بنت كتكون كتكراشي على شي حد هاذا ماكين وأنا محيداه من بالي حيث عارف عمرو يكون ليا _ ولكن واش ديجا تلاقيتو وفين تعارفتو سناء : عمرنا تلاقينا وهو ماعرفنيش حتا واش كاينة على هاذ الكوكب أنا شفتو في الجرائد والأخبار وقريت على البطولات ديولو وعجباتي شجاعتو _ قالت هاذ الجملة وأنا نقول في خاطري يا حب أمين نتي كاينة في قلبي وياريت كون كنت نقدر نقول ليك أنا هو الضابط أمين لي كيعجبك سناء : أنا أمهدي بغيت غير لقا شي حد يبغيني لشخصيتي ماشي حيث عندي الفلوس ولا حيث باغي غراضو مني عمري لقيت شي حد نبغيه نرتاح ليه أو شفت هو الراجل المثالي ليا سبحان الله زهري عوج كنتلقا غير بأشباه الرجال الأغلبية كيتقرب ليا غير على ود شكلي وغراضو ولا حيث كيحساب ليه عندي فلوس كثيرة حيث أنا بنت العمراني _ يعني على هاذ الحساب دوزتي علاقات بزاف خلاطة مع راسك سناء : لا بالعكس والله عمري تصاحبت ولا حبيت دوزت أصدقاء اه ولكن تصاحيب لا ، عاشرت ولاد بزاف وكنت كل نهار تلقاني مع كليكة بحال شي زوفري وهاذشي فادني حيث عرفت طريقة تفكيرهم وكيفاش كيتفلاو على البنات داكشي علاش وليت كنفهم الولاد مزيان وكنصفيهم من حياتي حتا بقاو عندي غير العشران لي كتعرف دابا ، كيف قلت ليك عرفت ولاد لي كنت معتابراهم أعز أصدقائي ولكن مع الوقت بداو كيحاولو يتجاوزو حدود الصداقة حيث كنبان ليهم متفتحة من طريقة لبسي وكنضحك مع أي واحد ، يمكن كيقول ليهم راسهم رآه لي جا يديرها بيا أو أنا من دوك البنات لي خارجين الطريق ولكن ماعرفينش أن سناء قارية في سوق الرجال ومستحيل شي واحد من الذكورة (ماشي رجال ) ياكل ليا دماغي بداك التحلوين ، وكاين تاني من صحابي لي كيبغي يبروفيتي فيا حيث كيحساب ليه عندي ثروة كبيرة وماكيعرفوش أنا با سقرام معايا أنا وماما وماكيعقلش علينا وشحال من مرة كنا كنبقاو بالجوع فاش كيتخاصم مع ماما وكيتعدا علينا بالعصا فاش كيكون سكران وغير مؤخرا سلخني قبل من الخرجة ديال الواليدية ، الناس ماعرفينش هاذشي كيحساب ليهم عايشين حياة الأمراء ولكن حياتي لي كنعيش مختلفة تماما على الحياة لي كيتصورو الناس أنا داك بابا لي محسودة عليه كنكرهوو حيث كيتعدا على الناس ومكرفس عليا أنا وماما ومهلي غير في مرتوو التانية داكشي علاش ديما كتلقاني باغة غير نضحك ونشط مع صحابنا باش نسا شنو كيوقع داخل دارنا _ ولكن سمعت من صحابنا أن باباك ضريف سناء : حيث بابا كايبين النفاق قدام الناس باش يبقاو يشوفوه في صورة زوينة ، وصحابنا كيقولو أنهو ضريف حيث لي كيوقع وسط دارنا عمري قلتو لشيواحد من غيرك أمهدي وعد يبقا بيناتنا اهئ اهئ . _ بدات كتبكي جريتها لصدري عنقتها وكنواسي فيها ، اواه وسط الضحكة البريئة لي ديما على وجهك كاين هاذ الحزن كامل مخبياه في قلبك ماتستاهليش هاذشي نتي لي بحالك خاصها تكون ديما فرحانة ... بديت كنمسح ليها دموعها وقلت ليها بيلا ماجيناش هنا باش ندوزو الوقت في البكا جينا نفرحو ونضحكو سناء : سمح ليا ماشي لخاطري ولكن حيث رتاحيت ليك قلت نخوي عليك قلبي اهئ اهئ _ أح ودنيا ضروني سناء : اويلي مالك المهدي _ سمعت بزاف ديال الورد كيبكيو في خطرة وحدة وكيقولو مضامنين مع الملكة ديالهم لي هي نتي سناء : هاهاها كطنز عليا _ على نتي ماشي وردة الزين لقيتيني كنفكر شنو غادي نقول لسيكريتي فاش غادي نبغيو نخرجو من هنا سناء : علاش شنو درنا _أيقول ليا سارق لينا أحسن وردة في الحديقة سناء : احم احم _ كاس دلما ولاعصير سناء : هههههه شفرتي ليا جملتي بغيت كاس د لحب _ هكذا نبغيك بغيت ديما نشوف ابتسامتك بغيت نقصد نسمع ضحكتك حيث كتسالي معايا سناء : صافي ماغنبكيش وأنضحك باش تبقا تسمع ضحكتي مهدي عاود ليا شي نكتة _ أيه علاش لا ، قالك هاذا واحد ديما كيهز گفة فيها كلبة وكيمشي عند واحد البوليسي ولكن البوليسي كيجري عليه واحد النهار خونا جا تاني هاز الگفة ومشا عند البوليسي ، البوليسي قال والله حتا نقلب الگفة نشوف شنو فيها ملي قلبها لقا فيها كلبة قال ليه هاذ الكلبة مالك هازها هنا ؟ قال ليه خونا بغيتك تحملها باش تولد ليا شيان بوليس سناء : هههههه ضحكتيني زوينة هاذ النكتة _ نتي لي زوينة الزين ، قولي ليا أسناء واش باباك مريح معاكم ديما سناء : لا قليل فاش كيكون معانا كيمشي الفيلا لي ف كازا بزاف عند مرتو التانية _ اه هكاك مزيان نيت باش يهنيكم من صداعو ( واحد المعلومة اصحابي خاص تكون في بالكم تيقت سناء في الهدرة ديال أنها عمرها بغات أو تصحبات كلامها صحيح ماكذباتش حيث ديجا قالها ليا سامي وكنتيق فيه ماغديش يكذب عليا وهو كيعرفها من أيام الإعدادي الحاجة لي ماكنتش عارف هي معاملة باها معاها تا أنا كان يحساب ليا عايشة حياة الثراء وباها مفششها ) سناء : نوض نشطحوو ... شديت ليه في إيديه وكنت كنحس بأني شادة السعادة ديالي بيدي ماكرهتش نتلاح عليه ونعنقو ونقول ليه شحال كنبغيك ولكن حشمت مجاتش أنا لي نقولها ليه بينت ليه من معاملتي بيلا كنبغيه خاص هو لي تجي منو المبادرة _ شداتني من ايدي ونضت درت ليها خاطرها وبقينا كنشطحو بجوج بكل رومانسية وكنت فرحان أحسن إحساس هو الإحساس بالحب خلاتها إليسا ( أجمل إحساس في الكون إنك تعشق بجنون ) شطحنا حتا عيينا ورجعنا جلسنا وأنا نقول ليها يله نمشيو سناء : ماسخيتش خلينا نبقاو شوية عفاك _ واخا نبقاو على أنا نقدر نخسر ليك ناضت من كرسي بدات كدور تما وكتلعب بحال شي بنت صغيرة وكدير سطوريات كان عاجبها الحال وانا بقيت ساهي كنفكر في كلام دامي لي قالت ليا على سناء و الكليكة ، وانا مضارب مع راسي ولا عندي انفصام في الشخصية كنظن كلامها على صواب هاذ الزين ماليه حتا ذنب وحسابي مع العمراني ماشي بنتو وواحد الرأس كيقول ليا ها علاش مامزيانش تحب هانتا ضعافيتي سناء : مهدي صافي يله نمشيو _ شدات ليا في ايدي وجبدات تيلفون سناء : شي ضحيكة زوينة ناخدو تصويرة تذكارية ... تكيت ليه على كتفو وخديت صورة باش نبقا نتفكرو بيها ودرت فيديو لحديقة ولمهدي باش نوريه البنات _ تصورنا وتمينا قاصدين طموبيل ركبنا ودرت السمطة وقبل مامنتحركوو حطات عليا ايديها...يتبع رأيكم في الجزء ؟ تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM