💫💜 قصة_المحلل 💜💫 #الجزء 47 : 💥💕 طلعات صفاء لبيتها وتبعاتها اسماء لي سمعات كلامها ...اسماء:واش حماقيتي اش كتروني ...صفاء(جلسات فوق الناموسية وهي تتشوف فيها):علاش شنو درت ...اسماء(جلسات قبالتها):كيفاش موافقة واش باغا تحمقينا حنا مباركين لي تفكينا من هاد القوم ...صفاء:ومن نيتك نتي عارفاني غنرجع لتم ولداك بنادم ...اسماء(باستفهام):علاياش ناوية ممكن تفهميني ...صفاء(تقادات فالجلسة):سمعيني مزيان حميد واخا طلقني 3 طلقات متابعين فوقت واحد مكيتعتابرش طلاق التلات هداك الطلاق الشفهي يعتبر طلقة وحدة فقط ...اسماء(ضربات على يديها):بفففف كيفاش مشات من بالنا هاد القضية افففف يعني هو يلا بغا يرجعك ممكن يرجعك يعني مغتحتاجيش لمحلل ...صفاء:حتى يكون فاهم بعدا هو نطق بالكلمة ولكن مفهمهاش غدا ملي غيجي غنخليه يطلقني رسميا يعني يسيفطليا براتي تال عندي ...اسماء:ههه كتفلاي عليا السيد باغي يرجعك ونتي باغاه يطلقك رسميا ...صفاء:اه غيطلقني رسميا وغنكمل العدة ديالي(بنظرة حقودة)غنلعب معاه بلعبو هو ومو وداك المحلل لي باغي يجيب هو غنستغلو انا وغنقلب كلشي ضدو ...اسماء(كضور راسها):مبقيت فاهمة والو ...صفاء:دابا تفهمي كلشي(شافت قدامها ساهية)فلول مشيت بلا شروط ودخلت بنية حسنة ولكن دابا ملي وصلنا لهدشي غيشوف صفاء وحدة خرا ...اسماء:بقا فيا غير هيثم مسكين ...صفاء:يا ريت درت بكلامو كان قلبو حاسو ...اسماء:البكا مور الميت خسارة اختي بففف نوضي نهبطو باقة مفطرتيش ...صفاء:معندو منين يدوزلي غير سيري نتي انا منرتاح حتى نشوف هيثم قدامي ...خلاتها اسماء على خاطرها وهبطات لتحت لقات باها ومها كل واحد شاد قنت وغارق فتفكيرو وزهور لي دموعها نازلين على خدها..جلسات حداهم وبقات ساكتة....دازت الليلة فدار عبد الغفور كلها سهير تا حد مغمضات عينو حتى عند فتيحة لي عرفات اش دار ولدها بغات تموت بالفقسة اما هو الليل كامل كيدعي باش يقبلو وترجعلو صفاء لي شد حويجها ولبسهم للوسادة وبات معنقها وهو كل ساعة يشم ريحتها ويتخيلها بين يدو...صبح الصباح وحميد كيف طلع النهار مشا لعندهم حليه عبد الغفور الباب وهو غيطير عليه دخلو للدار ونزلات عندهم صفاء قبل ميهضر باها دارتلو اشارة باش يخليها منها ليه ودكشي لي كان جلس حداهم وهو كيسمع كلامهم ...صفاء:باقي باغي ترجعني من بعد مطلقتيني(باستهزاء)وبالتلات ...حميد(كيشوف فيها وهو ملهوف عليها ونظراتو ماشي طبيعيين):اه ولكن ندمت ندمت انا منلقاش بحالك ...صفاء:الا بغيت نرجعليك عندي شروط ...حميد:عارف عارف نتنازلو على الشكاية ...صفاء:هديك اول حاجة و اليوم ملي تخرج هنا نبغي نشوف خويا قدامي فالدار ...حميد:اهاه موافق شنو شروطك لاخرين ...صفاء:غطلقني رسميا يعني فالمحكمة وغتخليني نكمل العدة ديالي وفهاد 3 شهور غتقلب على دار للكرا حيت مستحيل نرجع نعيش فديك الدار(باستهزاء)عاد ايلا بغيتي نوافق ونتزوج واحد يحللني ليك ونطلق منو ...حميد:احم قضية الطلاق محلولة مي الله اهديها البارح مشات عند المحامي ودفعات الوراق يمكن اليوم يوصلك الاستدعاء ...صفاء(طلعات فيه وهبطات):انا مزوجة بيك ولا بيها ...حميد:انا موافق على شروطك بالحق تا انا بغيتك تواعديني ...صفاء:باش؟! ...حميد(قرب لودنها همس):فهاد 3 شهور متخرجيش من دار وملي نجيب السيد لي يتزوجك ديري شي حاجة وتخليه يطلقك فنفس الليلة يعني بلا ميي ...صفاء(قاطعاتو):كون مرتاح من ديك الناحية انا عند وعدي(وقفات)كون غير نتا راجل وبين ليا خويا اليوم يفطر معانا ...حميد(وقف وهو كيضحك):انا دابا غنمشي ندي مي ونمشيو نخرجوه دابا ...خرج كيجري وصفاء مخرجة عينيها حطات يديها على وجها ممتيقاش ...صفاء:الله يا ربي بيمن كنت مزوجة(ضارت عند باها)واش هدشي طبيعي ا بابا واش شفتي بعينك شنو وقع ...عبد الغفور:رما عليك الطلاقة 3 د المرات شفهيا وفنفس الوقت يعني مطلقة طلقة وحدة ماشي تلاتة(سكت وعاود هضر)متحتاجيش لمحلل(وقف)اش هاد الروينة يا ربي اش هاد الجهل كيفاش بهاد السرعة فكر فمحلل باش ترجعي ليه ...صفاء:يمكن حكمة من عند الله فيها خير... خرج حميد من دار صفاء مشا نيشان لدارهم هز مو وداها للكوميسارية باش يتنازلو على الشكاية وهي كتنكر وتعاير فيه وغير يحمر فيها تسكت وصلو تم دخلوهم عند ياسين لي دغيا جمع الضوسي تا هو محملهمش غير مشاو فحالهم عيطلهم جابو ليه هيثم لي مدخلاتلوش لراسو قضية التنازل عرف القضية فيها إن قبل ميخرج من تم جا خالد لقاه مكشكش خرج هو وياه نيشان لدارهم مقالو والو على لي وقع مع حميد الطريق كاملة ساكت وهيثم لي كيهضر ويتساءل حتى وصلو للدار نزل هيثم حل الباب دخل وخالد بقا واقف فالباب لقا باه فالصالة غير شافو عبد الغفور وقف فرحان عنقو وهو كيردد ...عبد الغفور:الحمد لله الحمد لله اولدي ...هيثم(بعد عليه وهو مغوبش):كيفاش تنازلو ...عبد الغفور:جلس اولدي رتاح بعدا ...هيثم(شاد راسو بزز باش ميغوتش قدام باه):الواليد جاوبني كيفاش تنازلو شنو المقابل ...عبد الغفور(زفر ورجع شاف فيه):المقابل اولدي هو بغا ختك ترجع ليه ...خرج فيه هيثم عينيه ممتيقش مخلاهش يزيد كلمة خرج طالع فالدروج وعبد الغفور تابعو كيعيط ليه حتى انتابه لشي واحد فالباب لقاه خالد مشا لعندو ...عبد الغفور:شنو موقفك اولدي هنا دخل ...خالد(دار التيلي فجيبو ودخل):السلام عليكم ا عمي كيبقيتي شوية على سلامة هيثم ...عبد الغفور:الله اسلمك اولدي زيد دخل(دخل سابقو جلسو شاف فيه وكيهضر بصوت تقيل)مغيدوزهاش على خير ...خالد:احم سمحلي الحاج ولكن كيفاش بنتك قبلات بشروط داك خينا راه بانليا ماشي طبيعي ...عبد الغفور:المظاهر خداعة اولدي ماشي كاع لي كيصلي ويبان متدين راه فعلا انسان واعي ولكن كلشي مكتاب الله ولعل هدشي لي وقع يمكن فيه خير الحمد لله على كل حال ودكشي لي قال البارح وسمعتيه كلو ممنو والو وحتى انا كان بالي مشطون بهيثم وصفاء وهاد الروينة مركزتش بزااف ولكن البنت عندي طلعات فايقة وهدشي لي داز عليها زاد قسحها واخا هي قاسحة ومتنزلش على حقها ولكن دابا زادت ...خالد(واخا مفهمش ولكن حس بلي المشكل تحل):الله يدير لي فيها الخير ...عبد الغفور:امييين يا رب سمحليا اولدي تشغلتي معانا البارح و ...خالد(قاطعو):حشومة تقول هاد الهضرة ا عمي نتا راك فمقام الواليد وهيثم راه خويا كبرنا بجوج وقرينا بجوج وها حنا باقيين مكملين فالحلوة و المرة ...عبد الغفور:الله يجعل يامكم كلها حلوة اولدي ويبعد عليكم شر الخلق ...خالد:امييين ....#عند_هيثم دخل مدرم على صفاء حتى قفزهم كانو جالسين بتلاتة فالبيت يلاه غيبدا يغوت جلساتو وشرحاتليه كلشي وهو غير مكيزيد يعقد غوباشتو ...هيثم:مكنتيش ديري هاكا الحبس مدخلتلو الا ودرت علاش لاش ديما كتسرعي وديري لي فراسك ...زهور:اييه اوليدي حيت حنا مولفين بالحباسات واش باغي تخرج على حياتك ...هيثم:واش حماقيتو ولا شنو واحد بحال هاد المريض خليتوه يديرلكم الشونطاج ونتوما موافقين على كلامو ...صفاء(بتنهيدة):هيثم هو كيدير رايو هبيل ولا منعرف انا ممتيقاش بلي فعلا معندوش تفكير نهائيا سمعني مزيان انا واعدتو وغندير دكشي لي قال وكلشي غنخليه بيد داك السيد لي غيكون فنظرو هو #المحلل ...هيثم:نتييي غييير كتخربقي شكووون قالك ميجيبش لينا شي جلاخة كتر منو يدخلو لحياتنا ونوليو حاصلين معاه حتى هوووو ...صفاء:احم يكون كيف بغا واش انا غنتزوج بيه راه غنفرش ليه كلشي ومنضنش كاين شي راجل يقبل على راسو يتلعب ورا ضهرو انا غنحطو قدامي وغنقولو شنو كاين وسالينا ديك الساعة الكرة عندو ...هيثم:هدشي مداخليش لراسي ...صفاء:غير فكر فيها مزيان ا هيثم وغتلقاها معقولة ...هيثم:ديما كتقسحي راسك وكترجعي نادمة ...صفاء(حدرات راسها):عارفة ونستاهل هدشي لي انا فيه ولكن ...هيثم(جرها عنقها):لااا نتي متستاهليش هدشي حيت عمرك اديتي شي واحد نتي تستاهلي انسان حسن منو يبغيك لداتك كيفما نتي ويعاملك معاملة حسن من هاكا(بعصبية)ماشي يمد عليييك يديه هديك بربي لنسيتها ليه وغنردها غنردها ...فوسط كلام هيثم صفاء مشا بالها لليالي لي دوزاتهم مع حميد وكيفاش كان كيبغي غير يلبي رغبتو فقط وفاش يكمل ينوض ويخليها كتبرد يديها من الالم لي لحقو بيها من شدة لمساتو لي كلها لهفة وشهوانية حسات بلحمها بورش ضمات يديها عندها وهي تتشوف فخوها ...صفاء:كل واحد كيدي نصيبو فالحياة ...هيثم:اه ولكن الانسان مخير ماشي مسير يعني ربي كيعطينا حرية الاختيار ماشي كيفرض علينا اننا نقبلو بكلشي ...زهور:يا ولدي لي عطا الله عطاه هداك مكتابها تزوجات وكملاتش صافي ان شاء الله يجيها ولد ...صفاء(قاطعاتها):انا ضربت على الزواج ا ماما ...هيثم(حط يدو على حنكها):مزال غيجي الانسان لي يستاهلك عندي يقين كبير ...ناض باس راسها وخرج نزل لتحت جلس مع خالد وعبد الغفور مجمعين حتى طلع بدل حويجو وخرج لخدمتو واخا خالد اصر عليه يجلس يرتاح ولكن رفض. فتيحة غادة جاية وختها جالسة كاشوف فيها هي و فدوى و كريمة وهي غير كتندب وتويل ...فتيحة:تاااااا قلت تهنييييييت صااااافي غنتفرررررج فييييييهم ونبرررررد فقاااااايسييييي ناااااااض هووووو داااااني تناااازلت ...فدوى:مكنتيش اصلا دخلي راجلي للحبس ا مي حشومة ...فتيحة(شافت فيها باغة طير عليها):ااااااشمن رااااااجل الله يعطيييييك الدل داهااااا فيييييك ولاااااا حاشااااهااااا ليييييك واااااش تبعععععك ولاااا ندددم علييييك ...فدوى(عقدات غوباشتها):وعلى نتي عطيتيه فرصة ياك غير صبح صباح مشيتي ديكلاريتي بيه وبيتيه فالكوميسارية وهو مسكين كاع ماشي ديال هاد التكرفيص ...فتيحة:شدوووووني علييييها قبلل منطير عليها نهبط ليهااااا دااااك الوجه ...كريمة:يختي واش معندك نفس راه طلقك من الفوق وقدام جيران باينة محاملكش بلا القتلة لي عطاك ...فوزية(قرصاتها باش تسكت):هنينا ...فدوى:خليها ا خالتي خليها دابا تشوفي واش يندم ويجي يردني ولالا ...كريمة:ههه الله ارد بيك وصافي ...فوزية:فتيحة جلسي وبردي صافي انا قلت محال ترجع غير كتسايس معاه ...فتيحة:واااا لهلااااا يرجع جد باباهااااا انا قاااااتلنيييي غير الحلوووووف لي عطاااااني الله لي جالسة تلعبو بين يديهاااا كيف بغاااات قااالك العدة ديااالها بغاااتها ترتاح فيها ويكووون هو لقا دار فين يسكنها وااااااش هبل هدا ولا مالو ...كريمة:نقطع يدي اخالتي الا غير كتفلى عليه وداتو على قد عقلو باش يخرج خوها من الحبس ...فدوى:علاش مشرطش عليها انني نرجع لهيثم مقابل انه يتنازل ...بقات فوزية كتشوف فيهم مفهمات والو كل واحد كيهضر فجهة بوحدو دارت اشارة لبنتها ووقفو بجوج ...فوزية:نخليك اختي دابا راجلي غيجي خاصو يلقاني فالدار ...سلمو عليهم وزادو هابطين فالدروج ...كريمة(باستهزاء):من نيتك باغاني نتزوج ولد ختك وتناسبي معاها ...فوزية:لالا يا بنتي منعطيكش ليها واخا يبقاو غير هوما اناري عمري عرفت ختي خايبة وقبيحة تال هاد الدرجة زيدي زيدي دابا تسمعنا ...باقي مكملوش كلامهم حتى سمعو غوات فدوى وفتيحة تتعايرها ...كريمة:هايا غتبرد فيها سمها هههه ....#عند_هيثم وصلو للشركة وكل واحد دخل لبيرو جلس حاط رايو فوق البيرو وكيدوز يدو على جبهتو راسو عاطيه الحريق بزااف مناعسش الليل كامل ومواكل والو من غير تمرة مع ياسين بزز عيط للمحامي سولو على قضية الطلاق قالو بلي راه رفع الدعوى فالمحكمة وقريب يوصلها الاستدعاء و اكدلو انه غيطلقو من اول جلسة واخا هي ترفض بحكم المشاكل لي وقعو وحتى الشهود لي جاب هيثم القضية منتهية..كمل معاه وهز الوراق باش يخدم حتى بانتلو سميتها فالتيلي كتصوني هزو بزربة وفتح الخط ونطق بصوت هادىء ...هيثم:بشرى؟! ...بشرى:احم سلام ...هيثم:عطيني فرصة نهضر معاك ونشرحليك شنو وقع ...بشرى:ماشي على هدشي عيطت انا غير سمعت بلي عندك شي مشكل البارح و(سكتات قلبها كيضرب والتوتر غالب عليها)المهم على سلامتك بسلامة ...هيثم(نطق بسرعة):بلاااتي متقطعيييش ...بشرى:شنو بغيتي ...هيثم:حلفتك بالواليد ديالك فهاد النهار تعطيني فرصة وتسمعيني حيت راك معارفة والو وغالطة فيا بزاف قسما بالله منويت نتفلى ولا نستغلك لانني فعلا باغيك تكوني مرتي وحلالي ...بشرى(شافت فقمر مخرجة عينيها وقلبها غيخرج):الصمت ...هيثم(كيسمع صوت نفسها لي كيتعالى):نشوفك غدا؟ ...بشرى(شافت فقمر لي دارت لها اشترة باش توافق ونطقات بلا متحس):واخا فين ...ابتاسم هيثم وهو فرحان دار معاها باش يتلاقاو فنفس البلاصة فين شافها المرة لولة ودار معاها مور الفطور شكرها حيت قبلات تعطيه فرصة وهي تقطع عليه ...هيثم(تكا على الكرسي):و اخييييرا شي حااااجة كتفررررح......... #يتبع........♥️🔥 تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM