الأسود 🖤 الجزء الخامس 🔥🔥🔥🔥 ( التتمة من بعد 300 لايك طاكيو صحابكم يقراو القصة زوينة بزاف ♥️) _ قصدها واحد فيهم وهو مترع باغي يشدها, وعرفتوو الخوت دارت ليه داكشي ديال بريسلي هزات رجلها حطاتها ليه في وجهو شركات ليه وجهو كامل طاح دودة بقينا مصدومين وحالين فمنا فيها كيفاش بنت بهاذ القوة , قصدها واحد آخر كذلك بغا يضربها بموس شدات ليه دراعو وحيداتو ليه و جات فيه بكروشي لفمو ساست ليه سنانو وهزاتو ضرباتوو مع الأرض ومنعاودش ليكم هاذ الجنية شنو خرج منها شدات القطاطعية هلكاتهم عصا وبلا مايقدرو يمسوها بضربة وحدة خلاتهم يرغبوها تطلقهم يمشيو بحالهم ووالو هي ممسوقاش كتسلخ فيهم وكتبتاسم وحنا كنتفرجو ماعرفنا منين جابت هاذ القوة كاملة مجرم 1: نبوس ليك رجليك خلينا نمشيو يرحم باباك والله مانعاودو مجهولة : سكتو مانسمعش حسكم تسرحو في الأرض نعسو على كرشكم وديرو ايديكم ورا راسكم _ نفدو كلامها نعسو على كرشهم وهزات واحد زرواطة ديال الحديد بقات تعطيهم لرجليهم حتا هرساتهم كاملين وجراتهم لاحتهم جنب الطريق شي مغيب شي كينين بسبب الألم مجهولة : هاذا جزاء لي كيحگر على الضعفاء مريم : يله نمشيو من هنا سناء : ياك ماغديش تأذينا اهئ اهئ مجهولة : لا متخافوش مني أنا خلصتكم من المجرمين هزو داكشي لي خداو ليكم ويمكن ليكم تمشيو , حبسو البكا البنات ماعندكم مناش تخافو ماغدي يأذيكم حد دابا غير هو ماشتو وآلو وماسمعتو والو وماداز عليكم والو نساو شنو وقع هنا وأنكم وقفتو في الطريق مفهوم الجميع : واخا مريم : شكرا ليك على المساعدة الله يجزيك بالخير _ طلعو الطومبيل من بعد ماشكروها بقيت أنا الأخير يله بغيت نطلع حطات ايديها على كتفي وقربات وجها لعندي ودوات بصوت خافت مجهولة : كيقول ليك المثل عمر النمر ماكيولي مش ولا المش كيولي نمر , والسبع فاش كيرجع 2 خطوات لور يعني ناوي يهاجم ماشي كينعس فكر في كلامي _ بقيت ساكت وغير كنشوف فيها مافهمتش شنو بغات توصل ليا , شنو كتقصدي ؟ مجهولة : راك عارف مزيان شنو كنقصد , حاجة أخرى فاش توصل الواليدية قصد زنقة 33 دار 25 كاين واحد الدكتور تما سميتو باحمدي هو ايعالجك يله بسلامة _ شكون نتي وشنو سميتك كنعرفك ؟ مجهولة : بعض المرات الأسماء ماكيكونوش مهمين رد البال لراسك _ طلعت الطومبيل والبنات كيفكرو واش يكملو الطريق ولايرجعو سامي : صافي دازت سليمة خلونا نكملو طريقنا مجاتش نخويو بالدراري فدوى : ناري اش كان ايوقع لينا حفظنا الله جات هاذ البنت ملاك : ماوقع والو خليونا نمشيو _ كملنا الطريق الواليدية وانا كنفكر في كلام البنت ومادازش الوقت باش قدرت أني نفهم شنو بغات تقصد وصلنا البلاصة المعلومة حطاتهم سناء حدا الكافي فين كاين لانيڤ , سناء : باي حبوباتي ماغديش نتعطلو _كملنا أنا وسناء الطريق لعند الطبيب توجهنا العنوان لي عطاتنا البنت دقينا عليه فعلا فتح لينا طبيب كبير في العمر دخلنا ورحب بينا عاودت ليه انهو تعرضوا لينا الشفارة الطبيب : الوقت خيابت نتابهو لراسكم _ جاب المعدات ديالو وبدا كيخيط ليا في الجرح بلا بنج تألمت شوية ولكن صبرت مابغيتش نبان ضعيف قدام الكراش سالا الخياطة دار ليا 3 الغرزات داوا ليا الجرح ثم الفاصمة في الأخير فاش بغيت نخلصو رفض الطبيب : كندير هاذشي في سبيل الله غير سير _ شكرناه وتمينا خارجين من عندو ركبنا الطومبيل وقبل مايديماري سناء شافت فيا وهي كتحسر سناء : سمح ليا بزاف أنا السباب امهدي حتا تضربتي هاذ الضربة _ علاش نتي السباب شنو درتي ليا باش طلبي السماحة. سناء : كون ماشي أنا لي حكرت عليك تمشي معانا ماكانش ايوقع هاذشي كون غير خليتك على راحتك _ شديت ليها في ايديها بجوج حشمات مني , هاذا مكتاب الله والحمد الله ملي خرجات لينا سليمة وهاذي غير ضربة خفيفة دغيا تبرا متخافيش عليا غادي نولي بيخير سناء : باش كتعجبني أنك شجاع هاذي هي المرة التانية لي كتدخل وكتحاول تحامي علينا قلال بحالك _ كون كنت كنشوف بعيني نموت معاهم ومنخليش شي حد في صحابي يتأذى سناء : نتا حسن من لي كيشوفو بعينيهم _ شدينا طريق القهوة وانا بالي مع ختنا وكلامها لي كيتعاود ليا في راسي وفي نفس الوقت كنسرق نظرات وكنشوف في الزين لي حدايا تمنيت كون نقدر نشد فيها ونعنقها جمالها مكيتقاومش سناء : مهدي ماغتهودش رآه وصلنا مالك ساهي فاش كتفكر _ فيك اسناء بغيت نقول ليك شيحاجة سناء : قول نسمع _ جيتي زوينة بزاف ليوم كتفتني بالزين , السيدة حشمات وتزنگات وحدرات عينيها ولكن في لحظة تصدمات ونقزات من بلاصتها وشافت فيا بواحد الشوفة كلها غموض طلعات حاجبها وخنزرات فيا سناء : عاود شنو قلتي _ناري على تكليخة عاد طلع معايا القالب ناري أشنو قلت كيفاش تكلخت , قلت ليك جيتي زوينة سناء : باش عرفتي بيلا جيت زوينة ,واش كتشوف ومخبيها علينا ولا كيفاش _ لا أاااااا لا ماشي كنشوف قالها ليا سامي قبيلة قال ليا سناء جات زوينة بزاف اليوم على غير العادة وفكرت نقولها ليك ونرفع ليك المعنويات سناء : اه ايوا هكاك تخلعت و فرحت في نفس الوقت كون غير كنتي كتشوف ايكون احسن والله _ اوف الحمد الله سلكت راسي تحمست الشباب ولكن بصح جات زوينة وقلتها بلا مانشعر شي نهار غادي نحصل , دخلنا القهوة وسناء شادة فيا والكافي عامرة بالشباب وأنا هاز مناخري السما وفرحان وا عباد الله ياقومممممممم راه تيتيز شاد ليا في إيدي أجيو شوفوني , جاو عندنا الكليكة ديولنا لي مكانوش معانا سلمو علينا وكيسولوني مالي في جبهتي قلت ليهم من بعد ونعاود ليهم تاجهت لواحد القنت خاوي في آخر الكافي بعيد على الدراري شوية ريحت في الكرسي ودرت ايدي على حنكي وكنفكر , رغم ضجيج الأغاني ولكن عقلي ماشي معايا ساهي مع الهدرة ديال البنت وكنتسأل مع راسي واش الإستنتاج لي على بالي بصح أو لا غالط خاصني نشوف هاذ البنت ضروري هو يقول ليا واحد الراس ماحدي شفتها 2 المرات غالبا ماشي صدفة انشوفها مرة ثالثة ورابعة حيث الموضوع كيتعلق بخويا ولكن لي مابغاش يدخل ليا دماغي شنو بغات مريم : مهذي مالك مريح بوحدك اش واقع واش مزال شاطنك الموضوع ديال قبيلة _ لا ماشي داكشي غير شيحاجة أخرى شاغلة ليا دماغي مريم : واش ديك البنت لي عاونتنا كتعرفها شفت أنها كتشوف فيك شي شوفات ماشي هوما هاذوك وحتا داك الكلام لي وجهات ليك في الأخير سمعتو جاني غريب شنو بغات تقصد _ ماعرفتش أنا ماكنعرفهاش وزايدون نساي قبيلة صافي داز جينا نفوجو ماشي نتنكدو , بقينا تانهدرو في مواضيع آخرين وسناء كتشوف فيا شي شوفات غراب ماحيداتش عينيها علينا واحد لحظة بدات كدير بالاشارة لمريم زعما أجيو ومريم كتقول ليها بلاتي سناء : مالكم تعزلتو بوحدكم يله نطفيو مع أيمن الشمع _ توجهنا معاها لمائدة لي محطوطة فيها طورطة غنينا لي أيمن سنة حلوة يا جميل وكنسفقو هناء : يله طفي الشمع 1.2.3 _ طفا شمع ورجعت لداك القنت كنشوف فيهم كيقطعو الحلوة وهي تجيب ليا سناء حقي في الحلوة والموناضة سناء : هاك خود حقك من الحلوة _ الحلاوة بزاف كضرني سناء : خود اصحبي ضروري دوق الباروك مايمكنش ماتكلهاش _ حطيت صبعي على إيد سناء ودرتو في فمي بحال إلى كندوق شيحاجة وأنا نقول ليها ها لي قلنا هاذشي غير يله دقت الحلاوة وضرني قلبي بقا غير ناكلها سمحي ليا حلوة بزاف منقدرش ... بدات كضحك عجبها الحال خديت منها الحلوة من بين كاع الناس الوحيدة لي فكرتي فيا وجبتي ليا حقي شكرا سناء : منقدرش نخليك بلانش _ بديت كندوق في الحلوة ... أمممم بنينة واش هاذ المداق كان فيها ولا حتا هزيتها بيديك عاد وولات بنينة سناء : منعرف ههههه _ على هاذ الحساب تجيبي ليا المازوط بهاذ اليدين ايجيني حلو بدات كضحك وأنا ترفعت دات ليا عقلي بقيت كنشوف وكنتأمل في ضحكتها البريئة بنظرة اعجاب فدوى : سناء اجي واحد الدقيقة _ مشات وهي غادية وكتلفت ليا وكتبتاسم وكتلعب بشعرها حتا كيبان ليا أيمن جارها لواحد القنت كيدوي معاها ولد العبد عندو الكلمة قالها ودارها ولكن من بعد دقائق كتبان مشات وخلاتو وهي كاعية باينة ماعجبهاش الحال جا عندي سامي سامي : هههه البلان لي قلنا البارح سناء قمعات ايمن قلتها ليك كنت قريب ليهم وسمعت شنو تقال , قالت ليه سمح ليا نتا بحال خويا ومكنفكرش ندخل في غولاسيو _ فرحت ولكن مقدرتش نقولها ليه , عادي اصحبي كتوقع لأباطرة كاع فين الموشكيل سامي : محظوظ لي غادي تكون ليه سناء منير : سامي مهدي أجيو شطحو معانا _ مشينا عندهم دوزنا ديك العشية زاهية شبعنا شطيح على إقاعات أغاني شعبية وحتا أغاني غربية ميكس أنا درت ليهم شطحة الغوريلة خليتهم ميتين بضحك غنينا وكلينا وشربنا وتصورنا مجموعين وصلات 19:00 خرجنا من الكافي كنتسراو في الواليدية خدينا صور تذكارية ومن بعد ساعة توجهنا لطومبيل سناء أنا وصحابي وكل واحد ركب طومبيل لي جا بيها وشدينا الطريق مجموعين مريم : بصراحة الحفلة دازت زوينة بزاف سناء : اه بعدا عوضنا ديك الخلعة لي تخلعنا فدوى : وأخيرا وصلنا آسفي بصراحة عييت بغيت غير نعس مريم : أوويلي من دابا اصحبتي فدوى : راني فقت بكري شحال وانا في الصالون مريم : ماكين نعاس احبيبتي حتا نهدرو ابيل جماعية كيف كل ليلة _ بداو بيا أنا لول حطوني حدا دار توادعت معاهم ودخلت للدار شافوني مالين دار مضروب تخلعو عليا عاودت ليهم كلشي الواليدة : تال ايمتا اتبقا هكذا المشاكيل غير كيجريو وراك ديما مضروب من صغرك _ هكذا أنا أميمتي انبقا هكذا حتا يحن الله.... الواليد : رد البال لراسك أولدي , مابقا والو للمحاكمة _ مخلوع الواليد واخا عارف شنو ايوقع تما ماكنتش باغي ليه هاذشي مسكين وحتا أنا هاذي ماشي طريقي ومختاريتهاش وتفرضات عليا كنتقطع من الداخل الواليد ربي لي عالم بيا ولكن كنحس في هاذ الفطرة بشعور فشكل ماعرفتش شنو هو ولكن بحال إلى بدا يرجع ليا شوية الأمل الواليد : صبر أولدي إلى مصبرتيش شكون ايصبر _ماعلينا أنا واكل شارب غادي ندخل بيتي رتاح بلا مادقو عليا على ود العشا بغيت غير نرتاح دخلت كنقلب على شي لعيبات في جوجل وكلصق مذكرات في الحائط ديال البيت كيف ديما من بعد مشيت تكيت صونيت على سامي دويت معاه شوية, ولا صديقي ديال بصح عز عليا هاذ الدري الروجولة من بعد ماساليت معاه تاصلت بسناء ... آلو سناء هاذي سناء : هي هاذي ياكما قمرتي على نمرتي _ لا لا ماقمرتش عليها قلت لواليدة تجبدها ليا سناء : ياك لباس ياكما واقعة ليك شيحاجة _ واش أنا ما غادي نصوني حتا تكون واقعة ليا شيحاجة غير قلت نطمأن عليك واش صافا من الخلعة ديال قبيلة أو واش وصلتي الدار بيخير سناء : شكرا يسول فيك الخير أنا بيخير _ ايوا مزيان هاذشي لي بغيت تصبحي على خير سناء : هههه مالك زربان إلى كنتي خايف يتسالا ليك صولد نصوني أنا _ لا ماشي هكاك غير قلت مانديرونجيكش سناء : لا ماكين لا ديرونجمون لا والو وايلي علاش حنا عشران بالعكس _ فراسك واحد المعلومة صوتك زوين بزاف فاش كندوي معاك كنحس أني داوي مع انثى وحتا ضحكتك رقيقة وكيوت أغلبية البنات لي عرفت صوتهم بحال ديال داك عبيقة سناء : شكرا ملي عجبك صوتي انبقا نهدر معاك كل نهار حتا تشبع منو _ بقينا كنهدرو شوية وكنتعاودو على لانيڤ وكنحاول منكثرش معاها الهدرة باش منتسماش فارض راسي وفي نفس الوقت مانبانش أني طايح فيها , قدرت نصدرها وقلت ليها نشاوفوو غدا وقطعت وضربتها بنعسة وهاذ الليلة بالضبط مبغاش يجيني النعاس كنفكر في حياتنا و كلام ديك البنت لي مقدرتش نساه كيدورو في راسي تساؤلات كثار شنو عارفة على خويا وشنو القصة ديالها مع أي واحد كيقرب جيهتنا كتشربو العصير وبصراحة لي منقدرش نخبي عليكم بدات كتشد فيا الزعطة ديال سناء غير كنغمض عيني كنتخيل وجهها قدامي وصوتها وفي نفس الوقت مقاتل مع النعاس حتا داني بزز الغد ليه فقت مسخسخ فطرت وكان فيا نعاس داكشي علاش رجعت نعست حتا وجد الغدا تغديت وبدلت حوايجي سروال كحل قبية كحلة وسبرديلة كحلة و خرجت كيف ديما وكنظن وليتوو عارفين الوجهة قصدت حمد شربت قهوتي بقيت كنتسناهم حتا جاو وهاذ المرة كلشي جا تال أيمن ملاك : مال ايمن مجاش ياكما مريض ولا بيه شيحاجة منير : أيمن تقلق الدراري حمزة : وعلاش ايتقلق غير البارح درنا ليه انيڤ مفرگع شنو بغا مريم : ماكين مايتخبا طلب يرتبط بسناء ورفضات هاذا هو السبب سامي : اه ولكن هاذا ماشي سبب يخليه يتقلق أنا كنعرفو دابا يبرد ويرجع كيف كان فدوى : خاصو يقبل بكل روح رياضية , ومن الأول كان عليه يفهم راسو من الأول باش مايتحرجش واش منيتو ناوي يدخل في علاقة مع سناء هو عارفها أنها خاطيها التصاحيب والعلاقات سناء : صافي بدلو الموضوع يله نمشيو نريحو في القهوة اليوم بلاش من الغنا منير : ايه علاش لا _ الكليكة سبقونا شوية وبقيت أنا وحمزة لور وشاد ليا في أيدي هو ينگ على 2 بنات قوقات لابسين حوايج شبه عاريات وقفو ليه زرب عليهم بهدرتو ( دراري كتسناو الگجامات باش دخلو الدريات وتصاحبو ههههه غير بلا ماتسناو إلى تصحبتو نتوما شكون ايكمل معايا القصة 😂😂 ) بدا عليهم بالهدرة ديالو حتا خدا نمرة وحدة فيهم وهي تنطق لاخرة وقالت ليه مال صاحبك ماكدويش واش زنزون حمزة : صاحبي ماكيشوفش مسكين _ ولكن كنشوف بقلبي اختي وكنسمع بودني وقلبي قال ليا بيلا نتي زوينة وعندك كلشي خاصك غير نمرتي .... بدات كضحك , سمع اعشيري غير ضحكتها شحال زوينة وكتخطف القلب بقا غير وجهها حكيمة : حتا نتا عندك كليمات زوينين لسانك حلو مريم : واحمزة وعنيبة زيد زيد اتفسد اخلاق الدري حمزة : وهو فاسد من عند الله هاحنا جايين _ ولد العبد يا بو البنات كبتيها ماتقسمش مع خوك حمزة : تكون شي لعبة مانساكش نتا راك فاهم غير فاش نحضر ليك تيتيز عنداك تزگل الشبكة بحال حكيمي _ متخافش على خوك شد التيليفون قول ليها تقيد ليا النمرة , خدا ليا النمرة وتحركنا تبعناهم القهوة ريحنا معاهم فدوى : اش كنتوو كتقولوو لدوك المونيكات _انا ماقلت والو غير حمزة مسخوط لي شاد نمرة أنا غير عما ماكنشوفش مريم : اممممم كنتي كدوي معاهم شنو كنتي كتقول الجن سناء : غير قولو عليكم الأمان حمزة بنظرة شيطانية كيف العادة : العما مساهلش قال ليك كيشوف بقلبو وكيسمع بودنيه وكما قال الشاعر مهدي ( القلب يراك جميلة وعندك كلشي خاصك غير نمرتي ) _ الله ينعل طاسيلتك الكذاب علاش تكذب عليهم حمزة : إلى كدبتوني ها تيليفونو عطاتو البنت نمرتها وضحات ليه وقالت ليه كلامك زوين ولد العبد عندو دخلات زوينين من اليوم ايولي يمشي معايا فدوى : حمزة الباسل فوت عليك الدري واش بغيتيه يولي بحالك يفكر غير في البنات سامي : مال العما مايعيش خلوه بصحتو ملاك : ماطلعتيش ساهل أمهدي أحياني عليك سناء : يعيش ولكن يبعد على هاذ الماركات مايليقوش ليه خاصو ما أحسن ... حمزة فوت عليك الدري ماتبقاش دخلو لبحال هاذ البلانات الخاويين ملاك : مالك اصحبتي خليه يضبر على راسو واش يبقا سيليباطير بحالنا مريم : ماعندك مادير بهاذ المسخات , أمم سميتها حكيمة أنا نوريك شنو غادي ندير هاذ النمرة نمحيو والديها گاع _ لا حشومة مابلانش علاش اتمسحيها أمريم سناء : تكمش امهدي ممنوع عليك البنات, مزيان مريم دارت هكذا علاه نتا إلى بديتي تهدر معاها وتطورات علاقتكم اتولي تخرج معاها وتنسا صحابك وحنا بغيناك تبقا معانا سارة : عندها الحق _ بان ليكم البلان غير فيا أنا ونتي أمريم يا شنيولة مصاحبة وبغيتيني نبقا سيليباطير وحمزة حتا هو خدا نمرة مالكم مادويتو معاه غير حيث أنا عما حگرتو عليا سناء : مشغلاناش في حمزة حنا عارفينو كيف داير هادشي لمصلاحتك هاذ البنات خايبين مايليقوش ليك ملي غادي تلقا لي تناسبك مايهدر معاك حد _ شوفو من الأخير يا نتصاحبو كاملين يانتفارقو كاملين تافين غادي نلقا هاذ ماحسن وانا غير عما شكون لي تقبل بيا سامي : ها ظهر الحق وزهق الباطل سناء : ماتحگرش راسك اصحبي ربي غادي يعطيك ماحسن خاصك غير تعرف فين تقلب ملاك : صافي ختار وحدة منا أمهدي _ أنا مع عما ومكنشوفش غادي نختار مولات احسن صوت ولي هي مريم ماتسلفهاش ليا أمنير منير : وا باز تابعة 5 البنات بانت ليك غير مريم فوتنا اصحبي مريم : بصح صوتي زوين _ منين جاه الزين كيدير للضجيج ماكتسكتيش بحال شي ناموسة ززززززززززز هناء : هكا البارود مريم : ياك كتعايرني حشومة عليك انتقلق _ لا لا غير كنضحك معاك وصافي نتي ختي العزيزة مريم : على فكرة طاح في بالي سؤال بغيت نسولو ليك _ سولي نسمع هاذ الاسئلة ديالك مريم : لوكان عندك دقيقة تقدر ترجع تشوف فيها شكون تبغي تشوف أول واحد _ اممم كنظن سناء ونتوما ... سناء تزنگات ولاخرين شافو فيا شوفات الغدر سامي : غير قول سناء بوحدها وصافي علاش تبعتيها ونتوما احم احم فدوى : يابو البنات تا نتا ماسهلش علاش بالضبط سناء _ الأمر بسيط حيث على ماسمعت أن أيمن شخص زوين وأي بنت تمناه بغيت نشوف سناء لي رفضاتو كيف دايرة في الجمال فضول وصافي هاذا ماكين ( أش بان ليكم المتابعين كنعرف نزطط راسي جاوبوني في خاطركم) سناء : صافي غير على هاذشي يا الفضولي ايوا أسيدي أنا خايبة انوصف ليك راسي شعري حرش وجمعاه ببانضة بحال الجيكس ديال درهم ووجهي منفوخ بحال البنات لي كياكلو دردگ وعامر حبوب نيفي طويل شاد نص في وجهي عيني خارجين وسناني عوجين وصفرين وفورمتي مربعة كنخلع عندك زهر ماكتشوفش أما كون هربتي _ بنت العبد كتكذب عليا في وجهي ولكن ضحكاتني بكلامها وبالأخص فاش بديت كنتخيل الشكل لي قالت ليا , كون كنت عما غادي نسمع هاذ الوصف عمري نوصلهم مزال 🤣 ...سمعي اسناء واخا تكوني كيف قلتي ليا أو أكثر اتبقاي في نظري زوينة حيث قلبك وتصرفاتك زوينين بشهادة الجميع وغادي نبقا نشوفك ديما زوينة حيث الجمال الحقيقي هو جمال القلب أما الزين الخارجي كيزول مع الوقت سناء : ثيقتك أسي مهدي بهاذ الهدرة باش طيحتي حكيمة ياك _ قالتها بواحد الطريقة مختالفة وكتعوج بحال فاش كتغير المرا على راجلها جاني تصرفها غريب ( أيه أيه كيف قلدتيها دابا 🤣) ، حكيمة غير حمزة لي شدها أنا غير كنت كنضحك معاهم سارة : عاقو بيك صافي غير سكت هناء : دراري شنو بان ليكم شي تسافيرة في آخر الشهر منير : مزيان شي فوياج اوغگانيزي للشمال ناضية سناء : ايه علاش لانشوفو ليها شي وقت ونمشيو _ دوزنا الوقت وحنا كنديو ونجيبو في الهدرة حتا وصل الوقت بغينا نمشيو قلت ليهم ماغنجيش غدا وبيلا عندي طبيب في الرباط . أنا كذبت عليهم كاينة المحاكمة ديال خويا أمين غدا في الرباط .... توادعنا يله بغيت نتحرك أنا وسامي في الموطور هي تجي سناء عندي شدات فيا سناء : غير سير اسامي أنا أنوصلو لدار _ طلعت معاها الطومبيل وكانت معاها غير مريم هاذ المرة , البنات لآخرين شدو طاكسي مشاو حيث سناء ومريم تسلو منهم بداعي أنهم عندهم غراض ستغربت من هاذ البلان .... فين غاديين نمشيو مريم : 2 بنات زوينات وولد فين انمشيوو في نظرك احم احم _ فين انمشيو بسلامة ياكما نمشيو لدار هي ليلة زاهية هههه سناء : ايوا الله يمسخكم بجوج ظصرتي أمهدي ونتي الباسلة سدي فمك غادي انمشيوو واحد الكافي نهدروو فيها في واحد الموضوع مهم ...يتبع ( الجزء الماجي غادي يكون احسن جزء مشوق غادي تعرفو البطل ديالنا أمين والمجهولة 🔥) تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM